ޢާއިލާތަކަށް އެހީތެރިވުމަށް ހަދާފައިވާ ރިލީފް ސެންޓަރަށް މިނިސްޓަރ މާރިޔާ ޒިޔާރަތްކުރައްވައިފި
އަލިފާނުގެ ހާދިސާގައި ގެއްލުން ލިބުނު ފަރާތްތަކަށް ބޭނުންވާ އެހީތެރިކަމުގެ ސާމާނު ދޫކުރުމަށް ޤާއިމުކޮށްފައިވާ ރިލީފް ޑިސްޓްރިބިއުޝަން ސެންޓަރަށް މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދުދީދީ ޒިޔާރަތްކުރައްވައިފިއެވެ.
ދަރުބާރުގޭ ދޮށިމޭނާ މާލަމުގައި ނެޝެނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީ.އެމް.އޭއިން ޤާއިމުކޮށްފައިވާ ރިލީފް ޑިސްޓްރިބިއުޝަން ސެންޓަރަށް ވަޑައިގެން މިނިސްޓަރ މާރިޔާ ވަނީ އެތަނުގެ އިންތިޒާމްތައް ހަމަޖެހިފައިވާގޮތް ބައްލަވާލައްވާފައެވެ. އަދި އަލިފާނުގެ ޙާދިސާގައި ގެއްލުން ލިބުނު އާއިލާތަކަށް އެހީތެރިވުމުގައި ހަރަކާތްތެރިވަމުންދާ އެން.ޑީ.އެމް.އޭގެ މުވައްޒަފުންނާއި ދަރުމަވެރިންނާއި ބައްދަލުކުރައްވާ، އެފަރާތްތަކުގެ މަސައްކަތްތަކަށް މިނިސްޓަރ ވަނީ ހިތްވަރުދެއްވާފައެވެ.
އެން.ޑީ.އެމް.އޭއިން ދަރުބާރުގޭގައި ޤާއިމުކޮށްފައިވާ ރިލީފް ޑިސްޓްރިބިއުޝަން ސެންޓަރުން، ހާލުގައި ޖެހިފައިވާ ޢާއިލާތަކަށް ބޭނުންވާ އަންނައުނާއި، ކެއުންބުއިމަށް ބޭނުންވާ ސާމާނު ދޫކުރުމުގެ މަސައްކަތް އަންނަނީ ކުރަމުންނެވެ. އަލިފާނުގެ ޙާދިސާއާއި ގުޅިގެން ގެއްލުވި އާއިލާތަކަށް އެހީތެރިކަން ފޯރުކޮށްދިނުމުގެގޮތުން ސަރުކާރުގެ ގިނަ މުއައްސަސާތަކަކާއި، ކުންފުނިތަކެއްގެ އިތުރުން އަމިއްލަ ވިޔަފާރިވެރިންނާއި އާއްމުންގެ ފަރާތުން ގިނަ އަދަދެއްގެ ތަކެތި ހަދިޔާކޮށްފައިވެއެވެ. އެން.ޑީ.އެމް.އޭއިން ވިދާޅުވީ، ގިނަ އަދަދެއްގެ އަންނަނު ލިބިފައިވުމާއެކު، އާއިލާތަކަށް އަންނައުނު ދޫކުރުމުގައި އެއްވެސް ލިމިޓެއް ނުގެންގުޅޭކަމަށެވެ.
ޑިފެންސް މިނިސްޓަރ މާރިޔާގެ އިތުރުން މިނިސްޓަރ އޮފް ހައުސިންގ އެންޑް އަރބަން ޑިވެލޮޕްމަންޓް އާމިނަތު ޢާޠިފާވެސް ވަނީ ދަރުބާރުގޭގައި ޤާއިމުކޮށްފައިވާ ރިލީފް ޑިސްޓްރިބިއުޝަން ސެންޓަރަށް ޒިޔާރަތްކުރައްވާ، އެތަނުގެ މަސައްކަތްތައް ކުރިއަށްދާގޮތް އޮޅުންފިލުއްވާފައެވެ.