ރައީސުލްޖުމުހޫރިއްޔާ އިބުރާހިމް މުހައްމަދު ޞާލިހަށް ސަރުކާރުގެ ހުރިހާ ވަޒީރުންނާއި މެދުވެސް ފުރިހަމައަށް އިތުބާރު އެބައޮތް ކަމުގައި ރައީސްގެ ތަރުޖަމާނު އަދި ރައީސުލްޖުމްހޫރިއްޔާގެ އޮފީހުގެ ޗީފް ކޮމިއުނިކޭޝަން ސްޓްރެޓެޖިސްޓް އިބްރާހީމް ހޫދު ވިދާޅުވެއްޖެއެވެ.
ފާއިތުވި އެއް އަހަރު ދުވަހުގެ ތެރޭގައި ސަރުކާރުން ކުރިޔަށް ގެންދިޔަ ކަންކަމާއި ގުޅޭ ގޮތުން މައުލޫމާތު ދިނުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލު ޕީއެސްއެމްއިން ދެންނެވި ސުވާލަށް ޖަވާބު ދެއްވަމުން ހޫދު ވިދާޅުވީ، ރައްޔިތުންގެ މަޖިލީހަކީ ރަބަރސްޓޭމްޕް ޖަހާތަނަކަށް ނުވުމަކީ ސަރުކާރުން އުފާކުރާ ކަމެއް ކަމަށެވެ.
ހޫދު ވިދާޅުވީ، ވަޒީރުންނާއި މެދު ސަރުކާރަށް ފުރިހަމަ އިތުބާރި އެބައޮތް ކަމަށާއި ރައީސަށްވެސް އިތުބާރު އެބަ އޮތް ކަމަށެވެ.
" ވަޒީރުންނާއި މެދު ސަރުކާރުގެ ފުރިހަމަ ކޮންފިޑެންސް އެބައޮތް. ރައީސްގެ ފުރިހަމަ ކޮންފިޑެންސް ހުރިހާ ވަޒީރުންނާއި މެދު އެބައޮތް. އެބޭފުޅުންގެ މަސައްކަތްތައްވެސް ރަނގަޅުކަމަށް ފެންނަނީ" ހޫދު ވިދާޅުވިއެވެ.
ހަރުކަށި ދީނީ ފިކުރުގެ ނުރައްކާ ބޮޑުވެެ އެކަމުގެ ކަންބޮޑުވުންތައް އުފެދިފައިވާ ދަނޑިވަޅެއްގައި، އެމްޑީޕީގެ ބިލަތްދޫ ދާއިރާގެ މެމްބަރު އަހުމަދު ހަލީމް ވަނީ، މިނިސްޓަރ އޮފް އިސްލާމިކް އެފެއާޒް، ޑރ. އަހްމަދު ޒާހިރުގެ އިސްތިއުފާއަށް ގޮވާލައްވައި، އަދި އިސްތިއުފާ ނުދެއްވައިފިނަމަ މަޤާމުން ވަކިކުރުމަށްޓަކައި އިތުބާރު ނެތްކަމުގެ ވޯޓު ނެގުމަށް މަޖިލީހަށް މައްސަލަ ހުށައަޅުއްވާނެ ކަމުގައިވެސް ވިދާޅުވެފައެވެ.
އިސްލާމިކް މިނިސްޓަރުގެ އިތުބާރު ނެތްކަމުގެ މައްސަަލަ މަޖިލިސްއަށް ވައްދައި އެމައްސަލަ ކުރިއަށް ގެންދިޔުމުގައި އިސްވެ މަސައްކަތް ކުރައްވާނީ އޭނާ ކަމުގައި، ބިލަތްދޫ ދާއިރާގެ މެމްބަރު އަހުމަދު ހަލީމް ރޭ ކުރެއްވި ޓުވީޓެއްގައި ވިދާޅުވެފައި ވެއެވެ.
ރައްުޔިތުންގެ މަޖިލީހުގައި އެމްޑީޕީގެ ސާފު އަޣުލަބިއްޔަތު އޮންނައިރު، އެޕާޓީ ތަމްސީލް ކުރައްވާ 65 މެމްބަރުން ތިއްބަވައެވެ.
އިސްލާމިކް މިނިސްޓަރު އިސްތިއުފާ ނުދެއްވައިފިނަމަ، މަޖިލީހަށް ހުށައަޅައިގެން ވިޔަސް މަޤާމުން ވަކިކުރައްވާނެ ކަމުގައި މެމްބަރު އަހުމަދު ހަލީމް ވިދާޅުވެފައި ވީނަމަވެސް، އެކަމާއި ގުޅޭ ގޮތުން އެމްޑީޕީގެ ޕާލަމެންޓްރީ ގުރޫޕުން އެއްޗެއް ބުނެފައެއް ނުވެއެވެ.
އިސްލާމިކް މިނިސްޓަރުގެ އިތުބާރު ނެތްކަމުގެ މައްސަަލަ މަޖިލީހުގެ އައު ދައުރަށް ހުށައަޅާނެ ކަމަށް އެމްޑީޕީގެ މެމްބަރު އަހުމަދު ހަލީމް ވިދާޅުވެފައި ވާއިރު، މިސަރުކާރުގެ އެއްވެސް ވަޒީރެއްގެ މައްޗަށް އިތުބާރުނެތްކަމުގެ މައްސަލައެއް އަދި ހުށައަޅާފައެއް ނުވެއެވެ.