މިދިޔަ 5 އަހަރު ދުވަހުގެ ތެރޭގައި އިންޑިއާގައި ތަކެތީގެ އަގުތައް މައްޗަށް ނުދާ މިންވަރަށް ތަކެތީގެ އަގުތައް މައްޗަށް ގޮސްފައިވާކަމަށް ތަފާސް ހިސާބުތަކުން ދައްކައިފިއެވެ.
އިންޑިއާގައި އިންފްލޭޝަން ނުވަތަ ތަކެތީގެ އަގުތައް މައްޗަށް ގޮސްފައިވާއިރު މީގެ މައިގަނޑު ސަބަބަކީ ކާބޯތަކެއްޗާއި ތެލުގެ އަގުތައް މައްޗަށްދިއުންކަމަށް ތަޖުރިބާކަރުން ބުނެއެވެ.
އިންޑިއާގެ ކަމާބެހޭ އިދާރާތަކުން ޢާއްމުކޮށްފައިވާ ތަފާސް ހިސާބުތައް ދައްކާގޮތުން މިދިޔަ ޑިސެމްބަރުމަހުގެ ނިޔަލަށް އިންޑިއާގެ އިންފްލޭޝަން ވަނީ 7.35 އިންސައްތަ މައްޗަށް ގޮސްފައެވެ. އަދި ކާބޯތަކެތީގެ އަގުތަކަށް ބަލާއިރު ޑިސެމްބަރުމަހު އިންފްލޭޝަން ވަނީ 14.1 އިންސައްތަ މައްޗަށް ގޮސްފައެވެ. އޭގެ ކުރީމަހު މިރޭޓް ހުރީ 10 އިންސައްތައިގައެވެ. ކާބޯތަކެތީގެ ތެރެއިން ތަރުކާރީގެ ބާވަތްތަކުގެ އަގު ވަރަށް ބޮޑަށް މައްޗަށް ގޮސްފައިވާއިރު، ޚާއްސަކޮށް ފިޔާގެ އަގު ވަނީ ވަރަށް ބޮޑުވެފައެވެ.
ކާބޯތަކެތީގެ އިތުރުން ތެލުގެ އަގުތަކަށް އަންނަ ބަދަލުތަކާއެކު އިންޑިއާގައިވެސް ވަނީ ތެލުގެ އަގުބޮޑުވެފައެވެ. އިންޑިއާއަކީ ދުނިޔޭގައި 3 ވަނައަށް އެންމެ ގިނައިން ތެޔޮ އިމްޕޯޓްކުރާ ޤައުމަށްވާއިރު، ތެލުގެ އަގަށް އަންނަ ބަދަލުތަކުގެ ސަބަބުން އެޤައުމުގެ އިޤްތިޞާދަށް ބޮޑު އަސަރެއް ކުރާނެކަމަށް ތަޖުރިބާކާރުން ބުނެއެވެ.
އިންޑިއާގެ ކަމާބެހޭ އިދާރާތަކުން ބުނާގޮތުން ތަރުކާރީއާއި ތެލުގެ އަގުތައް ތިރިނުވާނަމަ އިންޑިއާގެ އިންފްލޭޝަން ރޭޓް އަނެއްކާވެސް 6 ޕަސަންޓް މައްޗަށްދާނެއެވެ.
އިންޑިއާގައި ތަކެތީގެ އަގުތައް މައްޗަށް ގޮސް، އިންފްލޭޝަން މަތިވެފައިވާއިރު، މިއީ އެޤައުމުގެ އިޤްތިޞާދަށް މިހާރު ދިމާވެފައިވާ މައްސަލަތައް ޙައްލުކުރުމަށް އިތުރު ގޮންޖެހުންތަކެއް ކުރިމަތިވާނޭކަމެއްކަމަށް ތަޖުރިބާކާރުން ދެކެއެވެ.
އިންޑިއާގެ އިޤްތިޞާދަށް ކުރިމަތިވެފައިވާ މައްސަލަތައް ހައްލުކުރުމަށް ބޮޑުވަޒީރު މޯދީގެ ސަރުކާރުން މަސައްކަތްތަކެއް ކުރަމުންދާއިރު، ފެބްރުއަރީމަހުގެ 1 ވަނަ ދުވަހު ޤާނޫނު ހަދާ މަޖިލީހަށް ހުށަހަޅާ އެޤައުމުގެ ބަޖެޓްގައި މިކަންކަމަށް ހައްލުތަކެއް ހޯދުމުގެ މަސައްކަތް އިންޑިއާ ސަރުކާރުން ދަނީ ކުރަމުންނެވެ.