ހއ.ދިއްދޫގައި ދިރިއުޅޭ ނުކުޅުންތެރިކަން ހުންނަ އަންހެނަކަށް ނާއިބު ރައީސް ފައިޞަލް ނަޞީމު ވަޒީފާއެއް ހަމަޖައްސަވާ ދެއްވައިފިއެވެ.
އުތުރުގެ ބައެއް ރަށްތަކަށް ނާއިބު ރައީސް މިހާރު ކުރައްވަމުން ގެންދަވާ ދަތުރުފުޅުގައި ހއ ދިއްދޫއަށް ވަޑައިގެން އެރަށުގައި ތިބި ނުކުޅެދުންތެރިކަން ހުންނަ ފަރާތްތަކާއި އެކު ވަނީ ވަގުތުކޮޅެއް ހޭދަކޮށްލައްވާފައެވެ. އެގޮތުން އެމަނިކުފާނު ވަނީ އެފަރާތްތަކުގެ ހާލު އަހުވާލު އޮޅުންފިލުއްވައި އެފަރާތްތަކުގެ ކަންބޮޑުވުންތައް އަޑުއައްސަވާފައެވެ.
މި ބައްދަލުވުމުގެ ބައިވެރިވި ނުކުޅެދުންތެރިކަން ހުންނަ އަންހެނަކު ވަޒީފާއެއް ހަމަޖައްސައިދިނުމަށް އެދުމުން ނާއިބު ރައީސް ވަނީ ވަގުތުން އޭނާ އެދުނު ގޮތަށް ފެނަކަ ކޯޕަރޭޝަންގެ ވަޒީފާއެއް ހަމަޖައްސަވައިދެއްވާފައެވެ.
މި ދަތުރުގައި އެ މަނިކުފާނުވަނީ ދިއްދޫ ކައުންސިލާ ބައްދަލުކުރައްވާފައެވެ. މި ބައްދަލު ކުރެއްވުމުގައި، އެރަށުގެ ތަރައްޤީއަށް ކައުންސިލުން ކުރިޔަށް ރާއްވަވާފައިހުރި ކަންކަމުގެ މައުލޫމާތު އޮޅުންފިލުއްވިއެވެ.
ދިއްދޫ ކައުންސިލަރުން ވަނީ އެރަށުގެ މަގު ހެދުމުގެ މަސައްކަތް ނުނިމި ދިގުލައިގެން ގޮސްފައިވާތީ އެކަމުގެ ކަނބޮޑުވުން ވަނީ ނާއިބު ރާއިސާއި ހިއްސާކޮށްފައެވެ. އަދި އެކަމުގެ ސަބަބުން މަގުތަކުގައި ފެންބޮޑުވެ ގޭގެއަށް ފެން ވަދެ ހިފާ ގެންގުޅޭ ސާމާނަށް ގެއްލުންވަމުންދާކަން ކައުންސިލް މެމްބަރުން ފާހަގަކޮށްފައެވެ. މީގެއިތުރުން ރަށަށް ދިމާވެފައިވާ ކުނީގެ މައްސަލައާއި ރަށު ކައުންސިލުގެ ޖާގައިގެ ދަތިކަމުގައި މައްސަލަވެސް ދިއްދޫ ކައުންސިލަރުންވަނީ ނާއިބު ރައީސްއާއި ހިއްސާކޮށްފައެވެ.
މިބައްދަލުވުމުގައި ރައީސުލްޖުމްހޫރިއްޔާގެ ނާއިބު ދެއްކެވި ވާހަކަފުޅުގައި ކުށްމަދުކުރުމަށާއި ކުށްކުރާ ފަރާތްތައް އަނބުރާ މުޖުތަމަޢަށް ގެނައުމަށް މި ސަރުކާރުން ގިނަ މަސައްކަތްތަކެއް ކުރެވިފައިވާކަން ފާހަގަކުރެއްވިއެވެ.
ނާއިބު ރައީސް ވަނީ، ދިއްދޫގެ ތަރައްޤީ އާއި ގުޅުންހުރި ބައެއް މަޝްރޫޢުތަކާއިބެހޭ އެންމެފަހުގެ މައުލޫމާތު ކައުންސިލަރުންނާ ޙިއްޞާކުރައްވާފައެވެ. އަދި ކައުންސިލަރުންގެ ކަންބޮޑުވުން ހުރި މައްސަލަތަކުގައި، ސަރުކާރުގެ ކަމާގުޅުންހުރި އިދާރާތަކާއި ގުޅިވަޑައިގެން، އެކަންކަމަށް އަވަސް ޙައްލެއް ހޯދައިދިނުމަށް މަސައްކަތްޕުޅު ކުރައްވާނެކަމުގެ ޔަގީންކަން އެރަށު ކައުންސިލަރުންނަށް އެމަނިކުފާނު ވަނީ ދެއްވާފައެވެ.