މެލޭޝިޔާ ކޭމްޕުގައި އެއްވެސް ކުޅުންތެރިއަކަށް އަނިޔާނުވެ ޓީމް ތައްޔާރުކުރަން އިސްކަމެއް ދޭނެކަމަށް ޤައުމީ ފުޓްބޯޅަ ޓީމްގެ ކޯޗު ޕީޓަރ ސެގާޓް ބުނެފިއެވެ.
ވަރލްޑް ކަޕް އަދި އޭޝިއަން ކަޕްގެ ކޮލިފައިންގައި ފިލިޕީންސްއާއި ގުއާމްއާއި ދެކޮޅަށް މާލޭގައި ކުޅޭ މެޗަށް ތައްޔާރުވުމަށް ޤައުމީ ޓީމް އަންނަނީ މެލޭޝިޔާގައި ތަމްރީން ހަދަމުންނެވެ.
ޤައުމީ ފުޓްބޯޅަ ޓީމްގެ ކޯޗު ޕީޓަރ ސެގާޓް ބުނީ މި ތަމްރީންތަކުގައި އެއްވެސް ކުޅުންތެރިއަކަށް އަނިޔާނުވުން މުހިންމުކަމަށެވެ. ފަރިތަކުރުންތަކުގައި ވަރަށް ބޮޑަށް ކުޅުންތެރިންގެ މެޗު ފިޓްނަސް ރަނގަޅުކޮށް ފިލިޕީންސް މެޗަށް ފުރިހަމައަށް ތައްޔާރުކުރާނެކަމަށް ކޯޗު ބުންޏެވެ.
ކޯޗު ސެގާޓް ބުނީ ފިލިޕީންސްއަކީ އޭޝިއަން ކަޕް ކުޅެފައިވާ ޓީމެއްކަމަށާއި އެޓީމަށް ދޭން ޖެހޭ އިޚްތިރާމް ދޭނެކަމަށެވެ. ކޯޗު ބުނީ ވަރުގަދަ ޗައިނާ އަތުން ޕޮއިންޓެއް ހޯދުމަކީ ފިލިޕީންސްގެ ފެންވަރު ދައްކައިދޭކަމެއްކަމަށާއި، އެ ޓީމް އެއްގޮތަކަށްވެސް ފަސޭހަ ނުކުރާނެކަމަށެވެ.
މި ދުވަސްކޮޅު ފުޓްބޯޅައިގެ ފޯރި އެހާ ބޮޑަށް ލީގުން ނުފެންނަކަމަށާއި، ނަަމަވެސް ފިލިޕީންސް މެޗާއިއެކު އެކަން ބަދަލުވާނެކަމަށް ސެގާޓް ބުންޏެވެ. ކޯޗު ބުނީ ފިލިޕީންސް މެޗުގައި ސަޕޯޓަރުން އެ ފޯރި ދައްކާނެކަމަށް އުއްމީދުކުރާކަމަށެވެ.
"މި ކޭމްޕް ނިމޭއިރު އެއްވެސް ކުޅުންތެރިއަކަށް އަނިޔާނުވުން އެއީ އަހަރެންގެ އުއްމީދު، ކުރިއަށް އޮތް މެޗަށް ހުރިހާ ކުޅުންތެރިންވެސް ފިޓްކޮށް ތިބުން މުހިންމު، ރާއްޖޭގެ ފުލް ސްޓްރެންތްގަ މި މެޗަށް ނިކުމެއް ރަނގަޅު ކާމިޔާބެއް ހޯދޭނެ" ކޯޗު ބުންޏެވެ.