ގަލްފުގެ އަރަބި ޤައުމެއްކަމަށްވާ އޮމާންގެ ރަސްގެފާނު ޤާބޫސް ބިން ސަޢީދު އަވަހާރަވެއްޖެއެވެ. އޮމާންގެ ރަސްކަމުގެ ދީވާނުން ބުނީ އުމުރުފުޅުން 79 އަހަރުގައި ޤާބޫސް ރަސްގެފާނު އަވަހާރަވީ އާލާސްކަންފުޅުގައި އުޅުއްވުމަށްފަހުކަމަށާ އޭނާގެ ޖަނާޒާ މިއަދު ބާއްވާނެކަމަށެވެ.
1940ވަނަ އަހަރުގެ ނޮވެމްބަރު މަހުގެ 28ވަނަ ދުވަހު ދުނިޔޭގެ އަލިކަންދެކެވަޑައިގެންނެވި ޤާބޫސް ބިން ސަޢީދު އަލް ސަޢީދު އޮމާންގެ ރަސްކަމަށް އިސްވެވަޑައިގެންފައިވަނީ 1970ވަނަ އަހަރުގެ ޖުލައިމަހުގެ 23ވަނަ ދުވަހު ލޭ އޮހޮރުވުމެއްނެތް އިންޤިލާބެއްގައި އޭނާގެ ބައްޕަ ސުލްތާން ސަޢީދު ބިން ތައިމޫރު ވެރިކަމުން ދުރުކުރުމަށްފަހުއެވެ. ޤާބޫސް އަވަހާރަވެފައިމިވަނީ އޭނާގެ ރަސްކަމަށް 50އަހަރު ފުރެން ގާތްވެފައިވަނިކޮށެވެ.
ޤާބޫސް އަވަހާރަވުމާއެކު އޮމާނުންވަނީ 3 ދުވަހުގެ ޤައުމީ ހިތާމަ އިޢުލާންކޮށްފައެވެ. އޮމާންގެ ރަސްކަމުގެ ދީވާނުން ބުނެފައިވަނީ 3 ދުވަހުގެ ޤައުމީ ހިތާމަ އިޢުލާންކޮށްފައިވާއިރު 40 ދުވަސްވަންދެން ރަސްމީ ދިދަ ހުންނާނީ ބައިދަނޑިއަށް ތިރިކޮށްފައިކަމަށެވެ.
ޤާބޫސް ރަސްގެފާނުގެ ހަށިކޮޅު ފަސްދާނުލުމަށް ހަމަޖެހިފައިވަނީ މިއަދުގެ ވަގުތެއްގައެވެ. ޖަނާޒާގެ ޤާފިލާ ދާނީ ޤާބޫސްގެ ގަނޑުވަރުކަމަށްވާ ބައިތުލް ބަރަކާ ގަނޑުވަރުން ސުލްތާނުލްއަކްބަރު މިސްކިތަށެވެ. އެ މިސްކިތުގައި ޤާބޫސް ރަސްގެފާނުގެ މައްޗަށް ކަށުނަމާދު ކުރުމަށްފަހު ފަސްދާނުލުމަށް ހަމަޖެހިފައިވަނީ ޝާހީ އާއިލާގެ ޤަބުރުސްތާނުގައިކަމަށް އޮމާންގެ ރަސްމީ ނޫސް އެޖެންސީ ބުނެއެވެ.
ޤާބޫސް ރަސްގެފާނަކީ ފަހުގެ ތާރީޚެއްގައި ޢަރަބިންގެ ތެރެއިން އެންމެ ދިގުމުއްދަތަކަށް ރަސްކަމުގައި ދެމިހުންނެވި ރަސްގެފާނެވެ. ޤާބޫސް ރަސްގެފާނަކީ އޭނާގެ ރަސްކަމުގައި އޮމާނަށް ބޮޑެތި ކުރިއެރުންތަކެއް ގެނެސްދެއްވި ބޭފުޅެކެވެ. ޤާބޫސްގެ ރަސްކަމުގައި އޮމާނުން ގެންގުޅެފައިވަނީ ހުރިހާ ޤައުމުތަކާވެސް ގާތްގުޅުންތަކެއް ބޭއްވުމުގެ ސިޔާސަތެކެވެ. ޢަރަބި ޤައުމުތަކުގައި ހިނގާ ދާޚިލީ ހަނގުރާމަތަކާއި ޢަރަބީންގެ މެދުގައި އޮންނަ ފިތުނަތަކުގެ ތެރެއަށް އޭނާގެ ވެރިކަމުގައި އޮމާނުން ވަދެފައިނުވާއިރު އަވަށްޓެރި އީރާނާއެކުވެސް ޤާބޫސްގެ ވެރިކަމުގައި އޮމާނުން ވަނީ ގާތްގުޅުންތަކެއް ބާއްވާފައެވެ.