އިންޑިއާގެ ވެރިރަށް ނިއު ދިއްލީގައި ވައި ނުސާފުވެ، ތަޣައްޔަރުވެފައިވުމުގެ ސަބަބުން ރައްޔިތުންނަށް ބޮޑެތި އުނދަގޫތަކަކާ ކުރިމަތިލާން ޖެހިއްޖެއެވެ.
ވައި ނުސާފުވާތީ އިންޑިއާގައި އަލިފާނުގެ އެއްވެސް ކުޅިވަރެއް ނުކުޅެން އެންގި ނަމަވެސް އެތައް ސަތޭކަ ބަޔަކު އެފަދަ ކުޅިވަރުތައް ކުޅުމުގެ ސަބަބުން ނިއު ދިއްލީގެ ވައި އިތުރަށް ނުސާފުވެ ޖައްވުވަނީ އާދަޔާ ޚިލާފަށް ތަޣައްޔަރުވެފައެވެ. ނިއު ދިއްލީއަކީ ދުނިޔޭގައި އެންމެ ބޮޑަށް ވައި ތަޣައްޔަރުވެފައިވާ ސިޓީތަކުގެ ތެރޭގައި ހިމެނޭ ސިޓީއެކެވެ.
ނިއު ދިއްލީގައި ވައި ނުސާފުވުމުގެ މައްސަލަ މިދުވަސްވަރު އިތުރަށް ބޮޑުވެފައިވަނީ އަވަށްޓެރި ހަރިޔާނާއާއި ޕަންޖާބުގެ ހަނޑޫ ދަނޑުތައް ސާފުކުރުމަށް ދަނޑުވެރިން އެ ތަންތަނުގައި ހުޅުޖަހައި އެންދުމުގެ ސަބަބުން އެރި ދުންތަކާ ގުޅިގެންނެވެ. އެ ދުންތަކާއެކު މީގެ ހަފުތާއެއްހާ ދުވަސްކުރިން ނިއުދިއްލީގެ ޖައްވުގައިވަނީ ދުމުގެ ބޮޑު ވިލާގަނޑެއް އުފެދިފައެވެ. މިއާއެކު ނިއު ދިއްލީގެ ޖައްވު ތަޣައްޔަރުވެ އިންސާނުންގެ ޞިއްޙަތަށް ނުރައްކާވާ މިންވަރަށް ވައި ނުސާފުވެފައިވާތީ ޢާންމުންދަނީ ލޯ ކެރުމާ ނޭވާލާން އުނދަނގޫވާކަމުގެ ޝަކުވާ ކުރަމުންނެވެ.
ވައިގެ ސާފުންމިން ދެނެގަތުމަށް ބަލާ މިންގަނޑުން ދައްކާ ގޮތުގައި ނިއު ދިއްލީގެ ވައިގެ ސާފުމިން މިހާރު ހުރީ 376ގައެވެ. މިއީ ވައިގެ ރައްކާތެރިކަމަށް ބަލާ މިންގަނޑުކަމަށްވާ 60އަށްވުރެ މާމަތީ ޢަދަދެކެވެ.