ރައްޔިތުންނަށް ތަނަވަސްކަން ލިބޭނީ ހުޅުވާލެވިފައިވާ މާހައުލެއްގައި މަސައްކަތް ކުރެވޭނެ ފުރުޞަތު ތަނަވަސް ވެގެންކަމުގައި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ކައުންސިލަރުންނަށް ޚާއްސަކޮށްގެން "ވިއަވަތި ރާއްޖެ" ނަމުގައި ބޭއްވި ޚާއްސަ ސެމިނާ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ރައީސް، މުޙައްމަދު ނަޝީދު ވިދާޅުވީ ރައްޔިތުންބޭނުންވާ ތަރައްޤީ ގެނެވޭނީ ބާރުތައް ދޫކޮށްލައިގެން ކަމަށެވެ. އަދި އެމްޑީޕީން ރައްޔިތުންނަށް ވައުދުވީ ރައްތުންގެ ޖީބަށް ބަރުވާގޮތަށް ތަރައްޤީ ގެނައުމަށްކަމަށްވެސް ރައީސް ނަޝީދު ވިދާޅުވިއެވެ. އެމަނިކުފާނު ވިދާޅުވީ އެކަން ކުރެވޭނީ ލާމަރުކަޒީ ނިމާމެއްގެ ތެރެއިންކަމަށް ރައްޔިތުން ބުނެފައިވާކަމަށާ، އެހެންކަމުން އެނިޒާމުގައި ހުރި މައްސަލަތައް ހައްލުކޮށް ރައްޔިތުންނަށް ހުޅުވާލެވިފައިވާ ތަރައްޤީގެ ނިޒާމެއް މިއަދު ފަހިކޮށްދެވިފައިވާކަމަށެވެ.
ރައީސް ނަޝީދު ވިދާޅުވީ އެއްދިމާލަކަށް ބާރުތައް ޖަމާކޮށްގެން ހެޔޮ ވެރިކަމެއް ނުކުރެވޭނެކަން މާޒީއަށް ބަލާލުމުން ފެންނާނެ ކަމަށާ އެގޮތަށް ގެނެވޭ ތަރައްޤީއަކީ ދުނިޔެ ޤަބޫލުކުރާ ތަރައްޤިއެއްނޫންކަމަށްވެސް ރައީސް ނަޝީދު ވިދާޅުވިއެވެ.
ރައްޔިތުންގެ މަޖިލީހުން ލާމަރުކަޒީ ޤާނޫނަށް ބަދަލު ގެނައިއިރުވެސް އެންމެ ބޮޑަށް ސަމާލުކަން ދީފައިވާނީ މާލޭގެ އޮފީސްތަކާއި، މިނިސްޓްރީ ތަކުގައި ޖަމާވެފައިހުރި ބާރުތައް ރަށްރަރަށް ލިބޭނެ ގޮތް ފަހިކޮށްދިނުމަށްކަން ރައީސް ނަޝީދު ވަނީ ފާހަގަކުރައްވާފައެވެ. އެމަނިކުފާނު ވިދާޅުވީ ގާނޫނަށް މިހާރު ގެނެސްފައިވާ ބަދަލުތަކާއެކު ބަޖެޓާއި، ސަރުކާރު އޮފީސްތަކުގައިހުރި ރަށްރަށާއި ގުޅުންހުރި މަސައްކަތްތައް އެރަށަކާއި ހަވާލުކުރެވިގެންދާނެކަމަށެވެ. އަދި މިބާރުތައް ދޫކޮށްލާނީ ޤައުމީ ތަރައްގީގެ ޕްލޭނާއި ފުށުނާރާނެ ގޮތެއްގެ މަތީންކަމަށްވެސް މަޖިލީހުގެ ރައީސް ވިދާޅުވިއެވެ.
ސަރުކާރުން ރައްޔިތުންނަށް ގެނެސްދޭން ބޭނުންވާ ތަރައްޤީއަކީ ރައްޔިތުން ފުދުންތެރިވާ ތަރައްޤީއެއްކަން މަޖިލީހުގެ ރައީސް ވަނީ ފާހަގަކުރައްވާފައެވެ. އަދި އިސްލާމީ ރީތި އުސޫލުތަކާއި ދިވެހިންގެ ތާރީޚާއި ސަޤާފަތް ގެއްލިގެން ނުދާނޭހެން ތަރައްޤީ ގެނައުމުމަކީ މިސަރުކާރުގެ އަމާޒުކަމަށްވެސް މަޖިލީހުގެ ރައީސް ވިދާޅުވިއެވެ.