އެމެރިކާގެ ރައީސް ޑޮނަލްޑް ޓްރަމްޕް މަޤާމުން ވަކިކުރަން އެ ޤައުމުގެ ތިރިގެ، ހައުސް އިފް ރިޕްރެޒެންޓޭޓިވްސުން ފާސްކޮށްފިއެވެ. ރައީސްކަމުގެ މަޤާމުން ޓްރަމްޕް ވަކިކުރަން ވޯޓުލާފައިވަނީ ތިރިގޭގެ ޖުޑީޝަރީ ކޮމިޓީން ކުރި ތަޙުޤީޤަކަށް އޭނާ މަޤާމުންދުރުކުރަންޖެހޭފަދަ ކަންތައްތަކެއް ހިންގަވާފައިވާކަމަށް އެ ކޮމިޓީއަށް ސާބިތުވުމުންނެވެ.
ޑިމޮކްރޭޓިކުންގެ އަޣުލަބިއްޔަތު އޮންނަ ތިރިގެއިން ޓްރަމްޕް މަޤާމުން ވަކިކުރަން ނެގި ވޯޓުނަގާފައިވަނީ ދެ ބަޔަކަށް ބަހާލައިގެންނެވެ. ވެރިކަމުގެ ބާރުތައް ނަހަމަގޮތުގައި ބޭނުންކުރުމުގެ ތުޙުމަތުގައާއި ޤާނޫނުހަދާ މަޖިލީހުގެ މަސްޢޫލިއްޔަތުތަކަށް ޓްރަމްޕް ހުރަސްއެޅުއްވިކަމުގެ ތުޙުމަތުގައި ވަކިވަކި ވޯޓު ވަނީ ނަގާފައެވެ.
އެގޮތުން، ވެރިކަމުގެ ބާރުތައް ނަހަމަގޮތުގައި ބޭނުންކުރެއްވިކަމަށް 230 މެންބަރުން ވޯޓުވެއްވިއިރު، ދެކޮޅަށް ވޯޓުދެއްވީ 197 މެންބަރުންނެވެ. އަދި ޤާނޫނުހަދާ މަޖިލީހުގެ މަސްޢޫލިއްޔަތުތަކަށް ހުރަސްއެޅުއްވިކަމަށް 229 މެންބަރުން ވޯޓުދެއްވިއިރު، ދެކޮޅަށް ވޯޓުދެއްވީ 198 މެންބަރުންނެވެ.
ޓްރަމްޕް ނިސްބަތްވެވަޑައިގަންނަވާ ރިޕަބްލިކަން ޕާޓީގެ އެއްވެސް މެންބަރެއް މައްސަަލަތަކާއި އެއްކޮޅަށް ވޯޓުދެއްވާފައިނުވއިރު ޑިމޮކްރެޓިކް ޕާޓީގެ ދެ މެންބަރުން ދެކޮޅަށް ވޯޓުދެއްވިއެވެ.
ރައީސް ޓްރަމްޕް މަޤާމުން ދުރުކުރުމުގެ މަސައްކަތް ފެށިގެންދިޔައީ އޭނާ ޔޫކްރެއިންގެ ރައީސް ވޮލޮޑިމީރް ޒެލެންސްކީއަށް ކުރެއްވި ފޯނުކޯލެއްގެ މައްސަލައިގައެވެ. އެ ފޯނުކޯލުގައި ރައީސް ޓްރަމްޕް ޒެލެންސްކީގެ ކިބައިން އެދިވަޑައިގަތްކަމަށް ތުޙުމަތުކުރެވިފައިވަނީ އޭނާއާއި ސިޔާސީ ގޮތުން ވާދަވެރި ޑިމޮކްރަޓިކް ޕާޓީގެ ޖޯ ބައިޑަންއާމެދު ތަޙުޤީޤެއް ހިންގައިދިނުމަށެވެ.
ބައިޑަންއަކީ 2020ވަނަ އަހަރުގެ ރިޔާސީ އިންތިޚާބުގައި ޓްރަމްޕަށް އެންމެ ބޮޑު ގޮންޖެހުމެއް ކުރިމަތިކުރުވަފާނެކަމަށް ބެލެވޭ ބޭފުޅާއެވެ. ބައިޑަންއާއި އޭނާގެ ފިރިހެން ދަރިފުޅު ހަންޓަރ ބައިޑަން ޔޫކްރެއިންގެ ހަކަތައާބެހޭ ކުންފުނީގައި ހިންގާފައިވާ ވިޔަފާރީގެ މުޢާމަލާތުތަކެއް ތަޙުޤީޤުކުރަން ޓްރަމްޕް ބޭނުންފުޅުވުމުގެ ފަހަތުގައިވަނީ ސިޔާސީ ފައިދާނެގުންކަމަށް ގިނަބަޔަކު ތުޙުމަތުކުރިއެވެ.
އެމެރިކާގެ ޤާނޫނު ބުނާ ގޮތުން، އެމެރިކާގައި ވެރިކަންކުރައްވާ ރައީސަކު މަޤާމުން ދުރުކުރުމަށް ކޮންގްރެސްގެ ތިރިގެއިން ފުރަތަމަ ރައީސާ ގުޅުން ހުރި މައްސަލައެއް ބެލުމަށްފަހު ރައީސްގެ މައްޗަށް ދަޢުވާ ކުރުމުން، އެ މައްސަލައިގެ ޝަރީއަތަށް ކޮންގްރެސްގެ މަތިގެކަމަށްވާ ސެނެޓަށް ހުށަހަޅާނީއެވެ. ރައީސް މަޤާމުން ދުރުކުރެވޭނީ ތިރިގެއިން ހުށަހެޅި ދަޢުވާތައް ސާބިތުވާކަމަށް 100 މެންބަރުން ހިމެނޭ ސެނެޓުގެ 67 މެންބަރުން ވޯޓު ދެއްވުމުންނެވެ.
ރައީސަކު މަޤާމުން ވަކިކުރުމުގެ މައްސަލައެއް އެމެރިކާގެ ތާރީޚުގައި އުފެދުނު މިއީ 3ވަނަ ފަހަރެވެ. މީގެކުރީން 1998ގައި ބިލް ކްލިންޓަން މަޤާމުން ވަކިކުރަން ފާސްކުރިއިރު، 1868ގައި ރައީސް އެންޑްރޫ ޖޯންސަން ވަކިކުރުމަށްވެސް ވަނީ ފާސްކޮށްފައެވެ.
ތިރިގެއިން ޓްރަމްޕް ވަކިކުރަން ފާސްވި ނަމަވެސް އޭނާ އަދި މަޤާމުން ދުރެއްނުވާނެއެވެ. މީގެކުރިން ދެ ފަހަރުވެސް ސެނެޓުން ނިންމާފައިވަނީ ކްލިންޓަންއާއި ޖޯންސަން ވަކިނުވާނެކަމަށެވެ.