ކުރިއަށް އޮތް މަދު އަހަރުތަކެއްގައި ދެކުނު އޭޝިއާގައި ދެވަނައަށް އެންމެ އާބާދީ ބޮޑު ޤައުމުކަމަށްވާ ޕާކިސްތާނު ފެނަށް ޖެހިދާނެކަމުގެ ބިރުވެރިކަން އުފެދިއްޖެއެވެ.
2019ވަނަ އަހަރަކީ ޕާކިސްތާނަށް ހަނަފަސްކަމާއި އެކަށީގެންވާ މިންވަރަށް ފެން ނުލިބުމުގެ މައްސަލަތަކާ ކުރިމަތިލާން ޖެހުނު އަހަރެކެވެ. މިކަމަށް ޕާކިސްތާނު ސަރުކާރުން އެކަށީގެންވާ ފިޔަވަޅުތަކެއް އަޅާފައިވާ މަންޒަރެއް ނުފެނެއެވެ. ބަދަލުގައި ފެނިފައިވަނީ ސިޔާސީ ހަމަނުޖެހުންތަކެއްގައި ތާށިވެ، އަވަށްޓެރި ޤައުމުތަކާއި އޮންނަ ގުޅުން ހީނަރުވެ، އެ ޤައުމުގައި ދިރިއުޅޭ 212 މިލިއަން މީހުންނަށް ބޮޑެތި އުނދަގޫތަކަކާ ކުރިމަތިލާންޖެހި، ޒަރޫރީ ބޭނުންތައް ފުއްދުމުގައި ދަތިވެފައިވާ މަންޒަރެވެ.
ޢާންމު ރައްޔިތުންނަށް ފެންފޯރުކޮށްދިނުމަށް އެކަށީގެންވާ ހަރުދަނާ އިންތިޒާމުތަކެއް އެކުލަވާލުމަށް ބައިނަލްއަޤްވާމީ ޖަމްޢިއްޔާ ޖަމާޢަތްތަކުން ސަމާލުވުމަށް ޕާކިސްތާނަށް ނަސޭޙަތްތެރިވި ނަމަވެސް އެކަށީގެންވާ މަސައްކަތްތަކެއްކޮށްފައެއް ނުވެއެވެ.
ޕާކިސްތާނުގައި އަހަރު ލިބެން ހުންނަ ފެނުގެ ނިސްބަތަކީ ބޮލަކަށް އެއްހާސް ކިއުބިކް މީޓަރުގެ ފެނެވެ. މި މިންވަރުގެ ފެންފޮދަކުން ސުވިމިންޕޫލެއްގެ ފެންވެސް މީހަކަށް ނުޖެހެއެވެ. މިއީ ފެންވެރުމާއި ބުއިމަށާއި އެހެން ބޭނުންތަކަށްވެސް ބޭނުންކުރަން ބޮލަކަށް ޖެހޭ ފެނުގެ މިންވަރެވެ.
ޕާކިސްތާނުގެ ބިމު އަޑީގައިވާ ފެނުގެ ބޮޑު ބަޔަކީ އިންޑަސް ކޯރުގެ ބޭސިނުން ފޭދިގެން އަންނަ ފެންކަމަށް ސައިންސްވެރިން ބުނެއެވެ. އެހެންކަމުން، މިފެން މުޅި ޕާކިސްތާނަށް ބެހިގެންދާނެފަދަ އިންތިޒާމްތަކެއް ނެތުމުން މުޅި ޤައުމަށް ފެން ފޯރުވުމުގައިވަނީ ދަތިތަކެއް ކުރިމަތިވެފައެވެ. އަދި ބިމު އަޑީގައިވާ ފެނުގެ ބޮޑު ބައި ނަގައިގެން ދަނޑުވެރިކަމުގައި ބޭނުންކުރުމުން، ބުއިމަށާއި ޒަރޫރީ ބޭނުންތައް ފުއްދުމަށް ސާފު ބޯފެން ހޯދުން ބައެއް ސަރަޙައްދުތަކުގައިވަނީ ދަތިކަމަކަށް ވެފައެވެ.
ރެކޯޑްތައް ދައްކާ ގޮތުން ޕާކިސްތާނުގައި މިހާރު ރައްކާކުރެވެނީ 30 ދުވަހުގެ ފެނެވެ. ނަމަވެސް، ޕާކިސްތާނުފަދަ އާބާދީ ބޮޑު ޤައުމެއްގައި 1،000 ދުވަހުގެ ފެން ރައްކާކުރެވޭނެ އިންތިޒާމް ހުންނަން ޖެހޭނެކަމަށް އިންޓަރނޭޝަނަލް އިންސްޓިޓިއުޓް އޮފް ސަސްޓެއިނަބަލް ޑިވެލޮޕްމަންޓްފަދަ އިދާރާތަކުން ބުނެއެވެ. އެހެންކަމުން، މިއީ ކުރިއަށް އޮތް ދުވަސްތަކުގައި ޕާކިސްތާނުން ނުވިސްނައިފިނަމަ އޭގެ ނަތީޖާ ވަރަށް ގޯސްވާނެ އެއް މައްސަލައެވެ.
އިތުރުވަމުންދާ އާބާދީއާ އެއްވަރަށް ކާބޯތަކެތި އުފެއްދުމަށް ފެނަށް ބޭނުންވާ މިންވަރު ކުރިއަށް އޮތް މަދު އަހަރުތަކެއްގެ ތެރޭގައި އިތުރުވާނެއެވެ. އެހެންކަމުން، ފެނަށް ޖެހި ކާބޯތަކެތި ނުހެއްދިއްޖެނަމަ ފެނުގެ އިތުރުން ކާއެއްޗެއްސަށްވެސް ޖެހި، ބަނޑުހައިހޫނުކަމުގައި އެތައް މިލިއަން ބަޔަކު ތިބެން ޖެހެދާނެކަމުގެ ބިރުވެސް އެބައޮތެވެ.
ފެނުގެ މައްސަލަ ހައްލުކުރުމުގެ ބަދަލުގައި ޕާކިސްތާނުން މަސައްކަތްކުރަނީ ސިޔާސީ ކުޅިވަރެއް ކުޅުމަށެވެ. އިންޑަސް ވޯޓަރ ޓްރީޓީގެ ދަށުން ޕާކިސްތާނުގެ ތެރެއަށް ކޯރު ފެން ދޫކުރުމަށް އިންޑިއާއިން އެއްބަސްވެ، އެގޮތަށް އަމަލުކުރަމުން ދިޔަނަމަވެސް، ދެ ޤައުމުގެ މެދުގައި އުފެދިފައިވާ ނުތަނަވަސްކަމުގައި ޕާކިސްތާނުންދަނީ އެ މުއާހަދާގައި ބަޔާންކުރާ މާއްދާތައް ސިޔާސީ ކުރަމުންނެވެ. އެގޮތުން ޕާކިސްތާނަށް ފެން ފޯރުކޮށްދިނުމަށް އިންޑިއާއިން ހުރަސް އަޅާކަމަށް ބުނެ، ސިޔާސީ ވާހަކަތަކެއް ދެއްކި ނަމަވެސް ހަޤީޤީ މައްސަލަ ޙައްލުކުރުމަށް މަސައްކަތްކުރާ ތަނެއް ނުފެނެއެވެ. މިމައްސަލަ ޙައްލުނުކޮށްފިނަމަ، ފެނަށް ޖެހި، ކައިރި މުސްތަޤްބަލެއްގައި އެ ޤައުމަށް އިންސާނީ ބޮޑު ކާރިސާއަކާ ކުރިމަތިލުމުގެ ފުރުޞަތު ބޮޑެވެ.