އިހަވަންދިއްޕޮޅުގައި ތަރައްޤީ ކުރުމަށް ހަމަޖެހިފައިވާ އައިހެވަން މަޝްރޫޢުގެ ފީސިބިލިޓީ ސްޓަޑީގެ މަސައްކަތް ފަށައިފިއެވެ.މިމަސައްކަތް 10 ހަފްތާ ތެރޭގައި ނިންމާލެވޭނެކަމަށް އިކޮނޮމިކް މިނިސްޓްރީން ވިދާޅުވެއެވެ.އިހަވަންދިއްޕޮޅުގައި ޓްރާންޝިޕްމެންޓް ބަނދަރަކާއެކު، ވިޔަފާރީގެ ހަބެއްގެ ގޮތުގައި އެސަރަހައްދު ތަރައްޤީ ކުރުމަށް ސަރުކާރުން އިޢުލާންކޮށްފައިވާ މަޝްރޫޢަކީ ވަރަށް އުންމީދީ މަޝްރޫޢެކެވެ. ގިނައަދަދެއްގެ ބޮޑެތި އިންވެސްޓަރުންނަށް ފުރުސަތު ހުޅުވާލާފައިވާ މި މަޝްރޫއުގެ ދަށުން ބައިނަލްއަޤުވާމީ ޓްރާންޝިޕްމެންޓް ބަނދަރެއްގެ އިތުރުން، ބަންކަރިން ޚިދުމަތާއި، ކުރޫޒް ޓާރމިނަލްއަކާއި، އިންޓަރނޭޝަނަލް އެއަރޕޯޓެއް ތަރައްޤީ ކުރުމަށް ވަނީ ހަމަޖެހިފައެވެ.މުޅި މަޝްރޫޢުގެ ފީސިބިލިޓީ ސްޓަޑީގެ މަސައްކަތް ބޮސްޓަން ކޮންސަލްޓިންގ ގްރޫޕާ ހަވާލުކޮށްގެން ފަށާފައިވާއިރު މި މަސައްކަތް ނިމެންވާއިރަށް މުޅި މަޝްރޫއަށް ދާނެ ޚަރަދު އެނިގެންދާނެކަމަށް އިކޮނޮމިކް މިނިސްޓްރީން މައުލޫމާތުދެއެވެ.ޕީ.އެސް.އެމްއަށް މައުލޫމާތުދެއްވަމުން އިކޮނޮމިކް މިނިސްޓަރގެ ނައިބު އާދަމް ތައުފީޤް ވިދާޅުވީ ފީސިބިލިޓީ ސްޓަޑީގެ މަސައްކަތް 5 ކޮންޕޮނެންޓަކަށް ބަހާލާފައިވާކަމަށާއި، މިހާރު ކުރިއަށްދަނީ އޭގެ ތެރެއިން ފުރަތަކަ ކޮންޕޮނެންޓްގެ މަސައްކަތް ކަމަށެވެ. އަދި މި މަސައްކަތް ނިމޭއިރު މިމަޝްރޫއިން ދައުލަތަށް ލިބޭނެ ފައިދާގެ މިންވަރާއި، މުޅި ޕްރޮޖެކްޓްގެ ވިޔަފާރި ވިއުގައެއް ޤާއިމު ކުރެވިގެން ދާނެކަމަށްވެސް ޑެޕިއުޓީ މިނިސްޓަރ ވިދާޅުވިއެވެ.ފީސިބިލިޓީ ސްޓަޑީގެ މަސައްކަތް ނިމޭއިރު މިމަޝްރޫޢު ކުރިއަށްގެންދާނެ ގޮތާއި، އިންވެސްޓަރުންނަށް ހުރި ފައިދާތަކުގެ ފުރިހަމަ މައުލޫމާތު އެނގިގެންދާނެއެވެ.އައިހެވަން މަޝްރޫއަށް އިންވެސްޓް ކުރުމުގެ ފުރުސަރު ސަރުކާރުންވަނީ މިހާރުވެސް ހުޅުވާލާފައެވެ. އަދި މިމަޝްރޫއަށް އިންވެސްޓް ކުރުމަށް ބައެއް އިންވެސްޓަރުން ޝައުޤުވެރިކަން ފާޅުކޮށްފައިވާކަށް އިކޮނޮމިކް މިނިސްޓްރީ ބުނެއެވެ. އަދި ފީސިބިލިޓީ ސްޓަޑީގެ މަސައްކަތް ނިމި މި ސްޓަޑީގެ މައުލޫމާތު އިންވެސްޓަރުންނާ ހިއްސާ ކުރެވުމުން މިމަޝްރޫޢަށް އިތުރު އިންވެސްޓަރުން ލިބިގެންދާނެކަމަށް ޑެޕިއުޓީ މިނިސްޓަރ ތައުފީޤް ވިދާޅުވިއެވެ.ސެޕްޓެމްބަރ މަހު ޗައިނާގެ ޝަންގްހާއީގައި ބޭއްވުމަށް ހަމަޖެހިފައިވާ އިންވެސްޓްމެންޓް ފޯރަމްގެ ކުރިން ފީސިބިލިޓީ ސްޓަޑީގެ ބޮޑުބައެއް ނިންމާލެވޭނެކަމަށް ބެލެވޭ ކަމަށާއި، އައި މިމަޝްރޫޢުގެ އިތުރު މައުލޫމާތު މިފޯރަމްގެ ތެރެއިން އިންވެސްޓަރުންނާ ހިއްސާ ކުރައްވާނެކަމަށް ތައުފީޤްވިދާޅުވިއެވެ.ދިވެހިރާއްޖޭން އިންތިޒާމުކޮށްގެން ބައިނަލްއަޤުވާމީ ފެންވަރުގައި ބޭއްވި ފުރަތަމަ އިންވެސްޓްމެންޓް ފޯރަމް ސިންގަޕޫރުގައި މިދިޔަ އަހަރުގެ އޭޕްރިލް މަހު ބާއްވާފައިވާއިރު މިފޯރަމްގެ ތެރެއިން ސަރުކާރުންވަނީ މިހާތަނަށް ދިވެހި ތާރީޚް ނުދެކޭފަދަ ބޮޑެތި ޕްރޮޖެކްޓްތަކެއް ލޯންޗްކުރައްވާފައެވެ. އޭގެތެރޭގައި އައިހެވަންގެ މަޝްރޫޢުގެ އިތުރުން އިބްރާހީމް ނާސިރު އިންޓަރނޭޝަނަލް އެއަރޕޯޓް ތަރައްޤީ ކުރުމުގެ މަޝްރޫޢާއި، ރާއްޖެއިން ތެޔޮހޯދުމުގެ މަޝްރޫއާއި، ހުޅުމާލޭ ދެވަނަ ފިޔަވަހި ޔޫތް ސިޓީއެއްގެ ގޮތުގައި ތަރައްޤީ ކުރުމުގެ މަޝްރޫޢު ހިމެނެއެވެ. މިހުރިހާ މަޝްރޫއެއްވެސް އެކި މަރުހަލާތަކުގައި ކުރިއަށްދާކަން ފާހަގަކޮށްލެވެއެވެ. އަދި މި މަޝްރޫއުތަކާއިއެކު އިންވެސްޓަރ ކޮންފިޑެންސް އިތުރުކުރުމަށް ސަރުކާރުންވަނީ ހާއްސަ މަސައްކަތްތަކެއްވެސް ފައްޓަވާފައެވެ.ރައީސް އަބްދުއްﷲ ޔާމީންގެ ސަރުކާރުގެ މައިގަނޑު ވަޢުދަކީ ދިވެހިރާއްޖެއަށް އިޤްތިޞާދީ ތަރައްޤީ ހޯދައިދީ ޒުވާނުންނަށް ފަހި ފުރުސަތުތަށް ހޯދައިދިނުމެވެ. އަދި އެމަނިކުފާނުގެ އުންމީދަކީ ދިވެހިރާއްޖެއަކީ ދެކުނު އޭޝިއާގެ ސިންގަޕޫރަށް ހެދުންކަމަށްވެސް އެމަނިކުފާނުވަނީ ވިދާޅުވެފައެވެ. އަދި ޤައުމުގެ ހަމަޖެހުމާއި، އަމަން އަމާންކަމަށް އޮތް ހައްލަކީ އިޤްތިޞާދީ ހައްލެއްކަމަށް އެމަނިކުފާނު ދެކެވަޑައިގަންނަވައެވެ. އަދި އެހައްލު ރައްޔިތުންނަށް ހޯއްދަވައި ދެއްވާނެކަމުގެ ޔަޤީންކަން އެމަނިކުފާނު ވަނީ ދެއްވާފައެވެ.