ނަފްސާނީ ދުޅަހެޔޮކަމަށް ހޭލުންތެރިކުރުވުމަށް ޚާއްޞަ ހިނގާލުމެއް - އެންމެނަށްވެސް ބައިވެރިވެވޭނެ
ނަފްސާނީ ދުޅަހެޔޮކަމަށް ހޭލުންތެރިކުރުވުމާ ގުޅޭގޮތުން ޚާއްސަ ހިނގާލުމެއް ބޭއްވުމަށް އައިޖީއެމްއެޗުން ނިންމައިފިއެވެ.
މި ހިނގާލުން ކުރިއަށްގެންދިޔުމަށް ހަމަޖެހިފައިވަނީ މާދަމާ ހަވީރު 16:00 ގައެވެ.
"ވޯރކް ފޮރ މެންޓަލް ވެލްބީން "ގެ ނަމުގައި ކުރިއަށްގެންދާ މި ހިނގާލުން ފެށުމަށް ހަމަޖެހިފައިވަނީ އަރޓިފިޝަލް ބީޗް ސަރަހައްދުންނެވެ. އަދި ދުވުން ނިންމާލުމަށް ހަމަޖެހިފައިވަނީ ރަސްފަނު ސަރަހައްދަށެވެ.
އައިޖީއެމްއެޗުން ބުނީ މި ހިނގާލުމަކީ ހުރިހާ ފަރާތްތަކަށް ބައިވެރިވެވޭނެހެން ހުޅުވާލައިގެން ކުރިއަށްގެންދާ ދުވުމެއްކަމަށެވެ. މި ދުވުމާ ގުޅޭ ގޮތުން މަޢުލޫމާތުދެއްވަމުން އައިޖީއެމްއެޗްގެ ސެންޓަރ ފޮރ މެންޓަލް ހެލްތްގެ އެޑްމިން އޮފިސަރ ޙަސަން ޝައުބާން ވިދާޅުވީ މި ދުވުމުގެ ތެރެއިން ނަފްސާނީ ބައްޔާ ބެހޭ މަޢުލޫމާތުތަކާއި އެކަމަށް ހޭލުންތެރިކުރުމަށް ތަފާތު މެސެޖްތައް ދެމުންދާނެކަމަށެވެ. އަދި ތަފާތު މެސެޖްތައް ހިމަނައިގެން ބެނާތަކާއި ޕޯސްޓަރތައް ބޭނުންކުރަމުންދާނެކަމަށްވެސް އޭނާ ވިދާޅުވިއެވެ.
އައިޖީއެމްއެޗުން ބުނީ މި ހަރަކާތުގެ ތެރެއިން ސޯޝަލް ސެންޓަރާއި ރަސްފަންނުގައިވެސް ތަފާތު ހަރަކާތްތައް ކުރިއަށްގެންދިޔުމަށް ނިންމާފައިވަކަމަށެވެ. އެގޮތުން ނަފްސާނީ ބަލީގެ މަޢުލޫމާތު ދިނުމާއި އާއްމުންގެ ސުވާލުތަކަށް ޖަވާބުދިނުންފަދަ ހަރަކާތްތައް ކުރިއަށްގެންދަން ނިންމާފައިވާކަމަށްވެސް އެ ހޮސްޕިޓަލުން މަޢުލޫމާތުދެއެވެ.
ނަފްސާނީ ދުޅަހެޔޮކަމަށް ހޭލުންތެރިކުރުވުމާ ގުޅޭގޮތުން ކުރިއަށްގެންދާ މި ހިނގާލުން ކުރިއަށްގެންދަނީ އައިޖީއެމްއެޗާއި ސިއްޙީ ޚިދުމަތް ދޭ އެހެނިހެންތަންތަން ގުޅިގެންނެވެ. ނަފްސާނީ ދުޅަހެޔޮކަމަށް ހޭލުންތެރިކުރުމުގެ ދުވަސް ފާހަގަކުރުމުގެ ޚާއްސަ ރަސްމިއްޔާތު ބޭއްވުމަށް ހަމަޖެހިފައިވަނީ މިމަހުގެ 10 ވަނަ ދުވަހުއެވެ.
ކޮންމެ އަހަރެއްގެ އޮކްޓުބަރު މަހުގެ 10 ވަނަ ދުވަސް ފާހަގަކުރަމުންދަނީ ބައިނަލްއަޤްވާމީ ގޮތުން ފާހަގަކުރާ ނަފްސާނީ ދުޅަހެޔޮކަމަށް ހޭލުންތެރިކުރުމުގެ ދުވަހުގެ ގޮތުގައެވެ.