މިދިޔަ ސެޕްޓެމްބަރު މަހު ސަޢުދީ ޢަރަބިއްޔާގެ އިރުމަތީ ދެ ސަރަޙައްދުކަމަށްވާ އިބްޤީޤްއާއި ހިޖްރަތު ޚުރައިސްގައިވާ އަރާމްކޯގެ ތެލުގެ މަރުކަޒުތަކަށް ޙަމަލާދިނީ އީރާނުންކަމަށް އީރާނުގެ ސަރުކާރާ ދެކޮޅަށް ޙަރަކާތްތެރިވާ އެ ޤައުމުގެ އިދިކޮޅު ޖަމާޢަތަކުން ބުނެފިއެވެ.
އީރާނުގެ ވެރިކަމުގެ ނިޒާމު ވައްޓާލަން މަސައްކަތްކުރާ އިދިކޮޅު ޖަމާޢަތެއްކަމަށްވާ ދަ ނެޝަނަލް ކައުންސިލް އޮފް ރެސިސްޓެންސް އޮފް އީރާން (އެން.ސީ.އާރު.އައި)އިން ބުނީ އެ ޖަމާޢަތުން ހޯދި ހޯދުންތަކަށް ބަލާއިރު ސަޢުދީ އަރާމްކޯގެ ތެލުގެ މަރުކަޒުތަކަށް ޙަމަލާދިނީ އީރާނުންކަން ހާމަވާކަމަށެވެ.
ވޮޝިންޓަންގައި ބޭއްވި ނޫސްކޮންފަރެންސެއްގައި އެންސީއާރުއައިގެ މެންބަރެއްކަމަށްވާ އަލީ ރިޒާ ޖަޢުފަރު ޒާދާ ބުނީ އީރާނުން އެފަދަ ޙަމަލާތައް ދެނީ އީރާން ސަރުކާރާ ދެކޮޅަށް އެ ޤައުމުގެ އެތެރޭގައި ހިނގަމުންދާ ކަންތަކުގެ ސަމާލުކަން އެހެން މިސްރާބަކަށް އަނބުރާލުމުގެ ބޭނުމުގައިކަމަށެވެ. އީރާނުގެ އެތެރޭގައި ސަރުކާރާ ދެކޮޅަށް ރައްޔިތުންގެ ގިނަބަޔަކު ޙަރަކާތްތެރިވަމުންދާކަމަށްވެސް ޖަޢުފަރު ޒާދާ ބުނެފައިވެއެވެ.
އީރާނުގެ ވެރިކަން ގަދަބާރުން ވައްޓާލަން މަސައްކަތްކުރާ އެންސީއާރުއައި ޖަމާޢަތަކީ އީރާނުން ޓެރަރިސްޓް ޖަމާޢަތެއްކަމަށް ސިފަކުރާ ޖަމާޢަތެކެވެ.
ސަޢުދީ އަރާމްކޯގެ ތެލުގެ މަރުކަޒުތަކަށް ޙަމަލާދިންކަމަށްބުނެ އެމެރިކާއާއި ސަޢުދީ ޢަރަބިއްޔާއިން އީރާނުގެ މައްޗަށް ކުރި ތުޙުމަތުތަކަށް އީރާނުން އިންކާރު ކޮށްފައިވާއިރު، އެ ޙަމަލާތަކުގެ ޒިންމާ އުފުލާފައިވަނީ ޔަމަންގެ ޙޫޘީ ޖަމާޢަތުންނެވެ.