ޔޫކްރެއިންގެ މަތިންދާބޯޓު ވެއްޓުނީ ގަސްތަކާނުލާ އީރާނު ސިފައިން ދިން ޙަމަލާއަކުންކަމަށް އީރާނުގެ ރައީސް ޙަސަން ރޫޙާނީ ވިދާޅުވެއްޖެ.
ރޫޙާނީ ވިދާޅުވީ އެއީ އީރާން ސިފައިންނަށް އެރި އޮޅުމެއްގެ ސަބަބުން މެދިވެރިވި ހިތާމަވެރި ހާދިޘާއެއްކަމަށާ އެކަން ކަށަވަރުވީ ޔުކްރެއިންގެ ބޯޓު ވެއްޓުނު ހާދިޘާއާ ގުޅޭގޮތުން އީރާން ސިފައިން ހިންގި ޚާއްސަ ތަޙްޤީޤަކުން ކަމަށެވެ. ޔުކްރެއިންގެ ޤައުމީ އެއަރލައިނަށް ނިސްބަތްވާ ބޮއެންގް 737 މަރުކާގެ ބޯޓަށް އޮޅިގެން ޙަމަލާދެވުނީ އީރާނުގެ ސަރަޙައްދީ ރޮނގު ކައިރީގައި އެމެރިކާގެ އަސްކަރީ މަތިންދާބޯޓުތައް މާ ގިނައިން ޙަރަކާތްތެރިވަމުން ދިޔުމާއެކު ރާޑަރުގެ ޙަރަކާތްތައް އާދަޔާޚިލާފަށް ގިނަވެ، އެރި އޮޅުމެއްގެ ސަބަބުންކަމަށްވެސް ރޫޙާނީ ވިދާޅުވިއެވެ.
މިދިޔަ ހަފުތާގެ ބުދަދުވަހު ތެހެރާންގެ އިމާމް ޚުމެއިނީ އިންޓަރނޭޝަނަލް އެއަރޕޯޓުން ފުރައިގެން ޔުކްރެއިނަށް ދަތުރުކުރީ 752 ނަންބަރު ފްލައިޓް ވެއްޓިފައިވަނީ އެ ބޯޓު ރަންވޭން ނައްޓާލިތާ ކުޑައިރުކޮޅެއްގެ ތެރޭގައެވެ. އެ ބޯޓުން ދަތުކުރި 176 މީހުން އެ ޙާދިޘާގައިވަނީ މަރުވެފައެވެ. މަރުވި މީހުންގެ ތެރޭގައި ގިނައީ އީރާނާއި ކެނެޑާގެ ރައްޔިތުންނެވެ. އެ ދެ ޤައުމުންވަނީ އެ ބޯޓު ވެއްޓުނީ އީރާނުގެ މިސައިލެއް އެރުމުގެ ސަބަބުންކަމަށް ވުމަކީ އެކަށީގެންވާ ކަމެއްކަމަށް ކުރިން ބުނެފައެވެ. ނަމަވެސް އީރާނުން ކުރިންވަނީ އެކަން ދޮގުކޮށްފައެވެ.
އީރާނުގެ ސިފައިން މިއަދުވަނީ ޔުކްރެއިންގެ ބޯޓު ވެއްޓުނީ އެ ޤައުމުގެ ސިފައިންނަށް އޮޅުމަކުން ދެވުނު ޙަމަލާއަކުންކަމަށް އެއްބަސްވެ، އެކަމާމެދު ހިތާމަކުރާކަމަށް ބުނެ ބަޔާނެއް ނެރެފައެވެ. އެ ބަޔާނުގައި އެ ބޯޓު ވައްޓާލުމުގެ ޙާދިޘާއާ ގުޅުންހުރި ފަރާތްތަކުގެ މައްޗަށް ތަޙްޤީޤް ހިންގައި އިހުމާލުގެ މައްސަލާގައި އެމީހުންގެ މައްޗަށް ޝަރީއަތްކުރާނެކަމަށް ބުނެފައިވެއެވެ.