ޓެރަރިޒަމާއި ހަރުކަށި ފިކުރުގެ މައްސަލަ ޙައްލުކުރުމަށް ސަރުކާރުން ކުރައްވަމުންދާ މަސައްކަތް ވަރަށް ކާމިޔާބުކަމަށާ، އެކަމުގެ ނަތީޖާ ފެންނަމުންދާކަމަށް ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީ ވިދާޅުވެއްޖެއެވެ.
ޕީއެސްއެމް ނިއުސްގެ އެކްސްކްލޫސިވް ޕްރޮގްރާމުގައި ވާހަކަފުޅުދައްކަވަމުން މިނިސްޓަރ ވިދާޅުވީ މިމައްސަލާގައި ސަރުކާރުން އެންމެބޮޑަށް ބޭނުންވީ ސަރުކާރުގެ ވިސްނުމަކީ ކޮބައިކަން ރައްޔިތުންނަށް އެންގުންކަމަށެވެ. އެއާއެކު މިމައްސަލައިގެ ބޮޑުކަމާއި މީގެ ނުރައްކާތެރިކަން އަދި ހަރުކަށި ފިކުރުން ސަލާމަތްވުމަކީ ޤައުމުގެ އިސްތިޤުލާލާއި ހަމަޖެހުމަށް ކިހާ މުހިންމުކަމެއްކަން ސަރުކާރުން ރައްޔިތުންނަށް ހާމަކުރެއްވިކަމަށް މިނިސްތަރ ވިދާޅުވިއެވެ.
އަދި އޭގެ ނަތީޖާއަކަށްވީ ރައްޔިތުން ނުކުމެ ސަރުކާރަށް އެއްބާރުލުންދީ ސަރުކާރުގެ އަތުގައި ހިފުންކަމަށާ، ރައްޔިތުންގެ އެއްބާލުން ވަރަށްބޮޑަށް ލިބެމުންދާކަމަށެވެ. އަދި ހަރުކަށި ފިކުރުގެ ސަބަބުން މުޖުތަމަޢުގެ އަމާންކަން ގެއްލި އަންހެނުންނާއި ކުޑަކުދިންނަށް ނިކަމެތިކަން ލިބޭގޮތަށް ރާއްޖޭގައި ކަންކަން ވެގެންދާތަން ބަލަން ތިބެން ރައްޔިތުން ބޭނުން ނުވާކަމަށް މިނިސްޓަރ މާރިޔާ ވިދާޅުވިއެވެ.
ހަރުކަށި ފިކުރާ ދެކޮޅަށް ސަރުކާރުން ކުރައްވާ މައްސަކަތުގައި ދީނީ ޢިލްމުވެރިންގެ އެހީތެރިކަމާއި އެއްބާރުލެއްވުންވެސް ވަރަށްބޮޑަށް ލިބިވަޑައިގަންނަވާކަމަށް މިނިސްޓަރ ވިދާޅުވިއެވެ. އަދި ދީނީ ޢިލްމުވެރިންވެސް ތިއްބެވީ ސަރުކާރާއެކުކަމަށާ، ހަރުކަށިފިކުރާއި އެފިކުރުގެ ސަބަބުން މުޖުތަމަޢަށް ކުރިމަތިވަމުންދާ ނިކަމެތިކަން ހުއްޓުވުމަށް ޢިލްމުވެރިންވެސް ސަރުކާރާ ގުޅިގެން މަސައްކަތްޕުޅުކުރައްވާކަމަށް ޑިފެންސް މިނިސްޓަރ ވިދާޅުވިއެވެ.
ކަރުކަށިފިކުރުގެ މީހުންގެ ނުރައްކާތެރިކަން އެއްވެސް މިންވަރަށް ފާހަގަވާ ކަމެއް އެނގޭނަމަ އެކަމެއްގެ މަޢުލޫމާތު ކަމާބެހޭ ފަރާތްތަތަކާ ޙިއްސާކުރުމަށް މިނިސްޓަރ މާރިޔާ ވަނީ ޢާއްމު ރައްޔިތުންނަށް އިލްތިމާސްކުރައްވާފައެވެ.