އީރާނުގެ ނިއުކްލިއަރ މައްސަލަ ޙައްލުކުރުމަކީ މުހިއްމު، ޚައްސާސް މައްސަލައެއްކަން ދެނެގަނެ އެކަމުގައި އެޅިދާނެ ސިޔާސީ އަދި ޚާރިޖީ ފިޔަވަޅުތައް ކަނޑައަޅަން ޗައިނާގެ ސްޓޭޓް ކައުންސިލަރ އަދި ޚާރިޖީވަޒީރު ވާންގް ޔީ ކަމާގުޅުންހުރި ފަރާތްތަކަށް ގޮވާލައްވައިފިއެވެ.
ވާންގް ޔީ މިގޮތަށް ގޮވާލެއްވީ އދގެ ޢާއްމު މަޖިލީހުގެ ހަވާސާގައި އީރާން، ރަޝިޔާ، ފަރަންސޭސިވިލާތް، ޖަރުމަނުވިލާތް، އިނގިރޭސިވިލާތް އަދި ވިލާތުގެ އިއްތިޙާދުގެ ޑިޕްލޮމޭޓުންނާއެކު ބޭއްވެވި ބައްދަލުވުމެއްގައެވެ. ވާންގް ޔީ ވިދާޅުވީ އެމެރިކާއިން އީރާނާ ދެކޮޅަށް ދަތިކުރުމުގެ ފިޔަވަޅުތައް އެޅުމުގެ ސަބަބުން އީރާނަށް ވަރަށް ބޮޑެތި ފިއްތުންތަކާ ކުރިމަތިވެފައިވާކަމަށާއި، އަޅާނުލާ ދޫކޮށްލައިފިނަމަ މިހާރަށްވުރެ ބޮޑު މައްސަލައަކަށް މިކަން ވެދާނެކަމަށެވެ. މީގެ އިތުރުން، ވާންގް ޔީ ވަނީ ކަމާގުޅުންހުރި ހުރިހާ ފަރާތަކުންވެސް މި މައްސަލައަށް ޙައްލެއް ހޯދުމަށް މަސައްކަތްކުރުމަށް ގޮވާލާފައެވެ.
2015ވަނަ އަހަރު އީރާނުން ދުނިޔޭގެ ހަ ބާރު ކަމަށްވާ އެމެރިކާ، އިނގިރޭސިވިލާތް، ފަރަންސޭސިވިލާތް، ޖަރުމަނުވިލާތް، ޗައިނާ އަދި ރަޝިޔާއާއެކު ޤާއިމުކުރި ނިއުކްލިޔަރ އެއްބަސްވުމުން 2018ވަނަ އަހަރު އެމެރިކާވަނީ ވަކިވެ، އީރާނާ ދެކޮޅަށް ވަރުގަދަ ދަތިކުރުމުގެ ފިޔަވަޅުތައްވަނީ އަޅާފައެވެ. މިކަމުގެ ސަބަބުން އީރާނުންވަނީ 2015ވަނަ އަހަރުގެ އެއްބަސްވުމުގެ ބައެއް ބައިތަކަށް ޢަމަލުކުރުން ހުއްޓާލާފައެވެ.