ރޮހިންޔާ މުސްލިމުންނަށް ދެމުންދާ އަނިޔާތައް މިހާރުން މިހާރަށް ހުއްޓާލާ އެމީހުން ޙިމާޔަތްކުރުމަށް ބައިނަލްއަޤްވާމީ އިންސާފާބެހޭ ކޯޓުން މިޔަންމާގެ ސަރުކާރަށް އަމުރުކޮށްފިއެވެ. ރޮހިންޔާ މުސްލިމުންނާމެދު ހިންގާފައިވާ ހުރިހާ ޖަރީމާތަކުގެ ހެކިތައް ނައްތާލިޔަނުދީ ރައްކާތެރިކުރުމަށްވެސް އިންޓަނެޝްނަލް ކޯޓް އޮފް ޖަސްޓިސް، އައިސީޖޭގެ ފަރާތުން މިޔަންމާއަށް އަންގާފައިވެއެވެ.
ރޮހިންޔާ މުސްލިމުންނަށް ލިބެމުންދާ އަނިޔާތަކާއި ގުޅިގެން ގެންބިޔާގެ ފަރާތުން އދގެ ބައިނަލްއަޤްވާމީ އިންސާފު ޤާއިމުކުރާ ކޯޓަށް މިޔަންމާގެ މައްސަލަ ހުށަހަޅާފައިވަނީ މިދިޔަ އަހަރުގެ ނޮވެމްބަރު މަހުއެވެ. ގެންބިޔާއިން މިޔަންމާގެ މައްޗަށްކުރާ ދައުވާއަކީ ރޮހިންޔާ މުސްލިމުންގެ ނަސްލު ނައްތާލަން އުޅުމުގެ ދަޢުވާއެވެ. އެއްވެސް ދަރިފަސްކޮޅެއްގެ ބަޔަކާމެދު ޖަރީމާއެއް ހިންގުމަކީ 1948ވަނަ އަހަރު ފާސްކުރެވުނު ޖެނީވާ ކޮންވެންޝަންގެ ޤަރާރުތަކުން މަނާކޮށްފައިވާ ކަމެކެވެ.
އެފްރިކާގެ މުސްލިމު ޤައުމެއްކަމަށްވާ ގެންބިޔާއިން މިޔަންމާގެ މައްޗަށް ހުށަހެޅި މައްސަލާގައި ދުނިޔޭގެ އިންސާފާބެހޭ އެންމެމަތީ ކޯޓުން ޙުކުމެއް އިއްވަން އެތައް އަހަރެއް ނަގާފާނެއެވެ. އެހެންކަމުން އެކޯޓުން ނެރުނު އަމުރުގައިވަނީ މިވަގުތައް އެޅެންހުރި ފިޔަވަޅުތައް އަޅަން މިޔަންމާގެ މައްޗަށް އަމުރުކޮށްފައެވެ.
މުޅިއެކު 17 ފަނޑިޔާރުން ހިމެނޭ ބެންޗުގެ އިއްތިފާޤުން ނިންމާފައިވަނީ ރޮހިންޔާ މުސްލިމުން ތިބީ ބޮޑު ނުރައްކަލެއްގެ ތެރޭގައިކަމަށާއި މިޔަންމާގެ ސަރުކާރުން އެމީހުން ހިމާޔަތްކޮށްދޭނެ ޖެހޭނެކަމަށެވެ. އަމުރު ނެރެވުނު އިސްފަނޑިޔާރު ޢަބްދުލްޤަވިއްޔު ޔޫސުފް ވިދާޅުވީ މިޔަންމާއަށް އިޚްތިޔާރާ ބާރުލިބިގެންވާ ހުރިހާ ގޮތަކުން ފިޔަވަޅުތައް އަޅާ ޖެނީވާ ކޮންވެންޝަންގެ މާއްދާތަކާ ޚިލާފުވުން ހުއްޓާލަންޖެހޭކަމަށެވެ. އެފިޔަވަޅުތައް އެގޮތަށް އަޅާތާ ހަތަރުމަސް ފަހުން ކަންހިނގާފައިވާ ގޮތް ރިޕޯޓްކުރުމަށްވެސް ކޯޓުން އަމުރުކޮށްފައިވެއެވެ.
ބައިނަލްއަޤްވާމީ ކޯޓަށް މައްސަލަ ހުށަހެޅި ގެންބިޔާއިން ވަކާލާތުކޮށްފައިވަނީ ވަކި ދަރިފަސްކޮޅެއްގެ ބަޔަކު ނައްތާލަން ހިންގާ ޖަރީމާތައް ހުއްޓުވުމަކީ ދުނިޔޭގެ ހުރިހާ ޤައުމެއްގެ ޒިންމާއެއްކަމަށެވެ. ގެންބިޔާއިން ހުށަހެޅި މައްސަލަތަކާއި އެއްކޮޅަށް ވަކާލާތުކޮށްފައިވަނީ އިންސާނީ ޙައްޤުތަކުގެ ދިފާޢުގައި ވާހަކަދައްކާ ދުނިޔޭގެ އެންމެ މަތީފަންތީގެ ޤާނޫނީ ވަކީލުންނެވެ.
ނެދަލެންޑްސްގެ ދަހޭގުގައި ބޭއްވުނު ޝަރީޢަތުގެ ފުރަތަމަ އަޑުއެހުންތަކަށް މިޔަންމާގެ ވެރިކަމުގައި ހުންނެވި އަން ސަން ސޫޗީވަނީ ހާޒިރުވެވަޑައިގެންފައެވެ. ފަނޑިޔާރުންގެ ކިބައިން ސޫޗީ އެދިވަޑައިގަތީ މިޔަންމާގެ މައްސަލަ ކޯޓުން ބޭރުކުރުމަށެވެ.
2017ވަނަ އަހަރުގެ ފަހުކޮޅުން ފެށިގެން ރޮހިންޔާ މުސްލިމުންނާ ދެކޮޅަށް މިޔަންމާގެ ސިފައިން ހިންގަމުންދާ ޤަތުލުޢާންމުތަކާއި އަނިޔާތަކުން ސަލާމަތްވުމަށް އެޤައުމު ދޫކޮށް 730،000 މުސްލިމުންވަނީ ބަނގުލަދޭޝަށް ހިޖުރަކޮށްފައެވެ. ބަންގްލަދޭޝްގައި އެމީހުން ދިރިއުޅެމުންދަނީ ވަރަށް ދަތި ޙާލުގައި ރެފިއުޖީ ކޭމްޕްތަކުގައެވެ.
މި މައްސަލަ ތަޙުޤީޤުކުރި އދގެ މަންދޫބުން ބުނެފައިވަނީ މިޔަންމާ ސިފައިން ރޮހިންޔާ މުސްލިމުންނާ ދެކޮޅަށް އަސްކަރީ ޙަރަކާތްތައް ހިންގާފައިވަނީ އެދަރިފަސްކޮޅު ނައްތާލުމުގެ ބޭނުމުގައިކަމަށެވެ.