އެމެރިކާގެ ޑިފެންސް ސެކްރެޓަރީ މާކް އެސްޕަރ އަފްޣާނިސްތާނަށް ވަޑައިގެންފިއެވެ.
އެސްޕަރ ކާބުލްއަށް ވަޑައިގަތުމާއެކު އޭނާއާއި އެންމެ ފުރަތަމަ ބައްދަލުކުރެއްވީ އަފްޣާނިސްތާނުގެ ޑިފެންސް މިނިސްޓަރު އަސަދުﷲ ޚާލިދެވެ. އެސްޕަރ މިހާރުވަނީ އަފްޣާނިސްތާނުގެ ރައީސް އަޝްރަފް ޣަނީއާއި ބައްދަލުކުރައްވާ މަޝްވަރާކުރައްވާފައެވެ. ޕެންޓެގަންގައި އެންމެ އިސްކޮށް ހުންނަވާ އެސްޕަރ އަފްޣާނިސްތާނަށް ވަޑައިގެންފައިމިވަނީ ޠާލިބާނުންނާއެކު ކުރިން ބާއްވަމުންދިޔަ ޞުލްޙައިގެ ވާހަކަތައް އަލުން ފެށޭނެގޮތެއްވޭތޯ ބެލުމަށެވެ.
އެމެރިކާގެ ތާރީޚުގައި އެ ޤައުމުން ކުރަމުންއައި އެންމެ ދިގު ހަނގުރާމަ ނިމުމަކަށް ގެނައުމަށް ޠާލިބާނުންނާ ކުރެވެމުންދިޔަ ޞުލްޙައިގެ މަޝްވަރާތައް ރައީސް ޑޮނަލްޑް ޓްރަމްޕްވަނީ ކުއްލިގޮތަކަށް މެދުކަނޑާލައްވާފައެވެ. ޠާލިބާނުންނާއެކު ޤާއިމުކުރާ ޞުލްޙައިގެ އެއްބަސްވުމެއްގެ ދަށުން އަފްޣާނިސްތާނުގައި ތިބި އެމެރިކާގެ ސިފައިން އެ ޤައުމުން ބޭލުމަށް އެމެރިކާއިން ބޭނުންވެއެވެ. ނަމަވެސް އެފަހަރު ދެކެވެމުންދިޔަ ވާހަކަތައް ހުއްޓުމަކަށްއައީ ޠާލިބާނުން ކާބުލްގައި ދިން ބޮމުގެ ޙަމަލާއެއްގައި އެމެރިކާ ސިފައިންގެ މީހަކު މަރުވެ، އިތުރު އެގާރަ މީހުން މަރުވުމާއި ގުޅިގެންނެވެ.
އެސްޕަރ ކާބުލްއަށް ވަޑައިގެންނެވިއިރު އެމެރިކާއިންވަނީ ސޫރިޔާގައި ތިބި އެ ޤައުމުގެ ސިފައިން ކުއްލިގޮތަކަށް ބާލަން ނިންމައި، ބޭރު ޤައުމުތަކުގައި ހިނގަމުން އަންނަ ހަނގުރާމަތަކުން އެއް ފަރާތްވުމުގެ ވިސްނުމެއް ގެންގުޅޭކަން އިޢުލާނުކޮށްފައެވެ.