އެމްއެމްޕީއާރްސީގެ މަޝްހޫރު ބޮޑު ޚިޔާނާތުގެ މައްސަލައިގައި ކުރީގެ ނައިބު ރައީސް އަޙްމަދު އަދީބުގެ މައްޗަށް 7 ދަޢުވާއެއްކޮށް ޕްރޮސެކިއުޓަރ ޖެނަރަލްގެ އޮފީސް (ޕީޖީ)އިން އެމައްސަލަތައް ކްރިމިނަލް ކޯޓަށް ފޮނުވައިފިއެވެ.
ޕީޖީއޮފީހުން ވަނީ މިއަދު މިކަން ހާމަކުރައްވާފައެވެ. އެ އޮފީހުން ވިދާޅުވީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރްސީ) މެދުވެރިކޮށް 2014ވަނަ އަހަރާއި 2015ވަނަ އަހަރު ހިންގި ކޮރަޕްޝަނާއި، ޚިޔާނާތްތެރިވުމުގެ ކުށްތަކާ ގުޅިގެން ކޮރަޕްޝަނާއި، ޚިޔާނާތާއި، މަނީ ލޯންޑްރިންގގެ މައްސަލައާ ގުޅިގެން އަދީބުގެ މައްޗަށް 7 ދަޢުވާއެއް ކުރަން ފޮނުވާފައިވާކަމަށެވެ.
މި ދައުވާތައް އަދީބުގެ މައްޗަށް އުފުލާފައިވަނީ މޯލްޑިވްސް ޕޮލިސް ސަރވިސްއާއި، އެންޓި-ކޮރަޕްޝަން ކޮމިޝަނާއި، ޕްރެޒިޑެންޝަލް ކޮމިޝަން އޮން ކޮރަޕްޝަންއެންޑް އެސެޓް ރިކަވަރީއާ ގުޅިގެން ހިންގި ތަހުޤީޤަކަށްފަހު 21 ސެޕްޓެންބަރު 2015 ގައި މޯލްޑިވްސް ޕޮލިސް ސަރވިސްއިން ޕީޖީ އޮފީހަށް އެ މައްސަލަ ހުށަހެޅުއްވުމާ ގުޅިގެންކަމަށްވެސް ޕީޖީ އޮފީހުން ވިދާޅުވެއެވެ.
އެމްއެމްޕީއާރުސީގެ ޚިޔާނާތުގެ މައްސަލާގައި އަދީބުގެ މައްޗަށް އިތުރު ދައުވާތަކެއް އުފުލާފައިވާއިރު އެމްއެމްޕީއާރުސީގެ މައްސަލާގައި މީގެކުރިންވެސް ވަނީ ދައުވާތަކެއް އުފުލާފައެވެ. އެ ގޮތުން ޅ. މާބިންހުރާ ކުއްޔަށްދޫކޮށްގެން ލިބުނު އިކުޒިޝަން ކޮސްޓަށް ޚިޔާނާތްތެރިވި މައްސަލާގައި ކުށް ސާބިތުވެ 8 އަހަރަށް ޖަލަށްލުމަށް ކުރިމިނަލްކޯޓުން ހުކުމްކުރިއެވެ. އެހެންމަމަވެސް އެ މައްސަލާއިގެ ހުކުމް ހައިކޯޓުން ބާތިލުކޮށް އަލުން އެ މައްސަލަ ބެލުމަށް ވަނީ ހުކުމްކޮށްފައެވެ. ހއިކޯޓްގެ މި ނިންމުން ދަުއލަތުން ވަނީ ސުޕްރީމްކޯޓްގައި އިސްތިއުނާފްކޮށްފައެވެ.
އަދީބުގެ މައްޗަށް ދައުލަތުން ުއފުލި ދައުވާތަކުގައި 33 އަހަރށް ޖަލަށްލުމަށް ކުރިމިނަލްކޯޓުން އޭރު ހުކުމްކުރުއެވެ. އެހެންމަވެސް މި ހުރިހާ ދައުވާތައް އުފުލާފައިވަނީ ގޯސްކޮށްކަމަށް ކަނޑައެޅުމުން އޭނާ ވަނީ މިނިވަންވެފައެވެ.
މި މައްސަލަތައް ތަހުޤީގުކުރުމަށް ގޭ ބަންދުގައި ބަހައްޓާފައިވަނިކޮށް އަހްމަދު އަދީބު ޓަގް ބޯޓެއްގައި ފިލައިގެން ދަނިކޮށްވަނީ އަތުލައިގެންފައެވެ. އަދި މި މައްސަލާގައި ދައުވާކޮށް ކުށަށް އަދީބު އިއުތިރާފުވުމުން މިދިޔަ ހަފްތާގައި އަދީބުގެ މައްޗަށްވަނީ 3 މަހުގެ ޖަލު ހުކުމެއް އިއްވާފައެވެ.
އެމްއެމްޕީއާރސީގެ މައްސަލާގެ ތަހުޤީގަށް ދައުލަތުން ވަނީ އަދީބާއި އެކު އެއްބަސްވުމެއް ހަދާފައެވެ. އަދި މި އެއްބަސްވުމުގެ ދަށުން ތަހުޤީގަށް އެއްބާރުލުންދީ އެމްއެމްޕީއާރުސީގެ ޚިޔާނާތުގައި ބައިވެރިވި ހުރިހާ އެންމެންގެ މައުލޫމާތުތައް ތަހުޤީގަށް ހިއްސާކުރާނެކަމަށް އަދީބު ވަނީ ވިދާޅުވެފެއެވެ.
ދާދި ފަހުން ރައީސް ިއބްރާހިމް މުހައްމަދު ސާލިހް ނޫސްވެރިންނާއި ވާހަކަފުޅު ދައްކަވަމުން ވިދާޅުވީ އެމްއެމްޕީއާރުސީގެ ޚިޔާނާތުގެ އަދަދު 220 މިލިއަން ޑޮލަރަށް އަރާކަމަށެވެ. މި ގޮތުން 60 ވުރެ ގިނަ ރަށް ނުއަގުގައި އެކި ފަރާތްތަކަށް ދޫކޮށްފައިވާކަމަށެވެ. އެ ރަށްތަކުގެ ހަމަ އަގު ހޯދުމަށް ސަރުކާރުން މަސައްކަތް ކުރައްވަމުން ގެންދަވާކަން ރައީސް ވަނީ ހާމަކުރައްވާފައެވެ. އަދި އެމްއެމްޕީއާރުސީގެ ޚިޔާނަތުގައި ބައިވެރި އިތުރު ފަރާތްތައް އެބަތިބި ކަމަށާއި އެފަރާތްތަކާއި ދެކޮޅަށް ވަރަށް އަވަހަށް ދައުވާތައް އުފުލާނެކަންވެސް ރައީސްވަނީ ހާމަކުރައްވާފައެވެ.