ބޭންކް އޮފް މޯލްޑިވްސްގެ އައު ޗީފް ރިސްކް އޮފިސަރގެ މަގާމަށް ގެރީ ލޯޓަން އަދި އިސްލާމިކް ބޭންކިންގ ޑައިރެކްޓަރގެ މަގާމަށް ސުރީ ހާނިމް މުޙައްމަދު ހަމަޖައްސައިފިއެވެ.
ބީއެމްއެލްއިން ބުނީ ބެންކުގެ އައު ޗީފް ރިސްކް އޮފިސަރގެ މަޤާމަށް އައްޔަންކުރެއްވި ގެރީ ލޯޓަން ކުރިން ހުންނެވީ އިންވެސްޓެކް ބޭންކް ލަންޑަންގެ ޗީފް ކްރެޑިޓް އޮފިސަރގެ މަގާމުގައިކަމަށެވެ. އަދި ގެރީ އަކީ ބޭންކިންގ އަދި ރިސްކް މެނޭޖްމަންޓް ދާއިރާއިން 20 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ ބޭފުޅަކަށްވާއިރު އޭނާ ވަނީ އިނގިރޭސިވިލާތް އަދި ސައުތު އެފްރިކާގެ އިންވެސްޓެކް ބޭންކްގެ އިސް މަގާމްތަކެއްވެސް ފުރުއްވާފައެވެ.
ބީއެމްއެލްގެ އިސްލާމިކް ބޭންކިންގ ޑައިރެކްޓަރގެ މަޤާމަށް އައްޔަންކުރެއްވި ސުރީ ހާނިމްއަކީ އިސްލާމިކް ބޭންކިންގެ ދާއިރާގައި އިސް މަގާމްތަކެއް ފުރުއްވައި، 19 އަހަރުގެ ތަޖުރިބާ ހޯއްދަވާފައިވާ ބޭކަނބަލެއްކަމަށް ބީއެމްއެލްއިން ބުނެއެވެ. އަދި އޭނާ ވަނީ ތަވާފުޤް ކޮންސަލްޓަންސީ އެސްޑީއެން ބީއެޗްޑީގައި ކޮންސަލްޓެންޓެއްގެ ގޮތުން މަސައްކަތްކުރައްވާފައެވެ. މީގެ އިތުރުން އޭނާއަކީ އެސޯސިއޭޝަން އޮފް އިސްލާމިކް އެންޑް ފައިނޭންޝަލް އިންސްޓިޓިއުޝަންސް މެލޭޝިއާ ގެ ޗީފް އެގްޒެކްޓިވް އޮފިސަރގެ މަޤާމާއި އެގްޒެކްޓިވް ޑިރެކްޓަރުގެ މަގާމްވެސް ފުރުއްވާފައިވާ ބޭކަނބަލެކެވެ.
ބީއެމްއެލްގެ އިސް މަޤާމްތަކަށް ބޭފުޅުން އައްޔަންކުރުމާ ގުޅޭގޮތުން ބީއެމްއެލްގެ ސީއީއޯ ޓިމް ސޯޔަރ ވިދާޅުވީ ހަރުދަނާކޮށް ރިސްކް ބެލެހެއްޓުމަަށް ބޭންކުން ވަރަށް މުހިންމު އިސްކަމެއް ދޭކަމަށެވެ. އަދި މިވޭތުވެދިޔަ އަހަރުތަކުގައި ބައިނަލްއަޤްވާމީ އުސޫލްތަކާ އެއްގޮތަށް ރިސްކް ބެލެހެއްޓުމަށް މުހިންމު ފިޔަވަޅުތަކެއް އަޅާފައިވާކަންވެސް އޭނާ ފާހަގަކުރެއްވިއެވެ. އަދި އައު ޗީފް ރިސްކް އޮފިސަރގެ މަޤާމަށް އައްޔަންކުރެއްވި ގެރީ ފަދަ ތަޖުރިބާކާރު ބޭފުޅަކާއެކު އަޅުގަނޑުމެންގެ ރިސްކް ބެލެހެއްޓުން އިތުރަށް ހަރުދަނާ ކުރެވިގެންދާނެކަމަށްވެސް އޭނާ ވިދާޅުވިއެވެ.
އިސްލާމިކް ބޭންކިންގ ޑައިރެކްޓަރގެ މަޤާމަށް ބޭފުޅަކު އައްޔަންކުރުމާ ގުޅޭގޮތުން ބީއެމްއެލްގެ ސީއީއޯ ވިދާޅުވީ ބީއެމްއެލްއިން މިއަހަރުތެރޭ އިސްލާމިކް ބޭންކިންގެ ޚިދުމަތް އިތުރަށް ފުޅާކުރުމަކީ އަމާޒެއްކަމަށެވެ. އަދި އުއްމީދަކީ އިސްލާމިކް ބޭންކިންގ ޑައިރެކްޓަރގެ މަޤާމަށް އައްޔަންކުރެއްވި ސުރީގެ ބައިނަލްއަޤްވާމީ ތަޖުރިބާއާއެކު ކުރިއަރަމުންދާ އިސްލާމިކް ބޭންކިންގ ޚިދުމަތް އިތުރު ހަރުފަތަކަށް ގެންދިއުންކަމަށް ސޯޔަރ ވިދާޅުވިއެވެ.
ބޭންކް އޮފް މޯލްޑިވްސްއަކީ ރާއްޖޭގެ އެންމެ ބޮޑު ބޭންކުގެ އިތުރުން ދިވެހިންނަށް އެންމެ ގިނައިން ވަޒީފާ ދެމުންގެންދާ އެއް ކުންފުންޏެވެ. ބޭންކުގެ 99 އިންސައްތަ މުވައްޒަފުންނަކީ ދިވެހިންނެވެ. ބޭންކުން ދަނީ މުވައްޒަފުންނާ ގުޅޭ ގޮތުން އެންމެ ކުރިއަރާފައިވާ ސިޔާސަތުތައް އެކުލަވާލަމުންނެވެ.