އަންހެނުނަށް ކުރާ އަނިޔާ ހުއްޓުވުމުގައި ފުލުހުން ޕްރޮސެކިޓަރ ޖެނެރަލްގެ އޮފީހަށް ފޮނުވި މައްސަލަތަށް މިއަހަރު ގިނަ ވުމަކީ، މިފަދަ ކުށްތަށް ހުއްޓުވުމުގައި ލިބޭ ބޮޑު ކުރިއެރުމެއްކަމަށް މޯލްޑިވްސް ޕޮލިސް ސަރވިސްއިން ވިދާޅުވެއްޖެއެވެ.
2015އިން ފެށިގެން މިއަހަރުގެ އޮކްޓޯބަރ މަހުގެ ނިޔަލަށް، އަންހެނުނަށް ކުރާ އަނިޔާގެ މައްސަލަތަށް ރިޕޯޓްކުރި ޢަދަދުގެ ތަފްޞީލް ހިއްސާކުރައްވަމުން، މޯލްޑިވްސް ޕޮލިސް ސަރވިސްގެ ސްޕޯކްސްޕާރސަން، ޗީފް އިންސްޕެކްޓަރ އޮފް ޕޮލިސް އިޒްމިއާ ޒާހިރު ވަނީ، އަންހެނުން އަދިވެސް މިފަދަ މައްސަލަތަށް ރިޕޯޓްކުރުމުގައި ފަސްޖެހޭކަން ފާހަގަކުރައްވާފައެވެ.
މި ސަބަބައްޓަކައި، އަންހެނުނަށްކުރާ އަނިޔާ ހުއްޓުވުމަށް ފުލުހުންނަށް ދަތިވާއިރު، މިމައްސަލައިގައި ރާއްޖެއޮތް ޙާލަތް ސާފުނުވާކަން އިޒްމިޔާ ފާހަގަކުރެއްވިއެވެ. އިޒްމިޔާ ވަނީ މިފަދަ މައްސަލަތަށް ރިޕޯޓްކުރުމަށް ޢާންމުން ހޭލުންތެރިކުރުވުމަށް މަސައްކަތަކެއް ކުރަމުންދާކަން ފާހަގަކުރައްވާފައެވެ. އަދި ފުލުހުންނަކީ ރައްޔިތުން ބަލައިގަންނަ އިތުބާރުކުރާ މުއައްސަސާއަކަށް ހެދުމަށްވެސް ގިނަ މަސައްކަތްތަކެއް ކުރަމުންދާކަން އިޒްމިޔާ ފާހަގަކުރެއްވިއެވެ.
"އަންހެނުނަށް ކުރާ އަނިޔާ ހުއްޓުވުމުގައި ފުލުހުން ޕްރޮސެކިޓަރ ޖެނެރަލްގެ އޮފީހަށް ފޮނުވި މައްސަލަތަށް މިއަހަރު ގިނަ ވުމަކީ، މި ފަދަ ކުށްތަށް ހުއްޓުވުމުގައި ލިބޭ ބޮޑު ކުރިއެރުމެއް. އެގޮތުން އަންހެނުންނަށް ޖިންސީ ފުރައްސާރަކުރުމުގެ ހަމަ އެކަނި މައްސަލަ މި 5 އަހަރުތެރޭ ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވަނީވެސް މިހިނގާ 2019 ވަނަ އަހަރުގައިކަން ފާހަގަކޮށްލަން ޖެހޭ." އިޒްމިއާ ވިދާޅުވިއެވެ.
މޯލްޑިވްސް ޕޮލިސް ސަރވިސްގެ އެންމެ ފަހުގެ ތަފާސްހިސާބުތަށް ދައްކާގޮތުން މިއަހަރުގެ އޮކްޓޯބަރ މަހުގެ ނިޔަލަށް ނުކުޅެދުންތެރިކަން ހުންނަ އަންހެނުންނަށް ކުރާ ކުރާ އަނިޔާގެ 9 މައްސަލައެއް ހުށަހަޅާފައިވާއިރު، މީގެތެރެއިން 5 މައްސަލައެއް ވަނީ ޕީޖީއަށް ފޮނުވާފައެވެ. ބިދޭސީ އަންހެނުންނާއި ގުޅުންހުރި 10 މައްސަލަ ހުށަހަޅާފައިވާއިރު 4 މައްސަލަ ޕީޖީ އޮފީހަށް ފޮނުވާފައިވެއެވެ. ގެވެށި އަނިޔާގެ 60 މައްސަލަ ހުށަހަޅާފައިވާއިރު ޕީޖީއަށް ފޮނުވާފައިވަނީ އެންމެ 4 މައްސަލައެވެ. އަނެހުންންގެ ރޭޕްގެ 4 މައަސަލަ ހުށަހަޅާ 1 މައްސަލަ ޕީޖީއަށް މިއަހަރު ފޮނުވާފައިވާއިރު، މިއަހަރުގެ ތެރޭގައި ޖިންސީ ފުރައްސާރައިގެ 8 މައްސަލަ ހުށަހަޅާ 1 މައްސަލަ ވަނީ ޕީޖީއަށް ފޮނުވާފައެވެ. މިއަހަރުތެރޭގައި އޮރިޔާން ކާޑު ދައްކައިގެން އަންހެނުން ބްލެކްމެއިލްކުރުމުގެ 8 މައްސަލަ ހުށަހަޅާ 2 މައްސަލަ ވަނީ ޕީޖީއަށް ފޮނުވާފައެވެ