މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) އިން ރަސޫލާއަށާއި އިސްލާމްދީނަށް ފުރައްސާރަކޮށް ނެރުނު ރިޕޯޓާއި ގުޅިގެން ރާއްޖޭގެ ދީނީ އެއްބައިވަންތަކަމާއި، އަމަންއަމާންކަން ދެމެހެއްޓުމަށްޓަކައި ޤާނޫނީ ގޮތުން އަޅާންޖެހޭ ފިޔަވަޅުތައް، އަޅުއްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެމްޑީއެންގެ ރިޕޯޓާއި ގުޅިގެން ރައީސުލްޖުމްހޫރިއްޔާ މިއަދު ޢާންމު ކުރެއްވި ބަޔާނުގައި ވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގައި ދިވެހި ދައުލަތުގެ ދީނަކީ އިސްލާމް ދީންކަމަށާއި، އިސްލާމް ދީނަކީ ރާއްޖޭގެ ޤާނޫނުގެ މައިގަނޑު މަޞްދަރުކަމުގައި ބަޔާންކޮށްފައި ވީހިނދު، މާތްވެގެންވާ އިސްލާމްދީނުގެ ތަރަހައިގެ ތެރޭގައި ވެރިކަން ހިންގައި، އެ ދީން ޙިމާޔަތްކުރުމަކީ، ދިވެހިރާއްޖޭގެ
އެންމެ މަތީ ވެރިޔާއާ ޤާނޫނުއަސާސީން މަތިކޮށްފައިވާ ޒިންމާއެއްކަމަށެވެ.
އެހެންކަމުން އެމަނިކުފާނުގެ އެންމެ އިސް ވާޖިބަކީ އެ މަތިވެރި ޒިންމާ އަދާކުރުންމަތީ ދެމިހުރުންކަމަށް ރައީސް ވިދާޅުވެފައިވެއެވެ.
ރައީސް ވިދާޅުވީ މޯލްޑިވިއަން ޑިމޮކްރަސީ ނެޓްވޯރކް އިން 2015 ވަނަ އަހަރު، ”ޕްރިލިމިނަރީ އެސެސްމަންޓް އޮން ރެޑިކަލައިޒޭޝަން އިން ދަ މޯލްޑިވްސް، ގެ ނަމުގައި ޝާއިޢުކޮށްފައިވާ ރިޕޯޓުގައި އިސްލާމުދީނުގެ އަޞްލުތަކާ ފުށުއަރާ އަދި އިސްލާމްދީނަށާއި، ކީރިތި ރަސޫލާއަށް ތަވްހީނުވާފަދަ ބައެއް ވާހަކަތައް ހިމަނާފައިވުމަކީ، ބަލައިގަނެވޭނެ ކަމެއް ނޫންކަމަށެވެ.
އެހެންކަމުން މި މައްސަލަ ބަލައި، ދިވެހި މުޖްތަމަޢުގައި ޤާއިމްވެފައިއޮތް ހަމަޖެހުމާއި، ދީނީ އެއްބައިވަންތަކަމާއި، އަމަންއަމާންކަން ދެމެހެއްޓުމަށްޓަކައި ޤާނޫނީ ގޮތުން އަޅަންޖެހޭ ފިޔަވަޅުތައް، އަޅަމުން ގެންދަވާނެކަމަށް ރައީސް ވަނީ ވިދާޅުވެފައެވެ.
ހަމައެއާއެކު، ދީނީ ޝީޢާރު ފާޅުކުރުމުގައާއި، ޤާނޫނުއަސާސީ ކަށަވަރުކޮށްދޭ އަސާސީ ޙައްޤުތަކުގެ ބޭނުން ހިފުމުގައި، މުޅި މުޖުތަމަޢުގެ މަޞްލަޙަތު އިސްކޮށް، އިސްލާމްދީނުގެ މަތިވެރި އަސާސްތަކާ ޚިލާފުނުވުމަށް އެންމެހައި ފަރާތްތަކަށް ރައީސުލްޖުމްހޫރިއްޔާ ވަނީ އިލްތިމާސްކުރައްވާފައެވެ.
އެމްޑީއެންގެ ރިޕޯޓުގައި ކީރިތި ރަސޫއަށާއި، ކީރިތި ޤުރުއާނާއި އިސްލާމްދީނަށް ފުރައްސާރަކޮށްފައިވާތީ ގިނަ ބަޔަކު ދަނީ އެ ޖަމްޢިއްޔާ އުވާލާ، އެ ޖަމްޢިއްޔާގެ ވެރިންނާމެދު ފިޔަވަޅު އެޅުމަށް ގޮވާލަމުންނެވެ. އަދި ސަރުކާރުން މިކަމުގައި އަވަސް ފިޔަވަޅުތަކެއް އެޅުމަށްވެސް ގޮވާލާފައިވެއެވެ.