ޢުސޫލަށް ބަދަލުގެނެސް ޢުމްރާއަށް މީހުން ގެންދިއުމަށް ޕްރޮޕޯސަލް ހުށަހެޅުމުގެ ފުރުޞަތު ހުޅުވާލައިފި
ރާއްޖެއިން ޢުމްރާއަށް މީހުން ގެންދިއުމަށް ހުއްދަ ދިނުމުގެ އުސޫލަށް ބަދަލު ގެނެސް ހުއްދައަށް އެދި ޕްރޮޕޯސަލް ހުށައެޅުމުގެ ފުރުޞަތު ހުޅުވާލައިފިއެވެ.
އިސްލާމިކް މިނިސްޓްރީން ވިދާޅުވީ ޢުމްރާއަށް މީހުން ގެންދިއުމުގެ ހުއްދައާ ބެހޭ ޕްރޮޕޯސަލް ފޮތް މި މަހުގެ 16 ވަނަ ދުވަހުގެ ނިޔަލަށް ގަންނަން ލިބޭނެކަމަށެވެ. އަދި ޕްރޮޕޯސަލް ހުށަހެޅުމުގެ ފުރުޞަތު މި މަހުގެ 13 ވަނަ ދުވަހުން ފެށިގެން މި މަހުގެ 17 ވަނަ ދުވަހުގެ ނިޔަލަށް ފުރުޞަތު އޮންނާނެކަމަށެވެ. ޕްރޮޕޯސަލް ފޮތުގެ އަގަކީ ފަސްހާސްރުފިޔާއެވެ.
އުމްރާއަށް މީހުން ގެންދެވޭނީ 100 އިންސައްތަ ދިވެހިންގެ ހިއްސާ އޮންނަ ކުންފުނިތަކަށެވެ. އަދި ޢުމްރާއަށް މީހުން ގެންދިއުމަށް ހުށަހަޅަން ބޭނުންވާ ކޮންމެ ކުންފުންޏަކުންވެސް އެކަމުގެ ހުއްދައަށް އެދޭއިރު ކުންފުނީގެ މަޢުލޫމާތާއި، ޢުމްރާއަށް މީހުން ގެންދިއުމަށް އެދޭ އަދަދާއި، ޢުމްރާއަށްމީހުން ގެންދިއުމުގައި އެކުންފުންޏަކުން ޢަމަލުކުރާނެގޮތުގެ މުހިންމު ނުކުތާތައް އެކުލެވޭ ޕްރޮޕޯސަލެއް އިސްލާމިކް މިނިސްޓްރީއަށް ހުށަހަޅަންޖެހެއެވެ.
މިއަހަރުގެ ކުރީކޮޅު އިސްލާމިކް މިނިސްޓްރީން ވަނީ ޢުމްރާއަށް މީހުން ގެންދިޔުމުގެ ހުއްދަ 25 ކުންފުންޏަކަށް ދީފައެވެ. މި 25 ކުންފުންޏަށް ހުއްދަ ދޫކޮށްފައިވަނީ ދެއަހަރު ދުވަހުގެ މުއްދަތަށްކަމަށެވެ. މީގެކުރިން ހުއްދަ ދޫކުރަމުން އައިސްފައިވަނީ އެއް އަހަރުގެ މުއްދަތަށެވެ.
އިސްލާމިކް މިނިސްޓްރީން ވިދާޅުބީ ރާއްޖެއިން ޢުމްރާއަށް މީހުން ގެންދިއުމަށް ހުއްދަ ދިނުމުގެ އުސޫލަށް ބަދަލުގެނައި ނަމަވެސް މި ފަރާތްތަކުގެ ހުއްދަ ބާޠިލް ނުވާނެކަމަށެވެ.