އިންޑިއާގެ ބޮޑުވަޒީރު ނަރެންދްރަ މޯދީ އިސްކޮށް ހުންނެވި ބާރަތިޔާ ޖަނަތާ ޕާޓީ (ބީޖޭޕީ)އިން އެ ޤައުމުގެ ހުޅަނގުބިތުގައި އޮންނަ މަހަރަޝްތްރާ ސްޓޭޓްގެ ގިނަ ގޮނޑިތައް ކާމިޔާބުކޮށްފިއެވެ.
އިންޑިއާގެ އިލެކްޝަން ކޮމިޝަނުން ބުނެފައިވަނީ ސްޓޭސް އެސެމްބްލީގައި ހިމެނޭ 288 ގޮނޑީގެ ތެރެއިން 160 ގޮނޑި ބީޖޭޕީން މިހާރު ކަށަވަރުކޮށްފައިވާކަމަށެވެ. މިއީ އިންޑިއާގެ އެންމެ މުއްސަނދި ސްޓޭޓްގެ މައްޗަށް ބީޖޭޕީން ވެރިކަން ހިންގަން ލިބުނު ބޮޑު އަޣުލަބިއްޔަތެވެ.
ބީޖޭޕީއަށް މަހަރަޝްތްރާ ސްޓޭޓްގެ ގިނަ ގޮނޑިތައް ކާމިޔާބުކުރެވުނުކަމުގައި ވިޔަސް ހަރިޔާނާ ސްޓޭޓުން ކާމިޔާބުކުރެވިފައިވަނީ 38 ގޮނޑިއެވެ. ހަރިޔާނާގެ ސްޓޭޓް އެސެމްބްލީގައި 90 މެންބަރުން ތިބޭއިރު އިދިކޮޅު ކޮންގްރެސް ޕާޓީންވަނީ 31 ގޮޑި ކާމިޔާބުކޮށްފައެވެ. މިހެންވުމުން ބީޖޭޕީން ސަރުކާރެއް އެކުލަވާލުމަށް ކޮންމެވެސް އެހެން ޕާޓީއަކާއެކު ކޯލިޝަން ހަދަންޖެހޭނެއެވެ.
ޖަންނަޔަކް ޖަނަތާ ޕާޓީންވެސް ހަރިޔާނާ ސްޓޭޓްގެ ބައެއް ގޮނޑިތައް ހޯދާފައިވާއިރު އެ ޕާޓީން ކޯލިޝަން ހަދާނީ ކޮން ޕާޓީއަކާއެކުކަމެއް އަދި ހާމަކޮށްފައެއްނުވެއެވެ.