ރައީސުލްޖުމްހޫރިއްޔާ ކަމުގެ މަގާމާއި ރައީސުލްޖުމްހޫރިއްޔާގެ ނައިބު މަގާމަށް ކުރިމަތިލެވޭ އުމުރު ބަދަލު ކުރުމަށް ގާނޫނު އަސާސީއަށް ހުށަހަޅާފައިވާ އިސްލާހަށް މިއަދު މެންދުރު އެއްގަޑި ތިރީހުގައި ވޯޓަށްއަހާނެއެވެ.ރައީސްއާއި ނައިބު ރައީސްގެ މަގާމަށް ކުރިމަތިލެވޭ އުމުރަކީ 30 އަހަރާއި 65 އަހަރާ ދެމެދު ކަމަށް ކަނޑައެޅުމަށް ގާނޫނު އަސާސީއަށް ހޯރަފުށީ ދާއިރާގެ މެމްބަރު މުހައްމަދު އިސްމާއިލް ހުށައެޅުއްވި އިސްލާހު ކޮމިޓީން ދިރާސާކޮށް ނިންމިި ގޮތުގެ ރިޕޯޓަށް ބަހުސްކޮށްފައިވަނީ އެންމެ ދެ މެމްބަރުންނެވެ.އެއަށްފަހު ރިޔާސަތުންވަނީ، އެ އިސްލާހަށް ވޯޓަށް އެހުން އެއްގަޑި ތިރީހުގައި އޮންނާނެކަން އިއުލާން ކުރެއްވުމަށް ފަހު މަޖިލިސް މެދުކަނޑާލާފައެވެ.މިއިސްލާހަށް މިއަދު ވޯޓަށް އެހުމަށް ނިންމާފައިވާއިރު، އިދިކޮޅު އެމްޑީޕީ އާއި ޖުމްހޫރީ ޕާޓީ އިން ވަނީ އެއިސްލާހު ތާއީދުކުރުމަށް ތްރީ ލައިން ވިޕެއްނެރެފައެވެ.މިއީ ގާނޫނު އަސާސީއަށް ހުށައަޅާފައިވާ އިސްލާހެއްކަމުން މިއިސްލާހު ފާސްވުމަށް މަޖިލީހުގެ ހަތަރު ބައިކުޅަ ތިންބައި ވޯޓު ބޭނުންވާނެއެވެ. އެއީ 64 މެމްބަރުންގެ ވޯޓެވެ.ޕީޕީއެމާއި، އެމްޑީއޭގެ މެމްބަރުންގެ އަދަދަކީ 48ކެވެ. ޖުމްހޫރީ ޕާޓީގެ 11 މެމްބަރުންނާއި ، އެމްޑީޕީގެ ބާވީސް މެމްބަރުންގެ ވޯޓު ލިބިއްޖެނަމަ އެއިސްލާހު މިއަދު ފާސްވާނެއެވެ.