މޯލްޑިވިއަން ހިންގާ އައިލެންޑް އޭވިއޭޝަނަށް މިއަހަރުގެ 2 ވަނަ ކުއާޓަރުގައި ލިބުނު އާމްދަނީ ދަށްވެއްޖެއެވެ.
ސަރުކާރުގެ ކުންފުނިތައް ރެގިއުލޭޓް ކުރުމުގެ ޒިންމާ އަދާކުރާ ޕީސީބީން، އެސްއޯއީތަކުގެ މާލީ ހާލަތު ދިރާސާކުރުމަށް ފަހު ނެރެފައިވާ މިއަހަރުގެ ދެވަނަ ކުއާޓާ ރިވިއު ރިޕޯޓްގައިވާ ގޮތުން ފުރަތަމަ ކުއާޓަރާ އަޅަބަލާއިރު، ދެވަނަ ކުއާޓަރުގައި އެކުންފުންޏަށް ލިބުނު އާމްދަނީ ވަނީ 15 އިންސައްތަ ދަށްވެފައެވެ.
ޕީސީބީގެ ރިޕޯޓުގައިވާ ގޮތުން ފުރަތަމަ ކުއާޓަރުގައި އައިލެންޑް އޭވިއޭޝަނަށް އާމްދަނީގެ ގޮތުގައި ފަސް ސަތޭކަ ސާޅީސް އެއް މިލިއަން ރުފިޔާ ވަނީ ލިބިފައެވެ. ނަމަވެސް ދެވަނަ ކުއާޓަރުގައި ލިބިފައިވަނީ ހަތަރު ސަތޭކަ ފަންސާސް ހަތް މިލިއަން ރުފިޔާއެވެ.
މިރިޕޯޓްގައިވާ ގޮތުން މިދިޔަ އަހަރުގެ ދެވަނަ ކުއާޓަރުގައި އައިލެންޑް އޭވިއޭޝަނަށް 68.05 މިލިއަން ރުފިޔާގެ ފައިދާއެއް ލިބިފައިވާއިރު، މިއަހަރު އެ މުއްދަތުގައި އެކުންފުންޏަށް ވަނީ 10.75 މިލިއަން ރުފިޔާގެ ގެއްލުމަކާ ކުރިމަތިލާންޖެހިފައެވެ.
ޕީސީބީގެ ރިޕޯޓްގައިވާ ގޮތުގައި، އައިއޭއެސްއަށް ގެއްލުންވާން ދިމާވި މައިގަނޑު ސަބަބަކީ ހަރަދުތައް މައްޗަށް ދިޔުމެވެ. ރިޕޯޓުގައިވާގޮތުން އައިލެންޑް އޭވިއޭޝަންގެ ހަރަދުތައް ވަނީ 142.03 މިލިއަން ރުފިޔާއަށް އިތުރުވެފައެވެ. އެންމެ ބޮޑަށް ހަރަދުތައް އިތުރުވެފައިވަނީ މުވައްޒަފުންގެ މުސާރަ އާއި އެލަވަންސްތަކުގެ ބައިންއެވެ.