ފުވައްމުލަކު ސިޓީ ޔުނެސްކޯ ބަޔޮސްފިޔަރ ރިޒާވަކަށް ހެދުމަށް އާއްމުންގެ ޚިޔާލު ހޯދުމަށް މަޝްވަރާ ބައްދަލުވުމެއް ބާއްވަން ނިންމައިފިއެވެ.
ފުވައްމުލަކު ސިޓީ ބަޔޮސްފިއަރ ރިޒާވަކަށް ހެދުމަށް ނިންމާފައިވާކަން އެންވަޔަރަންމެންޓް މިނިސްޓަރ ޑރ.ހުސައިން ރަޝީދު ޙަސަން އިޢުލާންކުރެއްވީ މިދިޔަ ޖޫން މަހުއެވެ. އެންވަޔަރަންމެންޓް މިނިސްޓްރީން ވިދާޅުވެފައިވަނީ މިމަސައްކަތުގެ ދަށުން މިހާރު ކުރިއަށްދަނީ ރަށުގެ ރައްޔިތުންގެ ޚިޔާލު މިކަމަށް ހޯދުމުގެ މަސައްކަތް ކަމަށެވެ.
ފުވައްމުލަކު ސިޓީ ކައުންސިލުން މިހާރުވަނީ ޚިޔާލު ހޯދުމަށް ބާއްވާ މަޝްވަރާ ބައްދަލުވުމުގައި ބައިވެރިވާން ބޭނުންވާ ފަރާތްތަކުން ނަންނޯޓްކުރުމަށް ހުޅުވާލާފައެވެ. ފުވައްމުލަކު ސިޓީ ޔުނެސްކޯ ބަޔޮސްފިއަރ ރިޒާވްގައި ހިމެނުމަށް ބޭނުންވާ މާޢުލޫމާތުތައް އެއްކޮށް، އެކަމާގުޅޭ ޑްރާފްޓް ތައްޔާރުކުރުމުގެ މަސައްކަތް މިހާރުވަނީ ނިމިފައެވެ. ޢާއްމުންގެ ޚިޔާލު ހޯދުމަށް ބާއްވާ ބައްދަލުވުމުގައި މި ޑްރާފްޓްގައި ހިމެނޭ ކަންކަން ޙިއްސާކޮށް، ޢާމުންގެ ޚިޔާލުތައް މިކަމުގައި ހޯދުމަށްވަނީ ހަމަޖެހިފައެވެެ.
ކަމާއިބެހޭ ފަރާތްތަކާއި ޢާއްމުންނާއެކު ބާއްވާ މިބައްދަލުވުން އޮންނާނީ މިމަހުގެ 10ވަނަ ދުވަހުއެވެ. އަދި މަޝްވަރާ ބައްދަލުވުމުގައި ބައިވެރިވާން ބޭނުންވާ މީހުން މިމަހުގެ 9ވަނަ ދުވަހުގެ ކުރިން ނަންނޯޓުކުރަން ޖެހޭނެކަމަށް ފުވައްމުލަކު ސިޓީ ކައުންސިލުން ވިދާޅުވެއެވެ.
ފުވައްމުލައް ސަރަޙައްދަކީ ގުދުރަތީ ދިރުންތައް މުއްސަނދި ސަރަޙައްދެކެވެ. އަދި ރާއްޖެއިން ޢާއްމުންކޮށް ނުފެންނަ ކަނޑުގެ ދިރުންތައްވެސް ފެންނަ ސަރަޙައްދެކެވެ. ފުވައްމުލައް ސަރަޙައްދު ބަޔޮސްފިއާ ރިޒާވަކަށް ހެދިއްޖެނަމަ ވެގެންދާނީ، ބ.އަތޮޅު ފިޔަވައި ރާއްޖޭގެ އެހެން ސަރަހައްދެއް ޔުނެސްކޯ ބަޔޮސްފިޔާ ރިޒާވްގައި ހިމަނާ ފުރަތަމަ ފަހަރަށެވެ.
ރާއްޖޭގައި ގުދުރަތީ ދިރުންތައް މުއްސަނދި ސަރަޙައްދުތައް ޙިމާޔަތް ކުރުމުގެ މަސައްކަތް ސަރުކާރުންދަނީ މުހިންމު މަސައްކެތެއްގެ ގޮތުގައި ކުރައްވަމުންނެވެ. އެގޮތުން ރަށްރަށާއި، ފަތުރަކާއި، ކަނޑޫފާތަކާއި ކުޅިތައް ހިމެނޭހެން ރާއްޖޭގެ 14 ސަރަޙައްދެއްވަނީ މިހާތަނަށްވަނީ ޙިމާޔަތްކުރައްވާފައެވެ.