ޢުމުރުން ދުވަސްވީ މީހުން ބެލެހެއްޓުމަށްޓަކަޢި ރާއްޖޭގެ ދެ ސަރަޙައްދެއްގައި ދެ މަރުކަޒު ހަދަން ހަމަޖެހިފައިވާކަމަށް މިނިސްޓަރ ޖެންޑަރ ފެމެލީ، އެންޑް ސޯޝަލް ސަރވިސަސް ޝިދާތާ ޝަރީފް ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މިނިސްޓަރ ވިދާޅުވީ މި ސެންޓަރުތައް އެޅުމަށް ހަމަޖެހިފައިވަނީ ގްރޭޓަރ މާލެ ސަރަހައްދާއި ދެކުނުގެ ސަރަޙައްދެއްގައިކަމަށެވެ. އެހެންނަމަވެސް އެމަރުކަޒުތައް އަޅާނެ ރަށްތަކެއް މިނިސްޓަރ ވިދާޅެއްނުވެއެވެ. އެކި ދާއިރާތަކުން ސަރުކާރުން ޙާސިލްކުރަން ބޭނުންވާ ކަންކަން ހިމަނައިގެން، އިޢުލާންކުރި 4 އަހަރުގެ "ސްޓްރެޓެޖިކް އެކްޝަން ޕްލޭން"ގައިވެސް ވަނީ 2023ވަނަ އަހަރުގެ ނިޔަލަށް އުމުރުން ދުވަސްވީ މީހުންނަށް ޚާއްސަކޯށްގެން މަދުވެގެން އެއް ރެޒިޑެންޝަލް ހޯމް، ޕަބްލިކް ޕްރައިވެޓް ޕާޓްނާޝިޕްގެ ދަށުން ޤާއިމްކޮށް ޚިދުމަތް ދޭން ފެށުމަށް ވަނީ އަމާޒުހިފާފައެވެ.
މިނިސްޓަރ ޝިދާތާ ވިދާޅުވީ ޢުމުރުން ދުވަސްވީ މީހުންނަށް އެންމެ އެކަށޭނެ މަރުކަޒުތައް ޤާއިމްކުރުމަށް ކުރަންޖެހޭ މަސައްކަތްތައް މިހާރުވެސް ކުރަމުންގެންދަވާނެކަމަށެވެ. މިގޮތުން މިތަންތަން ތަރައްޤީ ކުރުމަށް ހަމަޖެހިފައިވަނީ އުމުރުން ދުވަސްވީ މީހުންނަށް އެސެންޓަރުތަކުގައި ތިބިގެންވެސް މުޖުތަމަޢުއަށް ފައިދާ ކުރުވަނިވި ކަންކަންކުރެވޭނެ ގޮތްތަކަށް ބިނާކުރުންކަމަށާއި އެތަންތަނަކީ އުމުރުން ދުވަސްވީ މީހުން ބަންދުކޯށްގެން ގެންގުޅޭ ތަނަކަށް ނުހަދާނެކަމަށެވެ. އަދި އެތަންތަނުގެ ޚިދުމަތް ދެމުންގެންދާނީ ދުނިޔޭގެ އެހެންތަންތަނުގައިވެސް މިފަދަ މަރުކަޒުތަކުގައި ޚިދުމަތްދެމުންދާ އުޞޫލުންކަމަށް މިނިސްތަރ ވިދާޅުވިއެވެ.
"މިފަދަ މަރުކަޒުތަކަށް ލާފަތިބޭ މީހުންނަކީ ހަމައެކަނި އެތަނުގައި ބައިތިއްބާ މީހުންގެ ބަދަލުގައި އެމީހުންގެ ފައިދާ އެހެންމީހުންނަށް ލިބޭނެ ގޮތަށް ފަރުމާކުރުމަކީ އަމާޒެއް. ޢއިލީ ތެރެއިން ދުރުކުރުވުމަކީ ބޭނުންވާކަމެއް ނޫން. އެހެންކަމުން ވަޒީފާއަށް ދާ ފަރާތްތަކުންވެސް ކުޑަވަގުތުކޮޅަކަށް އެ ސެންޓަރުތަކަށް ބެލުމަށް ހަވާލުކޮށްފަވެސް ދެވޭނެ."މިނިސްޓަރ ޝިދާތާ ވިދާޅުވިއެވެ.
މިނިސްޓަރ ވިދާޅުވީ މިފަދަ ތަންތަނުގެ ސަބަބުން މުޖުތަމަޢުއަށްވެސް ފައިދާ ކުރާނެކަމަށް. މިގޮތުން އެ ސެންޓަރުތައް ޑޭކެއަރ ސެންޓަރުތަކެއްގެ ގޮތުގައިވެސް ބޭނުންކުރެވިގެންދާނެކަމަށެވެ. އަދި މިކަމަކީ ބިޒީ ލައިފެއްގައި ދިރިއުޅޭ ފަރާތްތަކަށް ފައިދާކޮށް ލުއިފަސޭހަވެގެންދާނެކަމަށް މިނިސްޓަރ ވިދާޅުވިއެވެ. އަދި މިފަދަ މީހުން ބެލެހެއްޓުމަށްޓަކައި މިހާރުވެސް މީހުން ތަމްރީން ކުރުމުގެ މަސައްކަތް ކުރަމުންދާކަމަށެވެ.
" އަޅުގަނޑުމެން ނުވިސްނަން އުމުރުން ދުވަސްވީ ކޮންމެ މީހަކީ ތަނެއްގައި ހަމައެކަނި އިށީދެގެން ދުވަސްދުއްވާލާނެ މީހެއްގެ ގޮތުގައި ބައިދަން. އެމީހުންގެ ވިސްނުމާ އެއްފެންވަރަށް އިތުރުކަންތައްތަވެސް ކުރުވާނަން."ޝިދާތާ ވިދާޅުވިއެވެ.
އެކި ސަބަބުތަކާހެދި ދައުލަތުގެ ފަރާތުން ބަލަހައްޓަމުން ގެންދާ އުމުރުން ދުވަސްވީމީހުން ބޭތިއްބުމަށް މިހާރު ގުރައިދޫގައި ޤާއިމުކޮށްފައިވާ މަރުކަޒުގައި އެފަރާތްތަކަށް އެންމެ އެކަށީގެންވާ ޚިދުމަތްތައް ލިބެމުން ނުދާކަމަށް ސަރުކާރުން ވިދާޅުވެއެވެ.
ޢުމުރުން ދުވަސްވީ މީހުންނަށް އިހުމާލުވުމުގެ މައްސަލަތައް މިނިސްޓްރީއަށް ކޮންމެ އަހަރަކުވެސް ލިބެމުންދާއިރު އަހަރެއްގެ މައްޗަށް އެވްރެޖުކޮށް 70 އަށްވުރެ ގިނަ މައްސަލަ ހުށައަޅާކަމަށް ޖެންޑަރ މިނިސްޓްރީގެ ތަފާސްހިސާބުތަކުން ދައްކައެވެ. އެގޮތުން ގެވެށި އަނިޔާއާއި އަޅާނުލުމުގެ މައްސަލަތައް އިތުރުވަމުން އަންނައިރު މިކަންކަމުން މުޖުތަމަޢު ދުރުހެލިކުރުމަށް ހޭލުންތެރިކަން އިތުރުކޮށް ހެޔޮލަފާ މަޖުތަމަޢެއް ބިނާކުރުމަށް މަސައްކަތްކުރަމުން އަންނަކަމަށް މިނިސްޓްރީން ވިދާޅުވެއެވެ.