އިލެކްޓްރޯނިކް ޒަރީއާ މެދުވެރިކޮށް ޓެކްސް ބަޔާން ހުށަހެޅުމާއި، ފައިސާދެއްކުމާއި ގުޅޭ ޤަވާއިދެއް، މޯލްޑިވްސް އިންލަންޑް ރެވެނިއު އޮތޯރިޓީ، މިރާއިން އެކުލަވާލައިފިއެވެ.މި ޤަވާއިދަކީ، ޓެކްސްއާބެހޭ ޤާނޫނުތަކުގެ ދަށުން ޓެކްސް ދައްކާ ފަރާތްތަކުން މީރާއަށް ހުށަހަޅަންޖެހޭ ޓެކްސް ބަޔާންތައް އިލެކްޓްރޯނިކް ޒަރީއާ މެދުވެރިކޮށް ހުށަހެޅުމުގައްޔާއި، އަންގަން ޖެހޭ އެހެނިހެން އެންގުންތައް އެންގުމުގައްޔާއި، މީރާއަށް ދައްކަންޖެހޭ ފައިސާ އެމް.އާރ.ޓީ.ޖީ.އެސް މެދުވެރިކޮށް ނުވަތަ އޮންލައިންކޮށް ދެއްކުމުގައި ޓެކްސް ދައްކާ ފަރާތްތަކުން ޢަމަލުކުރަން ޖެހޭނެގޮތާއި، އެ ކަންކަމާ ގުޅޭ ގޮތުން މީރާއިން ޢަމަލުކުރާނެ ގޮތް ތަފުސީލުކޮށްދިނުމުގެ މަޤުސަދުގައި އެކުލަވާލި ޤަވާއިދެއްކަމަށް މީރާއިން މައުލޫމާތުދެއެވެ.މިޤަވާއިދުގައި ވާގޮތުން، މީރާ ކަނެކްޓް އެކައުންޓަކަށް އެދޭ ފަރާތްތަކުން މީރާ ކަނެކްޓް އެކައުންޓް ރިކުއެސްޓް ފޯމު ފުރިހަމަކުރުމަށްފަހު، އެ ފޯމުގައި ކަނޑައަޅައިފައިވާ އެންމެހައި މަޢުލޫމާތާއި ލިޔެކިޔުންތަކާއެކު މީރާއަށް ހުށަހަޅަންޖެހެއެވެ. އަދި މީރާކަނެކްޓް މެދުވެރިކޮށް ފައިސާ ދެއްކޭ ގޮތަށް ހަމަޖެހިފައިވާ އާމްދަނީގެ ބާވަތެއް ދައްކާ ކޮންމެ ފަރާތަކަށްމެ މީރާކަނެކްޓް އެކައުންޓަކަށް އެދެވިދާނެއެވެ.މީރާކަނެކްޓް އެކައުންޓަކަށް އެދި ހުށަހަޅާއިރު، ޓެކްސް ދައްކާ ފަރާތަށް ދޫކުރެވޭ މީރާކަނެކްޓް ޕްރައިމަރީ އެކައުންޓް، ނުވަތަ ޓެކްސް އޭޖެންޓުންގެ ގަވާއިދުގެ ދަށުން، ޓެކްސް ދައްކާ ފަރާތަކުން ޢައްޔަންކުރާ ޓެކްސް އޭޖެންޓުންނަށް ދޫކުރެވޭ ޓެކްސް އޭޖެންޓް އެކައުންޓް ނުވަތަ، ޓެކްސް ދައްކާ ފަރާތެއްގެ މީރާކަނެކްޓް އެކައުންޓް ބޭނުންކުރާ އެހެނިހެން މީހުންނަށް ދޫކުރެވޭ ޓެކްސް އެކައުންޓަންޓް އެކައުންޓަކަށް އެދެވިދާނެއެވެ.މީރާކަނެކްޓް މެދުވެރިކޮށް ފައިސާ ދެއްކުމުގެ އިންތިޒާމް ހަމަޖައްސައިފައިވާ ޓެކްސް، ފީ، ކުލި، ރޯޔަލްޓީ އަދި އެ ނޫންވެސް ފައިސާ، ވާރުކާޑު، ޑެބިޓްކާޑު އަދި ކްރެޑިޓްކާޑު މެދުވެރިކޮށް، ނުވަތަ މީރާއިން ކަނޑައަޅާ އެނޫންވެސް އޮންލައިން ވަސީލަތްތައް މެދުވެރިކޮށް އޮންލައިންކޮށް ދެއްކިދާނެކަމަށް މި ޤަވާއިދުގައި ބަޔާންކޮށްފައިވެއެވެ.