ކުޑަކުދިންގެ ހައްޤުތަކާ ގުޅޭ ދާއިރާގައި އަދިވެސް ގިނަ މަސައްކަތްތަކެއް ކުރަން އެބަހުރި - ރައީސް
ކުޑަކުދިންގެ ހައްޤުތަކާ ގުޅޭ ދެޤާނޫނޫ ތަސްދީޤުކުރި ނަމަވެސް، މިދާއިރާގައި އަދިވެސް ގިނަ މަސައްކަތްތަކެއް ކުރަން ހުރިކަން ފާހަގަކުރައްވައި، މި މަސައްކަތްތައް ކުރައްވާނެކަމުގެ ޔަޤީންކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްވައިފިއެވެ.
ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނާއި، ކުޑަކުދިންގެ ޢަދުލުގެ ޤާނޫނު ތަސްދީގުކުރެއްވުމަށްފަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ކުރެއްވި ޓުވީޓެއްގައި އެމަނިކުފާނުވަނީ، ދުނިޔޭގައި ކުޑަކުދިންގެ ޙާލަތު އޮތްގޮތަށް އަލިއަޅުއްވާލައްވާފައެވެ. އެގޮތުން ދުނިޔޭގައި އުޅޭ ދެމިލިއަނެއްހައި ކުޑަކުދިންނަށް ކޮންމެއަހަރަކު އެކި ވައްތަރުގެ އަނިޔާތައް ލިބެމުންދާކަން އެމަނިކުފާނު ފާހަގަކުރެއްވިއެވެ.
ދުނިޔޭގެ ކުޑަކުދިންގެ ދުވަހުގައި، މިފަދަ ބިލެއް ތަސްދީގުކުރުމަކީ ލިބޭ ފަޚުރެއްކަމަށް ފާހަގަކުރައްވައި ރައީސްވަނީ، އަލަށް ތަސްދީގުކުރި ކުޑަކުދިންގެ ހައްގުތަކާ ގުޅޭ ދެ ޤާނޫނާއެކު ރާއްޖޭގައި ކުޑަކުދިންގެ ހައްޤުތައް ޙިމާޔަތްކުރުމުގައި ބޮޑު ކުރިއެރުންތަކެއް ލިބިގެންދާނެކަމަށް ވިދާޅުވެފައެވެ. ރައީސް ވަނީ ރާއްޖޭގައި ކުޑަކުދިންގެ ހައްޤުތައް ޙިމާޔަތްކުރުމަށް އަދިވެސް އިތުރު ގިނަ މަސައްކަތްތަކެއް ކުރަން ހުރިކަން ފާހަގަކުރައްވާފައެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތަސްދީޤްކުރެއްވި އައު ޤާނޫނުތަކުން ކުޑަކުދިންނަށް ލިބޭނެ ފައިދާތަކާއި ބެހޭގޮތުން ވާހަކަދައްކަވަމުން، ޔުނިސެފުން ރާއްޖެއަށް ކަނޑައަޅުއްވާފައި ހުންނަވާ މަންދޫބު ޑރ.އެމް މުނީރް އޭ ސަފަލިއްދީން ވަނީ، މިއީ ދިވެހިރާއްޖެއަށް ދުނިޔޭގެ 30ވަނަ ކުޑަކުދިންގެ ދުވަހުގެ މުނާސަބާގައި ދިން އެންމެ އަގުހުރި ހަދިޔާގެގޮތުގައި ސިފަކުރައްވާފައެވެ.
ކުޑަކުދިންގެ ހައްޤުތަކުގައި ވަކާލާތުކުރާ އދ.ގެ މައި އިދާރާ ޔުނިސެފްގެ މަންދޫބުވަނީ، މި ޤާނޫނުގެ ސަބަބުން ކުޑަކުދިންނަކީ ކޮބައިކަން ޤާނޫނީގޮތުން ސާފުވެގެން ގޮސްފައިވާކަމަށެވެ. ކުޑަކުދިންނަކީ ޚާއްސަ އަހަންމިއްޔަތުކަމެއް ދޭންޖެހޭ ބައެއްކަން ފާހަގަކުރައްވަައި ޔުނިސެފްގެ މަންދޫބުވަނީ، މި ފަދަ ކުދިން ކުށްކުރުމުން މި ޤާނޫނުތަކުގެ ދަށުން ފޯރުކޮށްދޭ ޚާއްސަ ނިޒާމަކީ، ކުދިން ކުށްކުރުމުން ދުރުވެ އަނބުރާ މުޖުތަމައަށް ނެރުމުގައި ފަސޭހަވެގެންދާނެކަމެއްކަމަށް ވިދާޅުވެފައެވެ.
ކުޑަކުދިންގެ ޢަދުލުގެ ޤާނޫނަކީ، ކުޑަކުދިންގެ ޢަދުލުގެ ނިޒާމެއް ޤާއިމުކުރުމަށް އެކަށައަޅަންޖެހޭ އުސޫލުތައް ބަޔާންކުރުމުގެ ޤާނޫނެވެ. މިޤާނޫނުގެދަށުން ޤާނޫނާ ޚިލާފުވާ ކުޑަކުދިންގެ މައްސަލަތައް ބަލައި ކުރިއަށްގެންދަންޖެހޭނީ އެކުދިން ކުށްކުރުމާ ދުރުކުރުމަށް ބާރުއަޅާ އުސޫލަކުންނެވެ. އަދި އެކުދިންނަށް ބޭނުންވާ ރީހެބިލިޓޭޓިވް ފަރުވާ ލިބިދީ، އެކުދިން ހެޔޮގޮތުގައި އަނބުރާ މުޖުތަމަޢަށް އައިސް، މުޖުތަމަޢުގައި ބިނާކުރަނިވި ދައުރެއް އަދާކުރުމަށް މަގުފަހިވާފަދަ ނިޒާމެއް އުފައްދަންޖެހެއެވެ.
ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނަކީ ކުޑަކުދިންނަށް ލިބިގެންވާ ޙައްޤުތަކާއި، އެކުދިންނާ މަތިވެފައިވާ ޒިންމާތަކާއި، ކުޑަކުދިންނާ ގުޅޭގޮތުން އެންމެހައި ފަރާތްތަކުގެ މައްޗަށް އޮތް ޒިންމާއާއި، ކުޑަކުދިންނަށް އަޅާލުމާއި ރައްކާތެރިކަން ފޯރުކޮށްދިނުމާގުޅޭ އުސޫލުތައް ކަނޑައެޅުމުގެ ޤާނޫނެވެ.