އެމެރިކާގެ ކޮންގްރެސްއިން ޔޫކްރެއިންއަށް އެހީގެ ގޮތުގައި ދޭން ނިންމާފައި އޮތް 391 މިލިއަން ޑޮލަރު ރައީސް ޑޮނަލްޑް ޓްރަމްޕް ހިފެހެއްޓެވި މައްސަލައިގައި ލޯރާ ކޫޕަރ ހެކިބަސްދެއްވައިފިއެވެ. ރައީސް ޓްރަމްޕް ޔޫކްރެއިންއަށް ދޭންއޮތް އެހީދިނުން ފަސްކުރުމަށް ނިންމިންމެވިއިރު ކޫޕަރ ހުންނެވީ ރަޝިޔާއާއި ޔޫކްރެއިން އަދި ޔޫރޭޝިޔާއަށް އެމެރިކާއިން ކަނޑައަޅާފައި ހުންނަވާ ޑެޕިއުޓީ އެސިންޓެންޓް ސެކްރެޓަރީ އޮފް ޑިފެންސްގެ މަޤާމުގައެވެ.
އެމެރިކާއިން ޔޫކްރެއިންއަށް ދޭން ނިންމި ފައިސާއަކީ ރަޝިޔާގެ އެހީގައި ޔޫކްރެއިންއިން ވަކިވެގަތުމަށް ހަނގުރާމަކުރަމުންދާ މީހުން ހުއްޓުވަން ދޭން ކޮންގްރެސްއިން ހަމަޖެއްސި ފައިސާއެވެ.
ޓްރަމްޕް މަޤާމުންދުރުކުމަށް ޤާނޫނުހަދާ މަޖިލީހުގެ ތިރިގޭގެ ކޮމިޓީތަކުން މިހާރު ކުރިއަށްގެންދާ ތަޙްޤީޤު ހިންގުމުގައި އެންމެ އިސްކޮށް ހުންނެވި ވިލިއަމް ޓޭލަރއަކީ އޭރު އެމެރިކާއިން ޔޫކްރެއިންއަށް ކަނޑައަޅާފައި ހުންނެވި އެމްބެސެޑަރެވެ. ޓޭލަރ ވިދާޅުވެފައިވަނީ ޓްރަމްޕް ބޭނުންފުޅުވާ ބައެއް ސިޔާސީ ކަންކަން ކޮށްދިނުމުން ނޫންގޮތަކަށް ޔޫކްރެއިންއަށް ދޭން ކަނޑައެޅުނު އެހީނުދޭނެކަމަށް ޓްރަމްޕް ފާޅުގައި ވިދާޅުވިކަމަށެވެ.
2020ވަނަ އަހަރު ރައީސް ޓްރަމްޕް ރިޔާސީ އައު ދައުރަކަށް ކުރިމަތިލައްވާއިރު އޭނާ މަޤާމުން ދުރުކުރުމަށް ހިންގޭ ތަޙްޤީޤުތަކާހުރެ މަޤާމު ގެއްލިދާނެކަމުގެ ބިރުވަނީ ހީވެފައެވެ.
ހެކިބަސް ދެއްވުމަށް ކޫޕަރ ކެޕިޓޯލްއަށް ވަޑައިގެންނެވިއިރު ނޫސްވެރިން ކުރަމުންދިޔަ އެއްވެސް ސުވާލަކަށް އޭނާ ޖަވާބެއް ނުދެއްވައެވެ. ކޫޕަރ އޭނާގެ އަމިއްލަ އިޚްތިޔާރުން ޤާނޫނުހަދާ މަޖިލީހުގެ ކުރިމައްޗަށް ހާޒިރުވުން ޕެންޓެގަންއިންވެސް މަނާކޮށްފައެއްނުވެއެވެ.