ޤާޟީ ހައިލަމާއި އަލްހާނު، ދެލައްކަ ރުފިޔާގެ ފައިސާގެ މުޢާމަލާތެއް ހިންގެވި މައްސަލައެއް ބަލަނީ!

ކްރިމިނަލް ކޯޓުގެ އިސްޤާޟީ އަޙްމަދު ހައިލަމާއި ރައްޔިތުންގެ މަޖިލީހުގެ ކުރީގެ މެމްބަރެއްކަމަށްވާ އަލްހާން ފަހުމީގެ 200,000.00 (ދެލައްކަ ރުފިޔާ)ގެ ފައިސާގެ ޓްރާންސެކްޝަނެއްހިންގާފައިވާ މައްސަލައެއް ޖުޑިޝަލް ސަރވިސް ކޮމިޝަން ޖޭއެސްސީން ބަލަން ނިންމައިފިއެވެ.

މިއަދު އެކޮމިޝަނުން ވިދާޅުވީ މިމައްސަލަ ފާހަގަކުރެވިފައިވާކަން އެކޮމިޝަނަށް އަންގަވާފައިވަނީ މޯލްޑިވްސް ޕޮލިސް ސާރވިސްއިން ކަމަށެވެ. އެގޮތުން މިމަހުގެ 5ވަނަ ދުވަހު ފުލުހުން އެކޮމިޝަނަށް ފޮނުވާފައިވާ ސިޓީގައި މިމައްސަލަ ފާހަގަކޮށްފައިވާކަމަށް ޖޭއެސްސީން ވިދާޅުވެއެވެ. މިއީ ފަނޑިޔާރަކާ ގުޅިގެން ފާހަގަކޮށްފައިވާ ސީރިއަސް މައްސަލައެއްކަމަށްވާތީ، މިމައްސަލަ ތަޙްޤީޤު ކުރުމަށް އެކޮމިޝަނުން މިއަދު ނިންމާފައިވާކަމަށްވެސް ޖޭއެސްސީން ވިދާޅުވިއެވެ.

އަދި މިއީ މިއަހަރުގެ ޖުލައިމަހުގެ 25ވަނަ ދުވަހު މޯލްޑިވްސް މަނިޓަރީ އޮތޯރިޓީން ފުލުހުންގެ ސަމާލުކަމަށް ގެނެސްފައިވާ މައްސަލައެއްކަމަށާ، އެހެންނަމަވެސް، ފާއިތުވި ދުވަސްތަކުގެ ތެރޭގައި މިމަޢުލޫމާތު ޖޭއެސްސީއާ ފުލުހުން ހިއްސާކޮށްފައި ނުވާތީއާއި މި މައްސަލައިގާ އެކަށީގެންވާ ފިޔަވަޅު މިއަޑާހަމައަށްވެސް މޯލްޑިވްސް ޕޮލިސް ސާރވިސްއިން އަޅާފައިވާކަމަށް ޤަބޫލުނުކުރެވޭތީ، އެކަން ބައްލަވައިދެއްވުން އެދި ރައްޔިތުންގެ މަޖިލީހަށާއި، ރައީސުލް ޖުމްހޫރިއްޔާއަށާއި ނެޝަނަލް އިންޓިގްރިޓީ ކޮމިޝަނަށް ހުށަހެޅުމަށްވެސް ޖޭއެސްސީގެ މިއަދުގެ ޖަލްސާގައި ވަނީ ނިންމައިފައެވެ.