އިސްރާއީލުން ހިފާފައިވާ ހުޅަނގު އައްސޭރީގައި ޔަހޫދީ އާބާދީތައް ބިނާކުރުމާ ދެކޮޅަށް ފަލަސްޠީނު މީހުން މުޒާހަރާކޮށްފިއެވެ. މުޒާހަރާކުރަން އެއްވި މީހުން ރޫޅާލުމަށް އިސްރާއީލު ސިފައިންވަނީ ކަރުނަގޭހާއި ރަބަރުވަޒަން ބޭނުންކޮށްފައެވެ.
ތަރުމޫސްއައްޔާ އަވަށުގައި މުޒާހަރާކުރަމުންދިޔަ އެތައްސަތޭކަ މީހުންނާއި ދެކޮޅަށް ޔަހޫދީ ސިފައިން ބާރުގެ ބޭނުންކުރުމުގެ ސަބަބުން 12މީހުން ޒަޚަމްވެފައިވެއެވެ އިސްރާއީލާއި ފަލަސްޠީނުގެ މީހުން ޞުލްޙަވެރިކުރުވުމަށް އެޅިފައިވާ އެންމެ ބޮޑު ހުރަހަކީ ޔަހޫދީ އާބާދީތަކުގެ މައްސަލައެވެ. ފަލަސްޠީނު މީހުން ބުނަމުންދަނީ މިފަހަކަށްއައިސް އިސްރާއީލުގެ ޔަހޫދީން ފަލަސްޠީނު ޢަރަބިންގެ ބިންތަކުގައި ވަޒަންވެރިވަމުންދާތީ އެމީހުންނަށް ދަޢުލަތެއް ބިނާކުރާނެ ބިމެއް ފަހުން ނުލިބޭނެކަމަށެވެ.
ގިނަ ޤައުމުތަކުން ޤަބޫލުކުރާގޮތުގައި 1967ވަނަ އަހަރުގެ ހަނގުރާމައިގައި އިސްރާއީލުން ހިފާފައިވާ ބިންތަކުގައި ޔަހޫދީން ވަޒަންވެރިކުރުވުމަކީ ބައިނަލްއަޤްވާމީ ޤާނޫނުތަކާ ޚިލާފުކަމެކެވެ. 2.6 މިލިއަން ފަލަސްޠީނު މީހުން ދިރިއުޅޭ ހުޅަނގު އައްސޭރިއާއި އިރުމަތީ ޤުދުސްގައި ފަސްލައްކައަށްވުރެ ގިނަ ޔަހޫދީންވަނީ ވަޒަންވެރިވެފައެވެ.