ވަކި ޖިންސެއް ތަފާތުކުރުމެއްނެތި ލަންކާގައި ކިޔަވާ ކުދިންނަށް 18 އަހަރު ވަންދެން ވިސާލިބޭނެ އިންތިޒާމް ހަމަޖައްސައިފި
ސްރީލަންކާއާއި ރާއްޖެއާ ދެމެދު ޤާއިމްކުރި ވިސާގެ އެއްބަސްވުގެ ދަށުން ވަކި ޖިންސެއް ތަފާތުކުރުމެއްނެތި ކިޔަވާ ކުދިންނަށް 18 އަހަރު ވަންދެން ވިސާލިބޭނެ އިންތިޒާމް ހަމަޖައްސަވައިފިއެވެ.
ސްރީލަންކާއިން ދިވެހިންނަށް އޮންއެރައިވަލް ވިސާ ތިން މަސްދުވަހުގެ މުއްދަތަށް އިތުރުކޮށްދިނުމުގެ އެއްބަސްވުމާ ގުޅޭގޮތުން ޕީއެސްއެމް ނިއުސްއަށް މަޢުލޫމާތުދެއްވަމުން ފޮރިން މިނިސްޓަރ ޢަބްދުﷲ ޝާހިދު ވިދާޅުވީ އަލަށް އެކުލަވާލި ވިސާ އެއްބަސްވުމުގެ ދަށުން ވަކިޖިންސެއް ތަފާތުކުރުމެއްނެތި ވިސާލިބޭނެ އިންތިޒާމް ހަމަޖައްސާފައިވާކަމަށާއި ސްޓޫޑެންޓް ވިސާ އޮތް ކޮންމެ ކުއްޖެއްގެ ބެލެނިވެރިން ނުވަތަ މައިންބަފައިންނަށް އެ މުއްދަތުގެ ވިސާ ލިބިގެންދާނެކަމަށެވެ.
މިނިސްޓަރ ވިދާޅުވީ ކުރިން ކިޔަވާ އުމުރަށްވުރެ ހަގު ކުދިންނަށް ވިސާގެ ކަންތަކުގައި ދަތިކަމެއް ކުރިމަތިވި ނަމަވެސް މި އުޞޫލްގެ ތެރެއިން އެފަދަ ކުދިންނަށްވެސް ވިސާގެ ކަންތައް ހަމަޖެހިގެންދާނެކަމަށް މިނިސްޓަރ ވިދާޅުވިއެވެ.
ކުރިން އޮންނަ އުސޫލުގެދަށުން ސްރީލަންކާގައި ކިޔަވަންތިބޭ ކުދިންގެ ތެރެއިން އަންހެންކުދިންނަށް 18 ހަރުވަންދެން ސްޓޫޑެންޓް ވިސާ ލިބޭއިރު ފިރިހެން ކުދިންނަށް ލިބެނީ 16 އަހަރުގެ ވިސާއެކެވެ. ފޮރިން މިނިސްޓަރ ވިދާޅުވީ ކިޔަވަން ތިބޭ ކުދިންގެ މައިބަފައިން ސްރީލަންކާގައި ތިބޭއިރު ކާފައާއި މާމެންގެ ވިސާގެ ކަންތަކުގައި ދިމާވެފައި ހުރި ދަތިތަކާ ގުޅެގޮތުން މަޝްވަރާކޮށްފައިވާކަމަށެވެ. އަދި މިކަމަށް ލަހެއްނުވެ ސްރީލަންކާއާއި ރާއްޖެއާ ދޭތެރޭގައި އެއްބަސްވުމަކަށްވެސް އާދެވި އެކަމަށްވެސް ހައްލެއް ލިބިގެންދާނެކަމަށެވެ.
ފޮރިން މިނިސްޓަރ މިކަން ހާމަކުރާއްވާފައިވާއިރު ރައްޔިތުންގެ މަޖިލީހުގައި ތަޤްރީރުކުރައްވަމުން ސްރީލަންކާގެ ބޮޑުވަޒީރު ރަނިލް ވިކްރަމަސިންހަ ވަނީ ސްރީލަންކާގައި ތަޢުލީމު ހާސިލް ކުރާ ދިވެހި ކުދިންގެ މާމައިންނާއި ކާފައަށްވެސް ރެސިޑެންސް ވިސާ ދޭގޮތަށް އެޤައުމުގެ ސަރުކާރުން ނިންމަވާފައިވާ ކަމަށް ވިދާޅުވެފައެވެ.
ރާއްޖެއާއި ސްރީލަންކާއާ ދެމެދު ވެވުނު ވިސާ އެއްބަސްވުމުގެ ދަށުން ސްރީ ލަންކާއަށް ދަތުރުކުރާ ދިވެހީންނަށް 90 ދުވަހުގެ އޮންއެރައިވަލް ވިސާ ހިލޭ ހަމަޖެހިގެންދާނެއެވެ. އަދި ދެޤައުމުގައިވެސް ވިޔަފާރިކުރަން ބޭނުންވާ ފަރާތްތަކަށް މަލްޓިޕްލް އެންޓްރީ ބިޒްނަސް ވިސާ ހަމަޖެހިގެންދާއިރު، ލަންކާގައި ތަޢުލީމު ޙާޞިލުކުރާ އަށާރަ އަހަރުން ދަށުގެ ދިވެހި ދަރިވަރުންނާއި އެދަރިވަރުންގެ މައިންބަފައިންނާއި ބެލެނިވެރިންނަށް ވިސާގެ އެއްބަސްވުމަށް މިގެންނެވި ލުއިފަސޭހަކަމުގެ ބޭނުން ހިފޭނެއެވެ.