ރަމަޟާން މަހަކީ ކީރިތި ޤުރްއާން ބާވައިލެއްވި މައްސަރުކަމަށްވާތީ، ކީރިތި ޤުރްއާނަށް އިތުރު އަހަންމިއްޔަތުކަމެއް ދެއްވައި، މި މައްސަރުގެ ދުވަސްތަކާއި ރޭތަކުގެ ބޭނުން ހެޔޮގޮތުގައި ހިފުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިލްތިމާސްކުރައްވައިފިއެވެ.ރައީސުލްޖުމްހޫރިއްޔާ މިކަމަށް އިލްތިމާސް ކުރެއްވީ ބަރަކާތްތެރި ރަމަޟާން މަސް ފެށުމުގެ މުނާސަބަތުގައި، ފޮނުއްވި ޚިޠާބުގައެވެ.ރައީސުލްޖުމްހޫރިއްޔާގެ މިޚިޠާބުގައި ބަރަކާތްތެރި ރަމަޟާންމަސް އަޅުގަނޑުމެންނާ ބައްދަލުކުރުމުގެ ހެޔޮތައުފީޤު މިންވަރުކުރެއްވި ކަމަށްޓަކައި ﷲ ސުބުހާނަހޫ ވަތައާލާގެ ޙަޟްރަތަށް ޙަމްދާއި ޝުކުރުދަންނަވާ މި މާތް މައްސަރުގެ އިޚްލާޞްތެރި ތަހުނިޔާ، ރާއްޖޭގެ އެންމެހައި ލޮބުވެތި ރައްޔިތުންނަށް ފޮނުއްވާފައިވެއެވެ. އަދި އިސްލާމީ ޤައުމުތަކުގެވެރިންނަށާއި، ބައިނަލްއަޤްވާމީ އިސްލާމީ ޖަމްޢިއްޔާ ޖަމާޢަތްތަކުގެ ވެރިންނަށްވެސް މި މުނާސަބަތުގެ ރައީސުލްޖުމްހޫރިއްޔާ ތަހުނިޔާ ފޮނުއްވާފައިވެއެވެ.ރަމަޟާންމަހަކީ، މާތްﷲ އިސްލާމީ އުންމަތަށް މިންވަރު ކުރައްވާފައިވާ ވަރަށް މަތިވެރި ރޫޙާނީ މައްސަރެއް ކަމަށާއި ރަމަޟާން މަހަކީ މާތްﷲގެ ރަޙްމަތާއި އެކަލާނގެ މަޣުފިރަތު، އަޅުގަނޑުމެންގެ މައްޗަށް އޮހެމުންދާ މައްސަރުކަން ބަޔާންކުރައްވަމުން މިއީ މާތްﷲ އިސްލާމީ އުންމަތަށް ދެއްވާފައިވާ ވަރަށް ބޮޑު ރަޙްމަތަކާއި ނިޢުމަތެއް ކަމަށް މިޚިޠާބުގައި ބަޔާންކުރައްވާފައިވެއެވެ. އެހެންކަމުން، މި މާތް މައްސަރުގެ ހެޔޮދަރުމަލިބިގަނެ، ރޯދައިގެ މަތިވެރި ވާޖިބުއަދާކޮށް، ޞަދަޤާތްދީ، ހެޔޮކަންތައްތައް އިތުރުކުރުމަކީ، އަޅުގަނޑުމެންގެ މައްޗަށް އޮތްވާޖިބެއް ކަމަށް ވިދާޅުވެފައިވެއެވެ. އަދި އެމަނިކުފާނުގެ އުންމީދަކީ، މިފެށުނު ބަރަކާތްތެރި ރަމަޟާންމަހަކީ، ހުރިހާ ގޮތަކުންވެސް ރާއްޖޭގެ ރައްޔިތުންނަށް ބާއްޖަވެރި އަދި އުފާވެރި މަހަކަށް ވެގެންދިޔުން ކަމަށްވެސް ބަޔާން ކުރައްވާފައިވެއެވެ.ރަމްޟާން މަހުގެ ރޭތައް އިހްޔާކުރުމުގެ ގޮތުން ސަރުކާރުން ބާއްވާ އިހްޔާ ކުރުމުގެ ފުރަތަމަ ޖަލްސާ މާދަމާރޭ ނުވައެއް ޖަހާއިރު އިސްލާމީ މަރުކަޒުގެ ޖަލްސާކުރާ މާލަމްގައި ބޭއްވުމަށް ވަނީ ހަމަޖެހިފައެވެ. އަދި މައުމޫމް ފައުންޑޭޝަންގެ ފަރާތުން ރަމްޟާންމަހުގެ ރޭތައް އިހްޔާ ކުރުމަށް ބާއްވާ ސިލްސިލާ ޖަލްސާތައް ކޮންމެ ހޯމަދުވަހެއްގެ ރޭ ދިހައެއް ޖަހާއިރު އިސްލާމީ މަރުކަޒުގެ ޖަލްސާ ކުރާ މާލަމުގައި ބާއްވާނެ ކަމަށް މައުމޫން ފައުންޑޭޝަނުން މައުލޫމާތުދެއެވެ.