އޯގަސްޓްމަހުގެ އެއްވަނަ ދުވަހު ބޭއްވުމަށް ހަމަޖެހިފައިވާ ނުވަ ބައި-އިލެކްޝަނަށް ކުރިމަތިލުމުގެ މުއްދަތު އިތުރުކޮށްފިއެވެ.އިލެކްޝަންސް ކޮމިޝަނުން ކުރިން އިއުލާންކޮށްފައިވާގޮތުން، މި ބައި އިލެކްޝަންތަކަށް ކުރިމަތި ލުމުގެ ފުރުސަތު މިއަދު ހަމަވާނެއެވެ. ނަމަވެސް އެކޮމިޝަނުން މިހާރު ވަނީ ބައި އިލެކްޝަންތަކަށް ކުރިމަތިލުމުގެ ފުރުސަތު އަންނަ ބުރާސްފަތި ދުވަހުގެ މެންދުރު އެއްގަޑި ސާޅިސް ފަހަކާއި ހަމައަށް އިތުރުކޮށްދެއްވާފައެވެ.އިލެކްޝަންސް ކޮމިޝަނުން ނެރެފައިވާ ބަޔާނެއްގައި ބުނެފައިވަނީ އޯގަސްޓް އެކެއްގައި ބޭއްވުމަށް ހަމަޖެހިފައިވާ ނުވަ ބައި އިލެކްޝަނަށް ކުރިމަތިލުމުގެ ފުރުސަތު އިތުރުކުރުމަށް އެކޮމިޝަނުން ނިންމީ، ރަމަޟާން މަހުގެ ރަސްމީ ގަޑިއަކީ ދުވާލަކު ހަތަރު ގަޑިއިރުކަމަށްވާތީ، މި ބައި-އިލެކްޝަންތަކަށް ކުރިމަތިލުމަށް އެދޭ ފަރާތްތަކުން ފުރިހަމަ ކުރަންޖެހޭ ލިޔެކިޔުންތައް ފުރިހަމަ ކުރުމަށް އިތުރު ވަގުތު ބޭނުންވާކަމަށް ކޮމިޝަނަށް ފެންނާތީކަމަށެވެ.އޯގަސްޓް އެކެއްގައި ބޭއްވުމަށް ހަމަޖެހިފައިވާ ބައި-އިލެކްޝަންގެ ދާއިރާތަކަކީ ހއ. ދިއްދޫ ކައުންސިލް، ހއ. މުރައިދޫ ކައުންސިލް، ހދ. ނާވައިދޫ ކައުންސިލް، ށ. ކަނޑިތީމު ކައުންސިލް، ނ. ހެނބަދޫ ކައުންސިލް، ކ. މާފުށީ ކައުންސިލުގެ އިތުރުން ތ. މަޑިފުށީ ކައުންސިލް އަދި މ. އަތޮޅު ކައުންސިލްގެ ބައި އިލެކްޝަނެވެ.