އީރާނުން ސަޢޫދީ ޢަރަބިއްޔާއާއި އޮންނަ ދެކޮޅުވެރިކަން ދޫކޮށް ގަލްފު ސަރަޙައްދުގައި އެދެވޭ ދައުރެއްއަދާކުރާނެކަމަށް އުންމީދުކުރާކަމަށް ސަޢުދީން ބުނެފިއެވެ.
ޗައިނާ ސެންޓްރަލް ޓެލެވިޜަން (ސީސީޓީވީ)އަށް ދެއްވި ބަސްދީގަތުމެއްގައި ސަޢުދީގެ ސިޔާސީ މަޝްރަޙު ދިރާސާކުރައްވާ ހަނީ ވައްފާ ވިދާޅުވީ ދެ ޤައުމުގެ ދެމެދު މެދުވެރިއްގެ ރޯލުއަދާކޮށްދިނުމަށް ރަޝިޔާއާއި ޕާކިސްތާނުން ހުށަހަޅާފައިވާކަމަށެވެ. ނަމަވެސް އެފަދަ ވާހަކަތަކުން ދެ ޤައުމުގެ ދެމެދުގައި އޮތް ހަތުރުވެރިކަން ކުޑަކުރެވޭނެކަމުގެ އުންމީދު ވަރަށްކުޑަކަމަށް ވައްފާވަނީ ވިދާޅުވެފައެވެ. އީރާނާ ސަޢުދީ ޢަރަބިއްޔާގެ މެދުގައި އޮތް މައްސަލަތަކަށް ޙައްލެއް ހޯދަން އުޅޭއިރު އެކަމުގައި އެމެރިކާގެ ފިއްތުންތައްވެސް ކުރިމަތިވާނެކަމަށް އޭނާ ވިދާޅުވިއެވެ. ގަލްފު ސަރަޙައްދަށް ހަމަޖެހުމާއި ފާގަތިކަން ގެނައުމަށް އީރާނުން އަވަށްޓެރި ޤައުމުތަކާމެދު ގެންގުޅޭ ސިޔާސަތަށް ބަދަލުގެންނަންޖެހޭކަމަށް ވައްފާ ވިދާޅުވިއެވެ.
އީރާނާ ސަޢުދީ ޢަރަބިއްޔާއާއި ދެމެދު މައްސަލަ ހޫނުވެފައިވަނީ މިދިޔަ ސެޕްޓެމްބަރު މަހުގެ 14ވަނަ ދުވަހު ސަޢުދީގެ ތެޔޮއުފައްދާ މަރުކަޒުތަކަށް ޔަމަނުގެ ހޫޘީން ދިން ޑްރޯން ޙަމަލާތަކާ ގުޅިގެންނެވެ. އެ ޙަމަލާގެ ތުޙުމަތު ސަޢުދީން ކުރަނީ އީރާނުގެ މައްޗަށެވެ. ނަމަވެސް އީރާނުން ބުނެފައިވަނީ އެ ޤައުމުން އެފަދަކަމެއް ނުކުރާކަމަށެވެ.
ގަލްފް ކޯޕަރޭޝަން ކައުންސިލް (ޖީސީސީ)ގެ ޤައުމުތަކުގެ ސަލާމަތާއި ރައްކާތެރިކަމާ ގުޅޭގޮތުން ސަޢުދީ ޢަރަބިއްޔާގެ ވެރިރަށް ރިޔާޟްގައި ހޯމަދުވަހުވަނީ ޗީފް އޮފް ސްޓާފުންގެ މަހާސިންތާއެއް ބާއްވާފައެވެ. އެ ބައްދަލުވުމަށް ދަޢުވަތު އަރުވާފައިވާ ޤައުމުތަކުގެ ތެރޭގައި ޕާކިސްތާނުގެ އިތުރުން ބައެއް ހުޅަނގުގެ ޤައުމުތަކާއި އެހެނިހެން ޢަރަބި ޤައުމުތައް ހިމެނެއެވެ.