ޤާނޫނު އަސާސީން ރައްޔިތުންނަށް ލިބިދީފައިވާ ޙައްޤުތަކަކީ އިސްލާމްދީނުގެ ތަރަހައިގެ ތެރެއިން ދީފައިވާ ޙައްޤުތަކެއްކަމަށާއި، އެ ތަރަހައިން ބޭރުވެ ނަފްރަތު އުފައްދާ ފަރާތްތަކާމެދު ފިޔަވަޅު އަޅުއްވާނެކަމަށް ފޮރިން މިނިސްޓްރީން ވިދާޅުވެއްޖެއެވެ. މިނިސްޓްރީން މިހެން ވިދާޅުވީ، އިސްލާމްދީނާއި ކީރިތި ރަސޫލާއަށް ފުރައްސާރަކޮށް މޯލްޑިވިއަން ޑިމޮކްރަސީ ނެޓްވޯކް އިން ޢާންމުކުރި ރިޕޯޓް ކުށްވެރިކޮށް ނެރުނު ބަޔާނެއްގައިއެވެ.
އިނގިރޭސި ބަހުން ޢާންމުކުރި މި ބަޔާނުގައި ފޮރިން މިނިސްޓްރީން ވިދާޅުވީ، ޤާނޫނު އަސާސީން ރައްޔިތުންނަށް ލިބިދީފައިވާ ޙައްޤުތައް ހަމަހަމަކަމާއެކު ލިބެމުންދާކަން ދިވެހި ސަރުކާރުން ކަށަވަރުކުރާނެކަމަށެވެ. ޤާނޫނު އަސާސީން ދިވެހިންނަށް ކަށަވަރުކޮށްދޭ އެންމެހާ ޙައްޤުތަކަކީ އިސްލާމްދީނުގެ ތަރަހައިގެ ތެރެއިން ލިބިދީފައިވާ ޙައްޤުތަކެއްކަމަށް ހަނދާންކޮށްދެމުން ފޮރިން މިނިސްޓްރީގެ ބަޔާނުގައި ވަނީ މޯލްޑިވިއަން ޑިމޮކްރަސީ ނެޓްވޯކުން ޢާންމު ކުރި ރިޕޯޓްގައި އިސްލާމްދީނާއި ރަސޫލަށް ފުރައްސާރަކޮށްފައިވުމަކީ ދިވެހި ސަރުކާރުން ބަލައިގަންނަ ކަމެއްނޫންކަމަށެވެ.
އެ ޖަމްޢިއްޔާ ސަސްޕެންޑްކޮށް މިހާރު ފިޔަވަޅު އަޅާފައިވާކަމަށާއި އެ ޖަމްޢިއްޔާ ސަސްޕެންޑްކޮށްފައިވަނީ މިހާރު ކުރިއަށްދާ ތަޙުޤީޤު ނިމެންދެންކަމަށްވެސް ފޮރިން މިނިސްޓްރީގެ ބަޔާނުގައިވެއެވެ. އަދި އިސްލާމްދީނަށް ފުރައްސާރަކުރުމާއި، ދީނުގެ ނަމުގައި ނަފްރަތު އުފެއްދުމަށާއި، އިންޒާރުދޭ ފަރާތްތަކާމެދު ޤާނޫނީ ގޮތުން އޮންނަ ފިޔަވަޅު އަޅާނެކަމަށްވެސް ފޮރިން މިނިސްޓްރީގެ ބަޔާނުގައިވެއެވެ.
ޔޫތު މިނިސްޓްރީން މިއަދު ވަނީ އެމްޑީއެން ސަސްޕެންޑްކޮށްފައިވަނިކޮށް އެ ޖަމާއަތުގެ ހަރަކާތައް ހުއްޓުވާފައެވެ. އެ ޖަމްޢިއްޔާ ސަސްޕެންޑްކޮށްފައިވަނީ އިސްލާމްދީނަށް ފުރައްސާރަކޮށް ޢާންމު ކުރި ރިޕޯޓާއި ގުޅިގެން އެ ޖަމްޢިއްޔާއަށާއި، އެ ޖަމްޢިއްޔާގެ ވެރިންނަށް ފިޔަވަޅު އެޅުމަށް ޢާންމުން ގޮވާލަމުން އަންނަނިކޮށެވެ. ގިނަ ބަޔަކު ދަނީ އެމްޑީއެން އުވާލުމަށް ގޮވާލަމުންނެވެ.