މިދިޔަ ޖޫން މަހާ އަލާބަލާއިރު އޯގަސްޓްމަހު ޖެންޑަރ މިނިސްޓްރީއަށް ހުށައެޅި ކުޑަކުދިންގެ މައްސަލަތަކާއި އެހެނިހެން މައްސަލަތައް މަދުކަމަށް އެ މިނިސްޓްރީން ހާމަކޮށްފިއެވެ.
ޖެންޑަރ މިނިސްޓްރީން އާންމުކުރައްވާފައިވާ ތަފާސްހިސާބުތަކަށް ބަލާއިރު މިދިޔަ އޯގަސްޓްމު ޖެންޑަރ މިނިސްޓްރީއަށް ހޫށައަޅާފައިވަނީ 168 މައްސަލައެކެވެ. މއި މިދިޔަ ޖުލައިމަހުގައި ހުށައެޅި މައްސަލައަށް ވުރެ 21 އިންސައްތަ މަދު އަދަދެއްކަމަށް އެ މިނިސްޓްރީން ވިދާޅުވެއެވެ.
ޖެންޑަރ މިނިސްޓްރީން އާންމުކޮށްފައިވާ ތަފާސްހިސާބުތަކަށް ބަލާއިރު އޯގަސްޓްމަހު އެ މިނިސްޓްރީއަށް ހުށައަޅާފައިވާ އެކިބާވަތުގެ މައްސަލަތަކުގެ ތެރެއިން އެންމެ ގިނައިން ހުށައަޅާފައިވަނީ ކުޑަކުދިންނަށް ކުރާ އެކި ބާވަތުގެ އަނިޔާއާއި ގުޅޭ މައްސަލަތަކެވެ. އެފަދަ 101 މައްސަލައެއް މިދިޔަ މަހު ހުށަހަޅާފައިވާއިރު އޭގެ ކުރީ މަހު ހުށައަޅާފައިވަނީ 125 މައްސަލައެވެ.
ޖެންޑަރ މިނިސްޓްރީގެ ތަފާސްހިސާބަށް ބަލާއިރު މި މައްސަލަތަކުގެ ތެރޭގައި އެންމެ ގިނައީ ޖިންސީ ހާނިއްކައިގެ މައްސަލަތަކެވެ. އެގޮތުން އެފަދަ 40 މައްސަލަ ވަނީ ރިޕޯޓްކޮށްފައެވެ. ކުޑަކުދިންނަށް އިހުމާލުވުމުގެ 23 މައްސަލައަކާއި ކުޑަކުދިންނަށް ކުރާ ޖިސްމާނީ ހާނިކައިގެ 23 މައްސަލައާއި ނަފްސާނީ ހާނިކައިގެ 8 މައްސަލަ ހިމެނެއެވެ.
އަދި އެހެން ކުދިންގެ ފަރާތުން ގަނާލިބުމާއި ފުރައްސާރައިގެ ޝިކާރައަކަށްވުމުގެ 3 މައްސަލައެއް ރިޕޯޓުކޮށްފައިވާއިރު އިންޓަރނެޓް މެދުވެރިކޮށް ގަނާލިބުމުގެ 2 މައްސަލައަކާއި ގެވެށިއަނިޔާކުރާ ތަން ދެއްކުން ނުވަތަ ފެނުމުގެ 2 މައްސަލަވެސް ހިމެނެއެވެ.
ޖެންޑަރ މިނިސްޓްރީގެ ތަފާސްހިސާބަށް ބަލާއިރު ކުޑަކުދިންނަށް ލިބެންޖެހޭ ޙައްގުތަކުން ކުދިން މަޙްރޫމްކުރުމުގެ 2 މައްސަލަ މިދިޔަ މަހުވަނީ އެމިނިސްޓްރީއަށް ރިޕޯޓުކޮށްފައެވެ. ޖެންޑަރ މިނިސްޓްރީއަށް ހުށައާޅާފައިވާ ޢާއިލީ މައްސަލަތަކަށް ބަލާއިރު، އެފަދަ 14 މައްސަލައެއް ހުށައާޅާފައިވެއެވެ. މީގެ ތެރޭގައި ކުދިންނާ ބައްދަލުނުކުރެވޭ 6 މައްސަލައާއި ކުދިން ބެލުމުގައި އިހުމާލުވުމުގެ 5 މައްސަލައިގެ އިތުރުން ޙަރަދު ދިނުމާ ގުޅޭ 3 މައްސަލަ ހިމެނެއެވެ.
ޖެންޑަރ މިނިސްޓްރީން ވަނީ މިދިޔަ މަހު ހުށައެޅުނު ކުޑަކުދިންނާ ގުޅުންހުރި މައްސަލަތަކުގެ ތެރެއިން ކުޑަކުދިން ކުރާ ކުށުގެ ތަފާސްހިސާބުވެސް އާންމުކޮށްފައެވެ. މި ތަފާސްހިސާބުތަކަށް ބަލާއިރު ކުޑަކުދިންކުރާ އެކިބާވަތުގެ ކުށުގެ 3 މައްސަލަ މިދިޔަ މަހު ހުށައަޅާފައިވެއެވެ.. އަދި އަޚުލާގީ މައްސަލަތަކަށް ބަލާއިރު، އެފަދަ 4 މައްސަލައެއް ރިޕޯޓުކޮށްފައިވެއެވެ. އޭގެތެރޭގައި ގެއިން ނުކުމެގެން ދިޔުމުގެ 3 މައްސަލައާއި ސްކޫލަށް ދާން ބޭނުންނުވުމުގެ މައްސަލައެއްވެސް ހިމެނެއެވެ.
ޖެންޑަރ މިނިސްޓްރީގެ ތަފާސްހިސާބުތަކަށް ބަލާއިރު، ވަކި ޖިންސަކަށްވީތީ ކުރާ އަނިޔާގެ 25 މައްސަލައެއް މިދިޔަމަހުވަނީ ހުށައަޅާފައެވެ. އޭގެ ކުރީ މަހާއި އަޅާބަލާއިރު މިބާވަތުގެ މައްސަލަތައް ރިޕޯޓުކޮށްފައިވާ މިންވަރުވަނީ މަދުވެފައެވެ. މިފަދަ މައްސަލަތަކުގެ ތެރެއިން މިދިޔަ މަހު އެންމެ ގިނައިން ރިޕޯޓުކޮށްފައިވަނީ އެކި ބާވަތުގެ ޖިސްމާނީ އަނިޔާގެ މައްސަލަތަކާއި ނަފްސާނީ އަނިޔާކުރުމުގެ މައްސަލަތަކެވެ. މިދާއިރާގެ 8 މައްސަލަ ވަނީ ހުށައަލާފައެވެ. ބާރާއި ނުފޫޒު ފޯރުވުމުގެ3 މައްސަލައާއި ޖިންސީ ހާނިއްކާކުރުމުގެ 2 މައްސަލައާއި ރޭޕް ކުރުމުގެ 2 މައްސަލަ އަދި ބިރުދެއްކުމުގެ 2 މައްސަލައެއްވެސް ހިމެނެއެވެ.
މިމައްސަލަތަކުގެ އިތުރުން ނުކުޅެދުންތެރިކަން ހުންނަ ފަރާތްތަކާއި ޢުމުރުން ދުވަސްވީ މީހުންނަށް އަޅާލުމާއި އެހީތެރިކަން ބޭނުންވެގެން 10 މައްސަލަ ޖޫން މަހުވަނީ ހުށައަޅާފައެވެ. އެގޮތުން ނުކުޅެދުންތެރިކަން ހުންނަ ފަރާތްތަކާ ގުޅޭ 9 މައްސަލަ ހުށައަޅާފައިވާއިރު ޢުމުރުން ދުވަސްވީ މީހުންނަށް އެހީތެރިކަމާއި އަޅާލުން ބޭނުންވެގެން 1 މައްސަލަވަނީ ހުށައަޅާފައެވެ.
ޖެންޑަރ މިނިސްޓްރީއަށް މިދިޔަ މަހު ހުށައަޅާފައިވާ މައްސަލަތަކުގެތެރޭގައި ހިމެނޭ އަމިއްލަ ނަފްސަށް އަނިޔާ ދިނުމުގެ މައްސަލަތައްވަނީ އޭގެ ކުރީ މަހާއި އަޅާބަލާއިރު ވަނީ ދަށްވެފައެވެ.އެގޮތުން އޭގެ ކުރީމަހު އެފަދަ 15 މައްސަލަ ހުށައަޅާފައިވާއިރު މިދިޔަ މަހުވަނީ މިބާވަތުގެ 9 މައްސަލަ ހުށައަޅާފައެވެ.