ދިވެހި އުފެއްދުންތެރިކަމުގެ ޤައުމީ މައުރަޒު ނުވަތަ "ފަންނު އެކްސްޕޯ"އަށް ރައިސުލްޖުމްހޫރިއްޔާގެ ނައިބު ފައިސަލް ނަސީމް ޒިޔާރަތްކުރައްވައިފިއެވެ.
ނައިބު ރައީސް ފައިސަލް ނަސީމް ފަންނު އެކްސްޕޯ"އަށް ވަޑައިގެން ސްޓޯލްތަކުގައި ތިއްބެވި ފަރާތްތަކާއި ބައްދަލުކުރައްވާ މި މައުރަޒުގައި ޑިސްޕްލޭ ކޮށްފައިވާ ތަކެތި ވަނީ ބައްލަވާލައްވާފައެވެ. ނައިބު ރައީސްއާއި އެކު މިނިސްޓަރ އޮފް އިކޮނޮމިކް ޑިވެލޮޕްމެންޓް ފައްޔާޟް އިސްމާއިލްގެ އިތުރުން މޯލްޑިވްސް ޕޮލިޓެކްނިކްގެ ސީއީއޯ އަޙްމަދު ނާޞިރުވެސް ވަނީ ބައިވެރިވެވަޑައިގެންފައެވެ.
ފަންނު އެކްސްޕޯގައި 300 އަށްވުރެ ގިނަ ފަރާތުން ބައިވެރިވެފައިވާކަމަށް އިކޮނޮމިކް މިނިސްޓްރީން ވިދާޅުވެއެވެ. އަދި މި އެކްސްޕޯއަށް 3800 އަށްވުރެ ގިނަ އުފެއްދުން ވަނީ ހުށައަޅާފައެވެ.
ފަންނު އެކްސްޕޯ ކުރިއަށްދާނީ މިމަހުގެ 22އިން 28ގެ ނިޔަލަށެވެ. ނެތެމުންދާ ދިވެހި އުފެއްދުންތަކާއި މާކެޓަށް އަލަށް ނެރޭ އުފެއްދުންތައް ކުރިއެރުވުމަށް މި އެކްސްޕޯގެ ތެރެއިން ހިއްވަރުދީ، ދިވެހި މަސައްކަތްތެރިން ކުރިއެރުވުމަށް އިތުރު ފުރުޞަތުތައް ފަހިކޮށްދެއްވުމަކީ އަމާޒެއްކަމަށް އިކޮނޮމިކް މިނިސްޓްރީން ވިދާޅުވެއެވެ.