ވޯލްޑް ކަޕް އަދި އޭޝިއަން ކަޕް ޖޮއިންޓް ކޮލިފައިންގައި ސީރިޔާއާ ބައްދަލުކުރާ މެޗަށް ތައްޔާރުވުމަށް ކޭމްޕް ކުރުމަށް ޤައުމީ ފުޓްބޯޅަ ޓީމު ސައުދީ އަރަބީއްޔާއަށް ފުރައިފިއެވެ.
ކޮލިފައިންގައި ރަށުންބޭރުގައި ސީރިއާ އާއި ދެކޮޅަށް ރާއްޖެ ނިކުންނާނީ މި މަހުގެ 10 ވަނަ ދުވަހުއެވެ. މި މެޗު ކުޅުމަށް ހަމަޖެހިފައި ވަނީ ޔުނައިޓެޑް އަރަބި އެމިރޭޓްސް (ޔޫއޭއީ) ގައެވެ.
ސައުދީގައި ކުރާ ކޭމްޕްގައި އެކުވެރިކަމުގެ މެޗެއް ކުޅުމުގެ އިންތިޒާމު ހަމަޖެއްސުމަށް އެފްއޭއެމްއިން ދަނީ މަސައްކަތްކުރަމުންނެވެ.
ގައުމީ ޓީމު ސައުދީގައި ކޭމްޕް ކުރުމަށް ފުރިއިރު، ތަޖިކިސްތާނުގައި މިހާރު ކުރިއަށްދާ އޭއެފްސީ 19 އަހަރުން ދަށުގެ ޗެމްޕިއަންޝިޕް ކޮލިފިކޭޝަނަށްފަހު 19 އަހަރުން ދަށުގެ ޓީމުގައި ހިމެނޭ ބައެއް ކުޅުންތެރިން ސީނިއާ ޓީމާ ގުޅޭނެ ކަމަށް އެފްއޭއެމުން މައުލޫމާތުދެއެވެ.
މީގެ އިތުރުން މިފަހަރުގެ ސްކޮޑުންވެސް ކްލަބު އީގަލްސްގެ އަލީ ފާސިރު (ސެންޓޭ) އާއި އަހުމަދު ރިޒުވާން (ރިޒޭ) އަށް ފުރުސަތު ދީފައެއް ނުވެއެވެ. ގުއާމާ ދެކޮޅަށް ކުޅުނު މެޗަށް އެ ދެ ކުޅުންތެރިން ޓީމާ ނުގުޅުމުގެ ސަބަބުން މީގެ ކުރިން ވަނީ އެ ދެ ކުޅުންތެރިން ޖޫރިމަނާވެސް ކޮށްފައެވެ.
ފީފާ ވޯލްޑް ކަޕް އަދި އޭއެފްސީ އޭޝިއަން ކަޕް ޖޮއިންޓް ކޮލިފިކޭޝަނުގައި ކުޅުނު ފުރަތަމަ މެޗުން ގުއާމް އަތުން ރާއްޖެ 1-0 އިން މޮޅުވިއިރު، މާލޭގައި ޗައިނާއާ ދެކޮޅަށް ކުޅުނު މެޗުން އަމިއްލަ ޤައުމުގައި ރާއްޖެ ބަލިވީ 5-0 ގެ ނަތީޖާއަކުންނެވެ.
މި ގްރޫޕްގެ ތާވަލުގެ އެއްވަނައިގައި އޮތް ޗައިނާ އާއި، ދެވަނައިގައި އޮތް ސީރިއާ، އަދި ތިންވަނައިގައި އޮތް ފިލިޕީންސް އާއި ހަަރުވަނައިގައި އޮތް ރާއްޖެއަށްވެސް އަދި ލިބިފައިވަނީ 3 ޕޮއިންޓެވެ. އެކަމަކު ރާއްޖެ އާއި ފިލިޕީންސްއިން ވަނީ މިހާތަނަށް ދެ މެޗު ކުޅެފައެވެ.