މާލެއިން ބެންކޮކަށް މިރޭ ފުރި އެއަރ އޭޝިއާގެ މަތިންދާބޯޓެއްގެ އިންޖީނުގައި އަލިފާން ރޯވުމާ ގުޅިގެން އެމަޖެންސީގައި ވެލާނާ އިންޓަރނޭޝަނަލް އެއަރޕޯޓަށް ޖައްސައިފިއެވެ.
މިރޭ އަށްގަނޑި ސާޅިށް އެކެއްހާއިރު މި ބޯޓު ސަލާމަތުން އެއަރޕޯޓުގައި ޖައްސާފައިވާއިރު، މި ހާދިސާގައި އެއްވެސް މީހަކަށް އަނިޔާވެފައެއް ނުވެއެވެ. އެމަރޖެންސީ ހާލަތުގައި އެއަރ އޭޝިއާގެ އޭ ތްރީ ޓްވެންޓީ މަރުކާގެ ބޯޓު ޖެއްސިއިރު އޭގައި 59 މީހުންނާއި 7 ފަޅުވެރިން ތިބިކަމަށް އެމްއޭސީއެލްއިން މަޢުލޫމާތުދެއެވެ.
މި މަތިންދާބޯޓުގައި އަލިފާން ރޯވިތާ ގާތްގަނޑަކަށް 23 މިނެޓުގެ ތެރޭ ބޯޓު ވަނީ ވެލާނާ އިންޓަރނޭޝަނަލް އެއަރޕޯޓަށް ޖައްސާފައެވެ. އެ ބޯޓުގައި ގިނައިން ތިބީ ފަތުރުވެރިން. އެބޯޓުގައި ތިބި މީހުން މިހާރު ހުޅުމާލޭގައި ހުންނަ ހޮޓަލަކަށް ވަނީ ގެންގޮސްފައެވެ.
އެއަރ އޭޝިއާގެ ބޯޓަށް ދިމާވި މިހާދިސާ ބައްލަވާލައްވާ ދަތުރުވެރިންގެ ހާލަތު ބައްލަވާލެއްވުމަށް ޓުއަރިޒަމް މިނިސްޓަރ ޢަލީ ވަހީދުވަނީ އެއަރޕޯޓަށްވެސް ވަޑައިގަންނަވާފައެވެ.