ޗައިނާގައި މިހާރު ފެތުރެމުންދާ ނޮވެލް ކޮރޯނާ ވައިރަސްގެ ސަބަބުން މަރުވި މީހުންގެ ޢަދަދު ނުވައަކަށް އަރައިފިއެވެ.
ނުރައްކާތެރި ނޮވެލް ކޮރޯނާ ވައިރަސް ފެތުރުން ހުއްޓުވުމަށް ޗައިނާގެ ކަމާބެހޭ އިދާރާތަކުންވަނީ ޙާއްސަ ފިޔަވަޅުތަކެއް އަޅަންފަށައިފައެވެ. މިދިޔަ އަހަރުގެ ފަހުކޮޅު ޗައިނާގެ ވުހާން ޕްރޮވިންސުން ފުރަތަމަ ފެނުނު ނޮވެލް ކޮރާނާ ވައިރަސް 440 މީހެއްގެ ގައިންވަނީ ފެނިފައެވެ. ގައިންގައިން ފެތުރޭ މިވައިރަސް ޖެހިގެން މިހާތަނަށް 9 މީހުންވަނީ މަރުވެފައެވެ.
ވައިރަސް ޖެހުނުކަމަށް ބެލެވޭ 2،739 މީހުންވަނީ ކަރަންޓީނުކޮށްފައެވެ. އަދި ފަރުވާ ދިނުމަށްފަހު މީގެ ތެރެއިން 817 މީހުން ވަނީ ދޫކޮށްލާފައެވެ. ނޮވެލް ކޮރޯނާ ވައިރަސް މިހާރުވަނީ އެހެން ޤައުމުތަކުންވެސް ފެންނަން ފަށައިފައެވެ. އެގޮތުން ތައިލޭންޑް، ދެކުނު ކޮރެއާ، ޖަޕާން، ޓައިވާން އަދި އެމެރިކާއިން މިވައިރަސް ޖެހިފައިވާ މީހުންވަނީ ފެނިފައެވެ.
ޗައިނާގެ ސިއްޙަތާބެހޭ އިދާރާތަކުންވަނީ ވައިރެސް ފެތުރުން ހުއްޓުވުމަށް އެކި ސިޔާސަތުތައް ތަންފީޒުކުރަން ފަށައިފައެވެ. އެގޮތުން، ގިނަ ބަޔަކު އެއްތަނަކަށް އެއްވާނެފަދަ ޙާލަތްތައް މަދުކުރުމާ ޖަނަވަރުފަދަ ތަކެތި އެއްތަނުން އަނެއްތަނަށް ގެންދިއުމުގައި ރައްކާތެރި ފިޔަވަޅުތައް އެޅުން ހިމެނެއެވެ. އެގޮތުން ވައިގެ ބަނދަރުތަކުން ބަލިޖެހިފައި ތިބި މީހުން ދެނެގަނެވޭނެފަދަ ނިޒާމުތައް ޤާއިމުކުރުމަށްވެސް ޗައިނާއިންދަނީ މަސައްކަތްކުރަމުންނެވެ.