އީޔޫއިން އެމެރިކާއާއެކު ވިޔަފާރީގެ އެއްބަސްވުމެއް ޤާއިމްނުކޮށްފިނަމަ، އީޔޫއިން އެމެރިކާއަށް އެތެރެކުރާ ބައެއް ތަކެތިން ނަގާ ޓެރިފް ބޮޑުކުރާނެކަމުގެ އިންޒާރު އެމެރިކާގެ ރައީސް ޑޮނާލްޑް ޓްރަމްޕް ދެއްވައިފިއެވެ.
އީޔޫއިން އެތެރެކުރާ ބައެއް ތަކެތިން ނަގާ ޓެރިފް ބޮޑުކުރާނެކަމުގެ އިންޒާރު އެމެރިކާގެ ރައީސް ދެއްވާފައި މިވަނީ، ސުވިޓްޒަލެންޑުގެ ޑާވޯސްގައި ކުރިއަށްދާ، ވޯލްޑް އިކޮނޮމިކް ފޯރަމް ނުވަތަ ޑާވޯސް ސަމިޓުގެ ތެރެއިންނެވެ.
ދުނިޔޭގެ ބޮޑެތި ވިޔަފާރިވެރިންނާއި ބެންކުތަކުގެ އިސްވެރިންނާއި ޤައުމުތަކުގެ އިސްވެރިންގެ އިތުރުން ނޫސްވެރިން ހިމެނޭގޮތަށް ކުރިއަށްދާ ވޯލްޑް އިކޮނޮމިކް ފޯރަމް ނުވަތަ ޑާވޯސް ސަމިޓަކީ ދުނިޔޭގައި ހިނގާ ބޮޑެތި މައްސަލަތަކާ ގުޅޭގޮތުން މަޝްވަރާކޮށް ހައްލު ހޯދުމަށް ބާއްވާ އަހަރީ ބައްދަލުވުމެކެވެ.
އެމެރިކާގެ ރައީސް ޑޮނާލްޑް ޓްރަމްޕް ބައިވެރިވެޑައިގެންނަވާ ކޮންމެ ހަރަކާތެއްގައިވެސް ޓްރަމްޕަށް ބޮޑު ސަމާލުކަމެއް ލިބޭއިރު، މިފަހަރުގެ ޑާވޯސް ސަމިޓުގެ ތެރެއިންވެސް އެންމެ ބޮޑު ސަމާލުކަމެއް ލިބިވަޑައިގެންނެވީ ޓްރަމްޕަށެވެ. ޑާވޯސް ސަމިޓަކީ ގުޅިގެން މަސައްކަތްކޮށްެގެން ނަތީޖާ ނެރެން މަސައްކަތްކުރާ ސަމިޓަކަށްވާއިރު، ޓްރަމްޕް ދެއްވި ތަޤްރީރު ބިނާ ކުރެއްވީ ގުޅިގެން މަސައްކަތްކުރުމުގެ ބަދަލުގައި ޓްރަމްޕްގެ ވެރިކަމުގައި އެމެރިކާއަށް ލިބެމުންދާ ކުރިއެރުމުގެ މައްޗަށެވެ. އެއާއެކު ގިނަ ބަޔަކު ޓްރަމްޕްގެ ސިފަކުރެއްވީ މިއަހަރު އޮންނަ އެމެރިކާގެ ރިޔާސީ އިންތިޚާބަށް ކުރެއްވި ކެމްޕެއިނެއްގެ ގޮތުގައެވެ.
ދުނިޔެ ހޫނުވުމާއި ތިމާވެއްޓަށް ގެއްލުން ލިބެމުންދާކަމަށް މުޅި ދުނިޔެ ހެކިވާއިރު، ޓްރަމްޕްގެ ތަޤްރީރުގައި ވަނީ އެވާހަކަތަކާވެސް ދެކޮޅަށް ވާހަކަދައްކަވާފައެވެ. އެގޮތުން ތިމާވެށީގެ ރައްކާތެރިކަމާއި ހިމާޔަތަށް ގޮވާލާ ފަރާތްތަކުގެ ވާހަކަ އަޑު ނޭހުމަށްވެސް ޓްރަމްޕްގެ ތަޤްރީރުގައި ގޮވާލެއްވިއެވެ.
ސަމިޓުގެ ތެރެއިން ޓްރަމްޕް ވަނީ އީޔޫއަށްވެސް އިންޒާރުދެއްވާފައެވެ.
އެެމެރިކާގެ ޓެކްނޮލޮޖީ ކުންފުނިތަކުން ދޭ ޚިދުމަތްތަކުން ނަގާ ޓެކްސް ބޮޑުކުރުމަށް އީޔޫއިން މަސައްކަތްކުރަމުންދާތީ މީގެކުރިންވެސް ޓްރަމްޕް ވަނީ އީޔޫއިން އެތެރެކުރާ ބައެއް ތަކެތިން ނަގާ ޓެރިފް ބޮޑުކުރާނެކަމަށް ވިދާޅުވެފައެވެ. ނަމަވެސް ޑާވޯސް ސަމިޓުގެ ތެެރެއިން ޔޫރަޕިއަން ކޮމިޝަންގެ ވެރިޔާއާއެކު ބޭއްވި ބައްދަލުވުމަކަށްފަހު ޓްރަމްޕް ވިދާޅުވީ ވިޔަފާރީގެ އެއްބަސްވުމެއްގައި އީޔޫއިން ސޮއިނުކޮށްފިނަމަ އީޔޫއިން އެތެރެކުރާ ކާރުތަކާއި އެހެނިހެން ބައެއް ތަކެތިން ނަގާ ޓެރިފް 25 އިންސައްތަ ބޮޑުކުރާނެކަން ޔޫރަޕިއަން ކޮމިޝަންގެ ވެރިޔާއަށް ދަންނަވާފައިވާކަމަށެވެ. އަދި އެނޫން ގޮތެއް ނެތްކަމަށްވެސް ޓްރަމްޕް ވަނީ ވިދާޅުވެފައެވެ.
އަންގާރަދުވަހު ފެށި ޑާވޯސް ސަމިޓު މާދަމާގެ ނިޔަލަށް ކުރިއަށްދާއިރު، މި ސަމިޓުގެ ތެރެއިން މަތީ ފެންވަރުގެ ގިނަ ބައްދަލުވުންތަކެއް ކުރިއަށްދާނެއެވެ. އަދި އެބައްދަލުވުންތަކުގައި ދޭދޭ ޤައުމުތަކުގެ ގުޅުމާއި، ހައްލުކުރަންޖެހޭ ކަންކަމާއި، ގުޅިގެން މަސައްކަތްކުރުމާ ގުޅޭގޮތުންވެސް މަޝްވަރާކުރާނެއެވެ. އޭގެ ތެރެއިން ދުނިޔެ ހޫނުވުމުގެ ސަބަބުން ތިމާވެއްޓާއި އިޤްތިޞާދަށްކުރާ އަސަރުތައް ކުޑަކުރުމަށް މި ސަމިޓުގައި ފުޅާ ދާއިރާއެއްގައި ދަނީ މަޝްވަރާކުރަމުންނެވެ.