ސޫރިޔާގެ ޚާރިޖީވަޒީރު ވަލީދު މުއައްލަމްއާއެކު ކުރެވުނު މަޝްވަރާތައް ވަރަށް ކާމިޔާބުކަމަށް އދން ސޫރިޔާއަށް ކަނޑައަޅުއްވާފައިވާ ޚާއްޞަ މަންދޫބު ގެއިރު ޕެޑަރސަން ވިދާޅުވެއްޖެއެވެ. ޕެޑަރސަން ސޫރިޔާއަށް ވަޑައިގަތީ މިދިޔަ އާދީއްތަ ދުވަހު އެ ޤައުމަށް ބޭނުންވާ އާ ޤާނޫނު އަސާސީ އެކަށައެޅުމުގެ މަޝްވަރާކުރެއްވުމަށެވެ.
ސޫރިޔާގެ އޮފިޝަލުންނާ ބައްދަލުކުރެއްވުމަށްފަހު ޕެޑަރސަން ވިދާޅުވީ ހަނގުރާމައިން ސުންނާފަތިވެފައިވާ ސޫރިޔާއަށް އާ ޤާނޫނު އަސާސީއެއް ހެދުމަށްޓަކައި ބާއްވާ ކޮމިޓީގެ ބައްދަލުވުންތައް ކާމިޔާބުކަމާއެކު ކުރިޔަށްދާކަމަށެވެ. އދގެ ސެކްރެޓަރީ ޖެނެރަލް އަންތޯނިއޯ ގުތެރޭޝްވެސް ވިދާޅުވެފައިވަނީ ސޫރިޔާގެ ޤާނޫނު އަސާސީ އެކުލަވާލުމަށް ކޮމިޓީއެއް ޤާއިމުކުރުމަކީ ޞުލްޙައިގެ މަގުގައި ކުރިޔަށްދިޔުމަށް ލިބުނު ބާރެއްކަމަށެވެ.
ސޫރިޔާގެ އަހުލީ ހަނގުރާމައަށް ސިޔާސީ ޙައްލެއް ގެނައުމަށް އދން ވަކި ކޮމިޓީއެއް އެކުލަވާލަން ބޭނުންވެއެވެ. ނަމަވެސް މިހާތަނަށް އައިއިރުވެސް އެ ކޮމިޓީގައި ތިބެންޖެހޭނީ ކޮންބައެއްކަމާމެދުވަނީ އެއްބަސްވުމަކަށް ނާދެވިފައެވެ. ސޫރިޔާގައި ހެދޭ އާ ޤާނޫނު އަސާސީއެއްގެ ދަށުން އާ އިންތިޚާބެއް ބޭއްވި އެ ޤައުމަށް ޞުލްޙަ ގެނައުމަކީ ހަރުދަނާ އިސްލާޙީ ބަދަލެއްކަމުގައި ވެގެންދާނެއެވެ.
ހަނގުރާމައިގެ ސަބަބުން ވީރާނާވެފައިވާ ސޫރިޔާ އަލުން ބިނާކޮށް، ރެފިއުޖީންގެ ގޮތުގައި ތިބި އެ ޤައުމުގެ މީހުން ޤައުމަށް ގެނައުމަކީ މި ކަންކަމުގެ އަމާޒެވެ. ސޫރިޔާގެ 22 މިލިޔަން ރައްޔިތުންގެ ތެރެއިން ދެ ބައިކުޅަ އެއްބައެއްހާ މީހުން މިހާރު އުޅެމުންދަނީ ރެފިއުޖީންގެ ގޮތުގައެވެ.