ކޯޓުން ބޭރުގައި ކައިވެނިކޮށްގެން އުޅޭކަމަށް ބުނާ 13 އަހަރުގެ އަންހެން ކުއްޖާ ކައިވެނީގެ ނަމުގައި އެއްވެސް ފަރާތަކާއި ގުޅިފައިވާކަން ތަހުޤީގަށް އެނގެން ނެތްކަމަށް ޖެންޑަރ މިނިސްޓްރީން ހާމަކުރެއްވައިފިއެވެ.
ޤާނޫނީ ހަމަތަކާ ޚިލާފަށް އުމުރުން 13 އަހަރުގެ އަންހެން ކުއްޖަކާ ކައިވެނިކޮށްގެން ގެންގުޅޭކަމަށް ބުނާ މައްސަލާގައި ފުލުހުންނާއި ޖެންޑަރ މިނިސްޓްރީ ގުޅިގެން ނެރުނު ބަޔާނުގައިވަނީ އެއް އާއިލާއެއްގެ ކުދިންތަކަކަށް ލިބެންވާ ތަޢުލީމާއި ސިއްޙީ ހައްޤުތަކުން މަހުރޫމު ކޮށްފައިވާކަމުގެ މަޢުލޫމާތު 2018 ވަނަ އަހަރުގެ ޖޫން 6 ވަނަ ދުވަހު ފުލުހުންގެ އިންޓެލިޖެންސަށް ލިބިގެން އެ މައްސަލަ ތަހުޤީގުކުރަން ފަށާފައިވާކަމަށެވެ.
މި މައްސަލާގައި ހިމެނޭ އާއިލާއަކީ ދީނުގެ ނަމުގައި ހަރުކަށި ވިސްނުން ގެންގުޅޭ އާއިލާއެއްކަން ފާހަގަކުރެވިފައިވާކަމަށް ޖެންޑަރ ބަޔާނުގައިވެއެވެ. އަދި އެކަމުގެ ސަބަބުން އެ އާއިލާއަށް ނިސްބަތްވާ ކުދިންނަށް އެކަށީގެންވާ ތަޢުލީމުގެ ފުރުޞަތު ފަހިކޮށްދިނުމާއި ސިއްޙީ ގޮތުން އަޅަންޖެހޭ ރައްކާތެރިކަމުގެ ފިޔަވަޅު އެޅުމުގެ ހައްޤުން މަހުރޫމްވެފައިވާކަމަށް ޖެންޑަރ މިނިސްޓްރީއިން ވިދާޅުވެއެވެ. މި މައްސަލަ ހައްލުކުރުމަށް އެކަންކަން ޙައްލުކޮށް، ކުދިންނަށް ފޯރުކޮށްދޭންޖެހޭ ސަލާމަތާއި ރައްކާތެރިކަން ފޯރުކޮށްދިނުމުގެ މަސައްކަތް ސަރުކާރުގެ ކަމާގުޅުންހުރި މުއައްސަސާތަކުން ކުރަމުންދާކަންވެސް މިނިސްޓްރީގެ ބަޔާނުގައިވެވެ.
އިސްލާމްދީނުގެ ނަމުގައި ހައްދު ފަހަނަ އަޅާދިއުމާއި އެކަމުގެ ސަބަބުން ކުޑަކުދިންގެ ހައްގުތަކަށް އުނިކަން ލިބި، ކުޑަކުދިން ކުށުގެ ޝިކާރައަކަށް ވެގެން ދިޔުމަކީ ސަރުކާރުން އަޅާނުލާ ދޫކޮށްލާނެ މައްސަލައެއް ނޫންކަންވެސް ޖެންޑަރ މިނިސްޓްރީގެ ބަޔާނުގައިވެއެވެ.
13 އަހަރުގެ ކުއްޖާގެ މައްސަލަ ޖެންޑަރ އިން ތަހުޤީގުކުރަމުން މި އަންނަނީ ދޯންޏެއްގައި ހިނގި މާރާމާރީއެއްގައި ތޫނު އެއްޗަކުން ހަމަލާދީ ޒަހަމްކޮށްލުމަށްފަހު މިދިޔަ ބުރާސްފަތި ދުވަހުގެރޭ ކަނޑަށް އެއްލާލީ މީހަކީ 13 އަހަރުގެ ކުޑަކުއްޖަކާ ކައިވެނިކޮށް އެ ކުއްޖާ ބަލިވެ އިން ކަމަށް ބުނާ ވާހަކަތަކެއް ފެންމަތިވެފައިވަނިކޮށެވެ. ތޫނު އެއްޗަކުން ހަމަލާދީ ޒަހަމްކޮށްލުމަށްފަހު ކަނޑަށް އެއްލާލާފައިވަނީ ރ. މަޑުއްވަރީ، ފެހިއަލި، އިސްމާއިލް ހައްމާދެވެ. އޭނާއަށް އައި.ޖީ.އެމް.އެޗުގައި އަންނަނީ ފަރުވާ ދެމުންނެވެ.
ލަނޑާ ނަގާ ދޯންޏެއްގައި ހިނގި މާރާމާރީގައި 26 އަހަރުގެ އިސްމާއިލް ހައްމާދަށް ވަޅިން ހަމަލާދީފައިވަނީވެސް ހަރުކަށި ފިކުރުގެ ބައެއްގެ މެދުގައި ހިޔާލުތަފާތުވުން އުފެދިގެންކަމަށްވެއެވެ.