ގެއްލުންތަކަކަށްފަހު މިވީ ކުޑަދުވަސްކޮޅުގެ ތެރޭގައި ގިނަ މަޝްރުޢުތަކެއް ކުރިއަށްގެންދިޔުމަށް ފުރުޞަތު ލިބިފައިވާކަމަށް އެމްޓީސީސީން ވިދާޅުވެއްޖެއެވެ.
މި ސަރުކާރުން 38 މަޝްރުއެއް ކުރިއަށްގެންދިޔުމަށްޓަކައި މިހާތަނަށް ޙަވާލުކޮށްފައިވާކަމަށާ، މިއހަރަކީ އެކުންފުނީގެ ތާރީޚުގައިވެސް އެންމެ ގިނައިން މަޝްރޫއުތައް ކުރިއަށްގެންދަން ލިބުނު އަހަރުކަމަށް އެމްޓީސީސީން ވިދާޅުވިއެވެ.
ނޫސްވެރިންނަށް މަޢުލޫމާތުދެއްވަމުން އެމްޓީސީސީގެ ސީއީއޯ ހަސަން ޝާހް ވިދާޅުވީ އެކުންފުނީގެ މާލީ ޙާލަތު 2018ވަނަ އަހަރުގެ ރިޔާސީ އިންތިޚާބަށްފަހު އޮތީ ރަނގަޅަކަށް ނޫންކަމަށާއި ނަމަވެސް ޖުލައި މަހުން ފެށިގެން އެ ކުންފުންޏަށް ފައިދާވަމުން އަންނަކަމަށެވެ.
ޝާހް ވިދާޅުވީ 55 މަޝްރޫއެއްގެ މަސައްކަތް ކުރިއަށްގެންދާއިރު މިއަހަރުގެ ތެރޭގައި 17 މަޝްރޫއުއެއްގެ މަސައްކަތް މިހާރު ނިމިފައިވާކަމަށެވެ. އަދި މީގެ ތެރޭގައި މިސަރުކާރުން ޙަވާލުކުރި 4 މަޝްރޫއެއް ހިމެނޭކަމަށެވެ. މީގެ ތެރޭގައިފެނުގެ މަޝްރޫއުތަކާއި ބިންހިއްކުމުގެ މަޝްރޫއުތައް ހިމެނެއެވެ.
ކުންފުނީގެ ޕްރޮޖެކްޓްތައް އަވަހަށް ނިންމުމަށް ދިމާވާ ގޮންޖެހުމަކީ މަސައްކަތް ފެށުމަށްފަހު ރައްޔިތުން ބޭނުންވެގެން އަލުން މަޝްރޫއުގެ ޑިޒައިންނަށް ބަދަލުގެނައުމަށް މެދުކަނޑާލަން ޖެހުނުކަމަށް ޝާހް ވިދާޅުވިއެވެ. އެމްޓީސީސީން މިއަހަރު ކުރިއަށް ގެންދާ މަޝްރޫއުތަކުގެ ތެރޭގައި ބަނދަރު ހެދުމާއި މަގު ހެދުމާއި އެއަރޕޯޓް ހެދުންފަދަ މަޝްރޫއުތައް ހިމެނެއެވެ.
އެމްޓީސީސީން ވިދާޅުވީ އެ ކުންފުންޏާ މިހާރު ޙާވާލުކުރާ ގިނަ މަޝްރޫއުތަކަކީ ޑިޒައިން އެންޑް ބިލްޑް އުސޫލުން ހަވާލުކުރާ މަސައްކަތްތައް ކަމަށެވެ. އަދި މިހާރު ޙަވާލުކޮށްފައިވާ މަޝްރޫއުތަކުގެ މަސައްކަތް މި އަހަރުގެ ނޮވެމްބަރު މަހު ފެށުމަށް މަސައްކަތްކުރާކަމަށްވެސް އެ ކުންފުނިން ވިދާޅުވެއެވެ. އަދި މިހާރުވެސް 19 މަޝްރޫއެއްގެ އެންވަޔަރަމެންޓް އިމްޕެކްޓް އެސެސްމެންޓު ހެދުމުގެ މަސައްކަތް ކުރިއަށް ދާކަމަށް އެކުންފުނިން ބުނެއެވެ.