އެކި ޤައުމުތަކުގެ ލީޑަރުން މެދުވެރިކޮށް ސަޢުދީ ޢަރަބިއްޔާއިން އީރާންގެ ރައީސް ޙަސަން ރޫޙާނީއަށް މެސެޖްތަކެއް ފޮނުވިކަމަށް ބުނެ، އީރާނުން ވާހަކަދައްކާފައިވަނީ އެންމެ ތެދަށްނޫންކަމަށް ސަޢުދީގެ ޚާރިޖީ ވަޒީރު އާދިލް އަލްޖުބައިރު ވިދާޅުވެއްޖެއެވެ.
އަލްޖުބައިރު ކުރެއްވި ޓުވީޓެއްގައި ވިދާޅުވީ އީރާނާއި ސަޢުދީގެ މެދުގައިވާ ނުތަނަވަސްކަން ނައްތާލައި، ދެޤަައުމު ސުލްޙަކުރުވުމަށް ރަޙުމަތްތެރި ޤައުމުތަކުން މަސައްކަތް ފެށުމުން ސުލްޙައާއި ހަމަޖެހުމަށް ތާޢީދުކުރާނެކަން އެ ޤައުމުތަކުގެ ލީޑަރުންނަށް ސަޢުދީން އެންގިކަމަށާ، އީރާނާ ގުޅޭގޮތުން ކުރެވިފައިވަނީ މިފަދަ މުޢާމަލާތްތަކެއްކަމަށެވެ. އަދި އަލްޖުބައިރު ވިދާޅުވީ ހަމަނުޖެހުމާއި ޢުދުވާން ހިންގާ ފަރާތުން އެކަން ހުއްޓާލަންޖެހޭކަން އެމީހުންނަށް އަންގާފައިވާނެކަމަށެވެ. މީގެ އިތުރުން އީރާނާމެދު ސަޢުދީން ގެންގުޅޭ ސިޔާސަތު އދގެ މަޖިލީހަށާއި ދުނިޔޭގެ އެހެން ޤައުމުތަކަށްވެސް ވަރަށް ސާފުކޮށް ހާމަކޮށްފައިވާނޭކަމަށްވެސް އަލްޖުބައިރު ވިދާޅުވިއެވެ.
އީރާން ސަރުކާރުގެ ތަރުޖަމާން ޢަލީ އައްރުބަޢީ ވިދާޅުވީ ދުނިޔޭގެ އެހެން ޤައުމުތަކުގެ ލީޑަރުން މެދުވެރިކޮށް ސަޢުދީން އީރާންގެ ރައީސް ޙަސަން ރޫޙާނީއަށް މެސެޖްތަކެއް ފޮނުވައިފިކަމަށެވެ. އެހެންނަމަވެސް ފޮނުވީ ކޮން މެސެޖެއް، ކޮން ޤައުމުތަކެއްގެ ވެރިން މެދުވެރިކޮށްކަމެއް އޭނާ ވިދާޅުވެފައެއްނުވެއެވެ. އީރާނުންވަނީ ސަޢުދީގެ ސުލޫކު ބަދަލުކޮށް ރަގަނޅު އަވަށްޓެރިއެއްގެ ގޮތުގައި ޙަރަކާތްތެރިވާން ބޭނުންވާނަމަ އީރާނުން އެކަމަށް މަރްޙަބާކިޔާނެކަމަށް ބުނެފައެވެ.