އިއްޔެ މާފުށިން ގެއްލިގެން ހޯދަމުންދަނިކޮށް ފެނުނު ކުއްޖާއަށް އެއްވެސް އަނިޔާއެއް ލިބިފައިނުވާކަމަށާއި، މިއަދު ހެނދުނު އެކުއްޖާ ޞިއްޙީ މަރުކަޒުން ދޫކޮށްލާފައިވާކަމަށް އެރަށު ޞިއްޙީ މަރުކަޒުން ވިދާޅުވެއްޖެ.
މާފުށީ ޞިއްޙީ މަރުކަޒުގެ ޒިންމާދާރު ވެރިޔާ ފާޠިމަތު ނަހުލާ ވިދާޅުވީ، އެ އަންހެންކުއްޖާ ޞިއްޙީ މަރުކަޒަށް ފަރުވާދިނުމަށް ރޭގެ ވަގުތެއްގައި ގެންދިޔައިރު ހޭނެތިފައިވާ ކަމަށާއި އެކުއްޖާ ހޭނެތިފައިވަނީ ބަންދުވެފައިހުރި ތަނެއްގައި ގިނައިރު ހުރުމުގެ ސަބަބުންކަމަށެވެ.
މާފުށީ ކައުންސިލްގެ ރައީސް އުޘްމާން ރަޝީދު ވިދާޅުވީ، އުމުރުން 14 އަހަރުގެ އަންހެން ކުއްޖާ ގެއިން ނިކުމެގެން ދިޔައީ އާއިލާތެރޭގައި ޖެހުނު މައްސަލައަކާއި ގުޅިގެންކަމަށް އާއިލާއިން މަޢުލޫމާތުދީފައިވާކަމަށެވެ. އަދި އެކުއްޖާ ފެނުނީ ގެއްލިގެން ހޯދާތާ 6 ގަޑިއެއްހާއިރު ފަހުން، އެރަށުގައި ގުދަނެއްގެ ގޮތުގައި ބޭނުންކުރާ ޢިމާރާތެއްގެ ތެރެއިންކަަމަށް އުޘްމާން ވިދާޅުވިއެވެ.