ޖޮންސަން ހުންނެވީ ވިލާތުގެ އިއްތިޙާދުން ބްރެކްސިޓްގެ ކަންކަން ނިންމާނެ ގޮތެއްގެ އިންތިޒާރުގަ!
ވިލާތުގެ އިއްތިޙާދުން އިނގިރޭސިވިލާތް ވަކިވުމަށް ބޮޑުވަޒީރު ބޮރިސް ޖޮންސަން މަޖިލީހަށް ހުށަހެޅުއްވި ބްރެކްސިޓްގެ އެއްބަސްވުން އެ ފަރާތުން ބަލައިގަތްނަމަވެސް އެ އެއްބަސްވުން ތިން ދުވަސްތެރޭގައި ފާސްކޮށްދިނުމަށް ޤާނޫނުހަދާ މަޖިލީހުން ދެކޮޅުހަދައިފިއެވެ.
މިކަމާއި ވިދިގެން ހޯމަދުވަހު ޖޮންސަން އިނގިރޭސި ޤާނޫނުހަދާ މަޖިލީހުގެ ތިރިގެ ހައުސް އޮފް ކޮމޮންސްގައި ވިދާޅުވެފައިވަނީ ވިލާތުގެ އިއްތިޙާދުން ބްރެކްސިޓްގެ ކަންތައް ނިންމަނީ ކޮންގޮތަކަށްތޯ ބަލަން އިންތިޒާރުގައި ހުންނެވިކަމަށެވެ. އިދިކޮޅު ލޭބަރ ޕާޓީގެ ލީޑަރު ޖެރެމީ ކޯބިންއަށް ޖޮންސަން ގޮވާލެއްވީ ބްރެކްސިޓްގެ ކަންކަން ނިންމާނެގޮތެއް ދެން އެފަރާތުން ބަޔާންކޮށްދިނުމަށެވެ.
އެކަމާއި ގުޅިގެން ނާއުންމީދުވެފައި ހުންނެވިކަން ހާމަކުރައްވަމުން ޖޮންސަން ވިދާޅުވީ މަޖިލީހުން ތިންދުވަހުގެ ތާވަލެއް އެކުލަވާލައިގެން ބްރެކްސިޓްގެ އެއްބަސްވުން ނިންމާދޭން ދެކޮޅުހެދިއިރު އެ އެއްބަސްވުންވަނީ ބަލައިގެންފައިކަމަށެވެ. ޖޮންސަން އިދިކޮޅު ޕާޓީތަކުގެ މެންބަރުންނަށް ޢަމާޒުކޮށް ވިދާޅުވީ ބްރެކްސިޓްގެ ކަންކަން ނިންމުމަށް އައު އިންތިޚާބެއް ބާއްވަން އެއްބާރުލުން ދިނުމަށެވެ. އިނގިރޭސިވިލާތުގައި އައު އިންތިޚާބެއް ބާއްވަން މަސައްކަތްކުރައްވާނެކަމަށް ޖޮންސަން ކުރިންވެސްވަނީ ވިދާޅުވެފައެވެ.
ވިލާތުގެ އިއްތިޙާދުން ތިންމަސްދުވަހުގެ މުއްދަތަށް ބްރެކްސިޓް ފަސްކުރަން ނިންމައިފިނަމަ އެންމެ ރަނގަޅު ގޮތަކީ އައު އިންތިޚާބެއް އެ މުއްދަތުގެ ތެރޭގައި ބޭއްވުންކަމަށް ޖޮންސަންވަނީ ވިދާޅުވެފައެވެ.
އިނގިރޭސި ރައްޔިތުންގެ މެދުގައި 2016ވަނަ އަހަރު ނެގުނު ފެންނަނުފެންނަ ވޯޓުން ވިލާތުގެ އިއްތިޙާދުން އިނގިރޭސިވިލާތް ވަކިވާން ނިންމިކަމުގައި ވިޔަސް އެކަން ކުރެވޭނެ މަގެއް ފާއިތުވީ ތިން އަހަރުގެ ތެރޭގައިވެސް ފެނިފައެއްނުވެއެވެ.